2 Corintoyguakuérape 13 - Biblia en Guaraní - ?anderuete ?e’? Por? 2015

Páblo omoĩ porãse oñondive iglesiayguakuérape

1Ko’ã mba’e ha’ese aha ramo mbohapyha jevy pene rendápe. Mokõi térã mbohapyha techahare ñe’ẽ rupi oñemoañetéta opaite mba’e.

2Ha’éma voi ha ha’ese jevy che aime ramoguaréicha mokõiha jevy pende apytépe, péicha avei ko’ág̃a chepore’ỹme ha’ese umi oñemohembiapo vaiva’ekuépe ha opavavépe che aha jevývo ndahechakuaamo’ãi avavépe.

3Hesu Crísto ojekuaauka peẽme che juru rupi, Ha’e ningo naikangýi, ipu’akaite uvei pendepype.

4Hesu Crístope oñemoĩ kurusúre Ha’e ikangy jave, ko’ág̃a katu oikove jevy Ñanderuete pu’aka rupi. Upéicha ore kangy ramojepe avei, orembarete hendive Ñanderuete pu’aka rupi peẽme g̃uarã.

5Peitypeka (peheka) pende py’apy, peime porã piko térã nahániri pende jeroviápe, peñeha’ã porãke pendejupe. Ndapehechakuaái piko Hesu Crísto oĩha pendepype, ha ndaupéichai ramo ningo peẽ Hesu Crísto rehegua gua’u.

6Che katu aha’ãrõ peẽ pehechakuaa ore Hesu Crísto remimbou añeteguaha.

7Ore katu rojerure Ñanderuetépe, ani hag̃ua peẽ pejapo mba’eve ivaíva. Ani hag̃ua ore roñembotuicha, Ñanderuete renondépe, peẽ voi pejapo hag̃ua tembiapo porã, ore ropyta ramojepe heko pegua’ỹva ramoguáicha.

8Ore ndaikatúi roñemoĩ pe añetegua rehe, roñemoĩse katu ipoguýpe.

9Upévare ore rovy’a orekangy ramo ha peẽ penembarete jevy, roipotáguinte peẽ peiko porãmba jevy Hesu Crísto poguýpe.

10Upévare che pene pore’ỹme ahaíma ko kuatiañe’ẽ kóva, ani hag̃ua aime jave penendive añe’ẽ pohýi peẽme, ha aiporu pe pu’aka (autoridad) Ñanderuete voi ome’ẽmava’ekue chéve aporomopu’ã hag̃ua, ndaha’éi aporombyai hag̃ua.

Ñemomaitei paha

11Ipahápe, che hermanokuéra, che ha’ese peẽme: Pevy’aite, peheja ambuekuéra tapenemboheko ha tapenepytyvõ peiko porã jevy hag̃ua Ñanderuete renondépe, upévare peñembopy’apeteĩ jevy ha peiko py’aguapýpe oñondivepa, ha Ñanderuete, pe mborayhu ha py’aguapy Jára, penemoirũta.

12Peñomomaitei ñehetũme oñemboheko potĩva ojepokuaa háicha. Opaite Hesu Crísto reheguáva penemomaiteiuka.

13Ñandejára Hesu Crísto jeporiahuvereko, ha Ñanderuete mborayhu ha Pytu Porãmbáva ñembopy’apeteĩ toĩ opavave penendive.