Ezequiel 22 - Biblia en Guaraní - ?anderuete ?e’? Por? 2015

Jerusalen rembiapo vaikuéra

1Ou chéve Ñanderuete ñe’ẽ, ha he’i:

2Nde, kuimba’e ra’y, nerembojovakesemo’ãi piko pe táva oñeñohẽháme tuguyeta, ehechauka ichupekuéra hembiapo vaikue,

3ha eréta péicha he’i pende Ruete: Oñeñohẽ haguére tuguyeta nde táva mbytépe, pya’e og̃uahẽta ne ñehundiha ára, oñemongy’apa ha ojapo haguére ijára gua’u ra’ãnga.

4Umi tuguy reñohẽva’ekue rupi reju reñemohembiapo vai, ha reju reñemongy’a avei umi nde jára gua’u ra’ãnga rejapomava’ekue rupi; ha upévare nde voi remombyky nde rekove arakuéra, ha og̃uahẽtama nde ára paha; upévare Che romoĩta tetãnguéra ñembohory ramo, ha opavave opuka hag̃ua nderehe.

5Umi hi’ag̃uíva ha umi mombyry oikóva ndehegui opukáta nderehe, nde voi remongy’águi nde réra, upévare oñemoherakuã vaíta nde réra.

6Cháke peẽ, Israel pegua mburuvicha, peñeha’ãmbáva peñohẽ hag̃ua pende rapicha ruguy.

7Jerusalengua nomomba’éi itúva ni isýpe, ojopy hikuái tetã ambueyguápe, omonda hikuái ityre’ỹva ha imenave’ỹvape.

8Ndererekói mba’eve ramo che rogaguasu ha remongy’a avei che pytu’uha arakuéra.

9Tekove vai oiko nde távape ha japu rupi ojejukauka rei itavayguakuérape, cérro ru’ãme oñemomba’eguasu ambue járape ha omyakãratĩ hikuái ambue tetãygua ojapo háicha.

10Nde táva ryepýpe oĩ ta’ýra oñenóva itúva rembireko ndive, ha oĩ avei nde apytépe umi oikóva hembireko ndive imba’asy oguejy jave.

11Oĩ umi oikóva hapicha rembireko ha ita’ýra rembireko ndive ha oĩ umi oikóva heindy, itúva rajy ndive.

12Nde apytépe ojejapyhy pirapire oñohẽ hag̃ua hapicha ruguy; ojeporuka pirapire tapichápe ha oñemyengovia jevývo ojerure hetave (interes reheve), ha mbaretepópe rejopy nde rapichápe; nde katu nderesarái chehegui, he’i pende Ruete.

13Peikuaa porãke, Che roinupãta rejapo vai haguére nde rapicháre ha reñohẽ rei haguére huguy.

14Nde py’a imbareténepa Che rombojovakeha árape, ha ne mbaretekue ipu’akánepa cherehe, he’i pende Ruete, Che ajapopáta ha’éva guive.

15Che romosarambíta umi tetã rupi, ha romyasãita opaite yvy apére, romopotĩ hag̃ua opaite ne rembiapo vaietégui.

16Ha nde voi retĩta umi tetã resa renondépe, ha reikuaáta Che ha’eha pende Ruete.

17Ou chéve ambue Ñanderuete ñe’ẽ, ha he’i:

18Kuimba’e ra’y, Israel retã oiko chéve g̃uarã ku ky’akue hembývaicha oñemboyku rire: Cóbre, estáño, hiérro, plómo ha pláta (óro morotĩ).

19Upévagui péicha he’i pende Ruete: Oiko haguére pendehegui mba’e ky’akue hemby reíva, Che pombyatýta Jerusalen mbytépe.

20Ojeity háicha tatakuápe pláta, cóbre, plómo ha estáño ha upéi ojehatapyña porã omboyku hag̃ua, péicha avei Che poitýta che rata hendývape pomboyku porã hag̃ua.

21Añetehápe Che pombyatýta ha aipejúta pendeári che rata pochy rendy ha poitýta ipype pomboyku porã hag̃ua.

22Ku pláta hyku háicha tatakuápe, upéicha penderykúta Jerusalen mbytépe, peikuaa hag̃ua Che ha’eha pende Ruete ha añohẽ hague che pochy pendeári.

23Ou chéve ambue Ñanderuete ñe’ẽ, ha he’i:

24Kuimba’e ra’y, ere Israélpe: Nde ndaha’éi yvy potĩ, ha nanderypýiri ama che pochyha árape.

25Umi proféta Jerusalen ryepýpe oikóva ome’ẽmbáma iñe’ẽ opu’ã hag̃ua cherehe, ku leõ (África pegua) okororõ háicha ojapyhývo hembi’urã, upéicha ombyai hikuái hapicha rekovekuéra oñemomba’e hag̃ua ikokue rehe, imba’erepykue rehe ha péicha opyta heta kuñakarai imenave’ỹre.

26Ipa’ikuéra opyrũ che rembiapoukapy rehe, ha omongy’a che rogaguasu; nombojuavýi ojuehegui mba’e che rembipota ha yvyarigua rembipota apytépe, ha nombojuavýi teko potĩ ha teko vai apytégui, ha che pytu’uha áragui omboty hikuái hesakuéra, ha ijapytepekuéra ndache’apói mba’eve ramo.

27Umi mburuvicha itavapýpe ojogua umi aguaraguasúpe ojapyhýva hembi’urãme, oñohẽ hapicha ruguy ombyatyve hag̃ua umi mba’e omondava’ekue.

28 Iprofetakuéra omo’ãmba japúpe, ha’ekuéra omomarandu jave oporombotavy ha ijapu, ha hi’ári he’i hikuái: Péicha he’i Ñanderuete; Che katu nda’éi mba’eve ichupekuéra.

29Hetãyguakuéra omboyke justícia oporomonda, ojopy ha ombohasa asy hag̃ua imboriahúva ha tetã ambueyguápe.

30Ha aheka ijapytepekuéra peteĩ kuimba’e omopu’ãkuaáva pe tápia ha omboty jevýva ikuára ani hag̃ua Che ambyai ko tetãme, ha ndajohúi avavépe.

31Upévagui añohẽ hi’arikuéra che pochy; che pochýpe ahundi ichupekuéra; amyengovia hembiapo vai ha aity iñakã ári jehavira, he’i pende Ruete.