Jeremías 18 - Biblia en Guaraní - ?anderuete ?e’? Por? 2015

Ñay’ũ ha hese omba’apóva

1Ñanderuete ñe’ẽ og̃uahẽ Jeremíaspe, ha he’i:

2Epu’ã ha tereho pe kambuchi apoha rógape, ha upépe ahendukáta ndéve che ñe’ẽ.

3Ha aha pe kambuchi apoha rógape, ha péina ápe ha’e ombojere pe ruéda ombyapu’a porã hag̃ua pe ñay’ũ oĩva pe ruéda ári.

4Ha pe kambuchi ojapovahína ñay’ũgui oñembyai ipópe; ha ojapo jevy ichugui ambue kambuchi, ha’e oipota haichaite.

5Upévo ou chéve Ñanderuete ñe’ẽ, ha he’i:

6Che piko ndaikatuichéne ajapo Israel retãre ku ñay’ũ rehe omba’apóvaicha. Eikuaa porãke, ku ñay’ũ oĩ háicha pe kambuchi apoha pópe, péicha avei peẽ Israel rogaygua peime che pópe.

7Sapy’ánte ha’étama peteĩ tetãme térã peteĩ tetã ruvichápe aity ahundi hag̃ua ichupe.

8Ha upe tetã ha’emava’ekuépe oñembyasy jevy ramo ojapo vai haguére ha opoi ramo hembiapo vaígui Che avei apoíta che ñe’ẽnguégui ha ndajapomo’ãi ajapomo’ãva’ekue hesekuéra.

9Ha sapy’ánte ha’e peteĩ tetãme, amopu’ã ha amoheñoitaha,

10ha upéi ojapo ramo ivaíva che resa renondépe, ha nacheñe’ẽrenduvéi ramo, Che voi ndajapomo’ãvéi pe iporãva ajapomo’ãva’ekue.

11Ha ko’ág̃a, eñe’ẽ mayma Juda ha Jerusalenguápe, ha ere: Péicha he’i pende Ruete: Peikuaa porãke, Che ambosako’i mba’evai peẽme g̃uarã, ha ahaíma umi mba’e oikótava; peteĩteĩva tojevy hape vaígui ha tomyatỹrõ porã haperã ha hembiapo vaikuégui.

12Ha he’íta hikuái: Reiete ningo Ha’e oreavisa, roikótante ore roikose háicha, ha rojapo joaitéta ore py’apy ñañaite he’i háicha oréve.

13Upérõ Ñanderuete he’i: Peporandu ko’ág̃a umi tetãme, mávapa ohendúra’e koichagua mba’e. Mba’evaieterei ojapo kuñataĩ Israel pegua ombotavy haguére imenarãme.

14Ojeínepa Líbano cérro ru’ãgui pe ama rayvi rypy’a, opánepa umi y ro’ysã osyrýva cérro ru’ã rembe’ýgui.

15Che retã ningo hesarái chehegui, ha oiko omyatatĩ mba’e ryakuã porã ambue jarakuérape, péva ningo mba’evaiete ha oiko ñepysãnga sãngahápe hape rehe, pe tape ymaguare oiko haguépe, ha ndoikói pe tape potĩ ha oñemyatyrõ haguépe,

16upévare ha’ekuéra voi ombotapere hetãme, ha oiko ñembohory ramo opaite árape; mayma ohasáva guive upérupi ipy’andýi ha oñeakãmbovava joava’erã ohechávo ichupekuéra.

17Ku yvytu oipejúvaicha kuarahyresẽguio ha omosarambipa oĩva guive, péicha Che amosarambíta ichupekuéra umi hesekuéra ija’e’ỹva renondépe; ame’ẽta ichupekuéra che atukupe ha ndahechaukamo’ãi ichupekuéra che rova og̃uahẽvo iñehundiha árape.

Opu’ã ñemi hikuái Jeremías rehe ha Jeremías oñembo’e

18Ha he’i hikuái oñondive: Peju ha ñañemongeta ñemi ñahundi hag̃ua Jeremíaspe; katuete oĩta pa’ikuéra ñanerekombo’étava, karai iñarandúva ñanepytyvõtava, ha oĩta proféta ñe’ẽ ñandéve g̃uarã. Peju ha ñande juru rupi jajahéi hese, ha ani jajapysaka mba’eveichagua ñe’ẽ rehe ha’e he’íva guive ñanderehe.

19Nde, che Ruete, ema’ẽ cherehe, ha ehendu mba’épa he’i umi oñemoĩva cherehe.

20Oñemyengovia piko mba’evai mba’eporã rehe, ojo’óma hikuái peteĩ yvykua chereity hag̃ua. Nemandu’ákena che añemoĩ hague ne renondépe añe’ẽ porã hag̃ua hesekuéra, jahechápa noñemboykéi nde pochy rendy ichuguikuéra.

21Ko’ág̃a katu ajerure ndéve ehundi ita’yrakuérape, emosarambipa ichupekuéra kyse puku rupi, hembirekokuéra topyta imemby’ỹ rehe ha imena’ỹ rehe; imenakuéra tojejukapa, ha ikaria’ykura tojekutupa ñorãirõme.

22Toñehendu jahe’oguasu hogakuéragui, ha’ekuéra oha’ãrõ’ỹre egueru hi’arikuéra soldádo aty, ojo’o haguére hikuái yvykua chereity hag̃ua chéve, ha omoĩ haguére ñemiháme iñuhã che ha’a hag̃ua ipype.

23Nde katu, che Ruete, reikuaapa oñemongeta ñemi hague hikuái chejuka hag̃ua; ani reheja rei ichupekuéra iñañangue, ha ani rembogue hembiapo vai nde resa renondégui; toñepysãnga hikuái ne renondépe; péicha ejapo hesekuéra nde pochyha árape avei.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help