Provérbios 27 - Biblia en Guaraní - ?anderuete ?e’? Por? 2015

1Ani remomba’eguasu pe ko’ẽ ramogua ára; ndereikuaáigui mba’épa oguerúta ndéve.

2Ambue nemomba’eguasu ramojepe, nde katu ani reñemomba’eguasu; peteĩ tetã ambueygua tanemomba’eguasu, anítei katu nde juru voi.

3Ipohýi pe ita ha ipohýi pe yvyku’i; pe ivýrova pochy katu omomba’embyasy pohyive hapichápe mokõivévagui.

4Pe pochy reko ningo iñarõ, pe pochy rendy ningo ndojejokokuaái ha mávapa ikatúta ombopoguy pe icelósavape.

5Iporãve pe jeja’o oje’éva ñande rovaitépe, mborayhu ñemigua noñeñandúivagui.

6Iporãve ñane angirũ ñanenupã (hekoitépe ramo), ñanderehe ija’e’ỹva ñane retũ rãngue.

7Pe tapicha hyg̃uatãva omboyke eíra jepe; ha pe iñembyahýivape g̃uarã katu mba’e iróva jepe he’ẽ porã ichupe.

8Ku guyra haitýgui opoíva, peichaitehína pe tapicha okañýva hekohágui.

9Pe kuave’ẽmby oñemotimbóva mba’e ryakuã porã reheve oporombopy’a rory, upéicha avei ñane angirũ ñanembovy’a ha ñanemoangapyhýva hekombo’e arandu rupiguáva.

10Ani repoi ne angirũ, térã nde ru angirũgui; ha aníke rehótei nde ryke’y róga mombyry oikóvape rejejopy vai jave, iporãiteve reho nde róga ykereguápe nde ryke’y mombyrygua rãngue.

11Eñemoarandúke nde, che ra’y, ha chembopy’a rory, upéicha ambohovaikuaa porã umi nderehe oñe’ẽvaívape.

12Pe iñarandúva ohecha pe mba’evai ha okañy, umi itarova rekóva katu ohasánte imbyte rupi ha upépe pe mba’evai ombyai ichupe.

13Upe ome’ẽ reíva iñe’ẽ peteĩ odevévape opa rupiete, ojepe’ava’erã ijao jepe; térã pegueraha voi ichupe, opagapa peve icuénta.

14Upe omomaiteíva sapukaipópe hi’angirũme ko’ẽmba mboyve, ha’ete ku reñe’ẽ vai ramoguáicha hese.

15Óga otyky tapiaitéva oky jave ramo, ojoguaite pe kuña iñorãirõ kuaávape,

16upe ojokoséva ichupe ha’eténte ku ojokoséva yvytúpe térã acéite ipo akatúape.

17 Hiérrope oñehãimbe’e hiérro, ha péicha avei yvyariguakuéra oñohekombo’e oñomongeta porã hag̃ua.

18Pe oñangarekóva hígo (yva) máta rehe ho’uva’erã hi’akue, ha pe oñangarekóva ijára mba’erepykuéra rehe, oñemomba’eguasuva’erã.

19Pe yvyarigua rova ojuavy háicha ojuehegui, péicha avei pe yvyarigua py’apy ojuavy hapicha py’apýgui.

20Pe omanomava’ekue retã ha pe aña retã araka’eve nahyg̃uatãi; péicha avei pe yvyarigua resa araka’eve nahyg̃uatãmo’ãi (tapia oipotave ohecháva guive).

21Pe pláta ha óro oñemopotĩ háicha tata akúpe, péicha avei oñemopotĩ yvyarigua reko, herakuã porã rupi.

22Remoĩ ramojepe pe itarovávape peteĩ angu’ápe avati ra’ỹi apytépe ha rejoso hatã rire, itarova reko ndojeimo’ãi ichugui.

23Ema’ẽ porã nde ovecha rehe ha eñangareko porãkena ne rymba aty rehe.

24Cháke, pe mba’erepyeta ndaha’éi opaite ára peve g̃uarã; ha pe mba’erepyeta noñembohasa reimo’ãi peteĩ túvagui opaite iñemoñare jevy peve.

25Oje’upa rire pe kapi’i oje’ukuaapa oje’ukuaáva guive ñana apytépe,

26nde ovecha ra’y rupi reñemondekuaa gueteri, ha nde kavara ra’y rupi rejoguakuaa nde kokuerã,

27ha hi’ári reguerekóta kavara kamby ne rembi’urã, nde rogaygua rembi’urã ha ne rembiguái kuñakuéra rembi’urã.