Salmokuéra 89 - Biblia en Guaraní - ?anderuete ?e’? Por? 2015

Ñanderuete ñembopy’apeteĩ David ndive - Etan purahéi

1Opaite árape agueropurahéita Ñanderuete poriahuvereko, tapia amombe’uva’erã che juru rupi umi mba’e Nde eremava’ekue, katuete Nde rejapopáta avei.

2Umi mba’e Nde eréva guive katuete oikóta avei: Ne mborayhu opytáta tapia g̃uarã, Nde remoañetéta ne ñe’ẽ reme’ẽva’ekue.

3Añembopy’apeteĩ Che aiporavova’ekue ndive, ame’ẽma che ñe’ẽ che rembiguái Davídpe, ha’évo:

4Opaite árape g̃uarã oikova’erã ne ñemoñarenguéra, ha amopu’ãta nde guapyhaguasu tapia g̃uarã. Selah

5Ha umi yvága oikuaauka ne rembiapo techapyrãva, Nde, che Ruete, ha ne mborayhu tuicha oñeñandúta heko potĩva atýpe.

6Ha máva piko ikatúne oñembojoja Ñanderuete yvága pegua rehe. Ha máva piko ipu’akaitéva ijapytépe ojoguáne Ñanderuetépe.

7Ojekyhyje Ñanderuetégui heko potĩva apytépe, ituichaiterei ningo ipu’aka opaite ijerekue rehe oĩva guive.

8Nde, che Ruete, yvága atykuéra Jára, máva piko Ndeichagua. Nde ningo ndepu’akapáva, ore Ruete, ha nde reko añetegua nembojerepa.

9Nde rembopoguypa pe y ipochyete ramojepe, Nde remokirirĩmba umívape.

10Nde rembopoguyva’ekue Rahábpe (Job 9,13) ku omanombotávaicha, nde po mbarete rupi remosarambipa umi nderehe ija’e’ỹvape.

11Ne mba’e ningo umi yvága, ha ne mba’e avei ko yvy, ko yvy ne rembiapokue ha opaite mba’e ipype oĩva guive, nde voi rejapo ypyva’ekue opaite mba’e oikóva guive.

12 Nórte ha sur Nde rejapova’ekue, Tabor ha Hermon (cerrokuéra) omomba’eguasu nde réra.

13Nendive oĩ pu’aka, nde po imbarete, nde akatúa rehupi yvate.

14 Justícia ha ñembojovake hekoite peguáva ojokohína nde guapyhaguasu, poriahuvereko ha teko añetegua oñembo’yhína nde rova renondépe.

15Ovy’aite pe tetã nembovy’áva, ha oguatáva nde rapére, che Ruete resa renondépe.

16Nde rérape hory joáne opaite ára, ha nde justícia omokyre’ỹhína ichupekuéra.

17Nde ha’égui herakuã porã ha ipu’akapáva, ha nde poriahuvereko rupi orembopu’aka pu’akavéta.

18Ñanderuete ningo ore mo’ãha ha ore retã ruvicha, Ha’e ningo Israel Heko porãva.

19Yma rejehechauka techapáy (vision) rupi heko potĩvape, ha ere: Che aipytyvõta pe ipy’aguasúvape ha che amopu’ãta pe aiporavova’ekuépe che retã ári.

20Ajohúma che rembiguái Davídpe, amona hese acéite oiko hag̃ua mburuvichaguasu ramo Israel retãme.

21Che po mbarete oipytyvõ tapia ichupe ha che po omombarete ichupe.

22Umi ohayhu’ỹva ichupe nombotavymo’ãi ichupe, ha umi iñañáva ndojopymo’ãi ichupe,

23Umi hese ija’e’ỹvape amyangekõita henondépe, ha ahundipáta ichupekuéra.

24Che reko añetegua ha che poriahuvereko oĩva’erã hendive, ha che réra rupi okakuaáta ipu’aka.

25Ha amoĩta ipoguýpe yguasu (Mediterráneo) guive ysyry Éufrates peve.

26Ha’e he’iva’erã chéve: Nde ningo che Ruete, che Jaraite, che itaguasu, che pytyvõharateetéva.

27Che amoĩta ichupe ta’ýra ypykue ramo, ha ha’e oikóta mburuvichaguasuete ramo umi tetã ruvichakuéra apytépe.

28Opaite árape aiporiahuverekóta ichupe, ha che ñe’ẽme’ẽ oñemoañetéta hendive g̃uarã.

29Iñemoñare oikóta opaite árape, ha iguapyhaguasu opytáta umi yvága oĩ aja pukukue.

30Iñemoñarenguéra oheja ramo che rekombo’e, ha opoi ramo che ñembojovakégui,

31omboyke ramo che rembipota ha ndojapói ramo che rembiapoukapy,

32upémaramo che yvyra po’ípe ahaviráta ichupekuéra opoi haguére chehegui, ha tukumbópe ainupãta ichupekuéra ojapo vai haguére.

33Che mborayhu katu ndaipe’amo’ãi ichugui (Davídgui), ha nombotovemo’ãi che reko añetegua.

34Ndacheresaraimo’ãi che ñe’ẽme’ẽgui ha namoambuemo’ãi mba’eve osẽva guive che jurúgui.

35Che añe’ẽme’ẽva’ekue che rogaguasu rehehápe ha ndachejapumo’ãi Davídpe.

36Iñemoñare oikóta opaite árape, ha iguapyhaguasu oikóta kuarahýicha che renondépe.

37Ha jasýicha oikóta opaite árape, ha pe techahare añeteguáva oĩva yvágape nombotavymo’ãi avavépe. Selah

38Upeichavéramo ndepochy hendive ha remboyke pe Nde reiporavova’ekuépe.

39Rembyai ne rembiguái jekupyty, remotĩ hag̃ua ichupe reitýra’e yvýre ne rembiguái jeguaka (coróna) iñakãre oĩva.

40Reitýra’e itapiakuéra (omongoráva) itáva, ha rembyaipa umi óga yvate oñemombaretepyréva.

41Upévare umi ohasátava upérupi omondáta ojohúva guive ha opaite umi oikóva guive ijerekue rupi opuka joáta hese.

42Nde remombarete umi hese ija’e’ỹva, ha rembovy’a ichupekuéra.

43Upéicha avei Nde remondouka hapykuerikuéra ikyse puku hãimbéva, ha nereipytyvõi ichupe ñorãirõme.

44Reipe’a ichugui ipu’aka, ha yvy rehe reity iguapyhaguasu.

45Remombyky imitãrusu rekove ára ha rejaho’i ichupe ñemotĩme. Selah

46Araka’e pevépa, Nde, che Ruete, reñomíta chehegui nde rova, araka’e pevépa hendýta tatáicha nde pochy.

47Nemandu’amíkena mbykyha che rekove arakuéra, pya’e ningo ohasa yvyariguakuéra rekove.

48Moõ piko oĩ yvyarigua tapia oikóva ha omano’ỹtava. Moõ piko oĩ yvyarigua oguenohẽkuaáva hekove ñemano poguýgui. Selah

49Che Járavusu moõ piko oime nde poriahuvereko ymaguare reñe’ẽme’ẽ ramoguare Davídpe ne ñe’ẽ añetegua rupi.

50Che Jára, nemandu’amíkena pe ñembohory ne rembiguái ohasáva rehe, pe puka ñembohory heta tetãgui agueraháva che py’apýpe.

51Upéicha umi nderehe ija’e’ỹva, Nde, che Ruete, ojahéi pe Nde voi reiporavomava’ekue rehe.

52Toñemomba’eguasu tapia g̃uarã Ñanderuetépe. Taupéicha, taupéichakena (Amen).