Juéces 8 - Biblia en Guaraní - ?anderuete ?e’? Por? 2015

Gedeon ojapyhy Madian retã ruvichakuérape

1Ha umi Efraingua he’i Gedeónpe: Mba’éiko rejapo orerehe, naorerenóiri rehokuévo rejeity hag̃ua Madiayguakuéra ári, ha oñe’ẽ pohýi hikuái ichupe.

2Ha ha’e ombohovái ichupekuéra: Mba’épa che ajapo ko’ág̃a añembojojávo penderehe. Pe Efrain parral’a ñemono’õ ituichave Abiezer parral’a ñemono’õgui.

3Ñanderuete omoĩ pende pópe Oreb ha Seeb, Madian ruvichakuérape; ha mba’épa che ikatura’e ajapo añembojoja hag̃ua penderehe. Gedeon he’ipa rire ichupekuéra ko’ã mba’e ndaipochyvéi hikuái hendive.

4Ha Gedeon ou Jordánpe, ha ohasa rire ha’e ha umi 300 kuimba’e oguerúva hendive, ikane’õmbáma, omuña hetaitégui hesekuéra ija’e’ỹvakuérape.

5Ha Gedeon he’i umi Sucotguápe: Che ajerure peẽme pemongarumi hag̃ua ko’ã tapicha chendive oúvape, ikane’õ itereígui hikuái, ore romuña rohóvo, Zeba ha Zalmunápe, Madian retã ruvichakuéra.

6Ha umi Sucot ruvicha he’i ichupe: Oĩmapa Zeba ha Zalmuna nde pópe, rome’ẽ hag̃ua pan ne irũnguérape.

7Ha Gedeon he’i: Ág̃a Ñanderuete omoĩ vove ramo che pópe Zeba ha Zalmúnape, che pombyepotíta ñuãtĩme okúi peve pende ro’o pende retégui.

8Upégui oho Peniélpe, ha he’i avei ichupekuéra peichaite. Ha umi Penielgua he’i avei ichupe, umi Sucotgua he’i haguéicha ichupekuéra.

9Ha ha’e he’i umi Penielguápe: Ág̃a che aju jevývo py’aguapy reheve, aitýta ko óga yvateitéva (tórre).

10Ha Zeba ha Zalmuna oĩ Carcórpe, ha hendivekuéra hemby oiméne 15.000 soldádo rupi umi kuarahyresẽ gotyogua ñemoñarégui, ho’águi 120.000 ohekyikuaava’ekue ikyse puku.

11Ha Gedeon oho umi óga mymba pirekueguigua oikóva rape rehe, Noba ha Jogbehágui kuarahyresẽ gotýo, ha ojeity Zeba ha Zalmuna campaménto ári, isoldádo oha’ãrõ’ỹhágui.

12Ha Zeba ha Zalmuna okañy, Gedeon katu oho hapykuerikuéra; ha oapresa mokõive Madian retã ruvichakuérape, ha omosarambipa isoldadokuérape.

13Upémaramo Gedeon, Joas ra’y, ou jevy ñorãirõ hágui pe yvyty Herésgui.

14Ha ohenói peteĩ mitãrusu umi Sucot reheguápe, ha oporandu ichupe umi Sucot ruvicha ha karai anciáno rerakuéra rehe ha ohaiukapa rire héra, ojejohu 77 kuimba’e.

15Ha Gedeon oikévo umi kuimba’e Sucot pegua oĩháme he’i: Péina ápe Zeba ha Zalmuna, ko’ãva rupi peẽ cherova’apíkuri, pejévo: Oĩmapa nde pópe Zeba ha Zalmuna, ore rome’ẽ hag̃ua tembi’u umi ne kuimba’e ikane’õvape.

16Ha oinupã vaipa umi mburuvicha ha karai ancianokuéra Sucotguápe ñuatĩnguéra desiérto peguare karaguatápe.

17Upéicha avei oity pe óga yvate Peniel pegua, ha ojuka umi Peniel pegua kuimba’ekuérape.

18Upéi he’i Zeba ha Zalmúnape: Mba’éichapa ra’e umi kuimba’e rova pejukava’ekue Tabórpe. Ha he’i hikuái ichupe: Ndeichaite, nde rováre roma’ẽ; peteĩteĩva ojoguaitére tetã ruvicha ra’ýpe.

19Ha Gedeon he’i: Umíva ningo che ryke’ykuéra, che sy membykuéra. Ñanderuete rekovére ha’e peẽme che pojukáta, ndapejukái rire ra’e ichupekuéra, che ndapojukava’erãmo’ãi avei peẽme.

20Ha Gedeon he’i Jeter, ita’ýra ypykuépe: Epu’ã ha ejuka ichupekuéra. Ha pe mitãrusu ndohekyiséi ikyse puku, okyhyjégui ha imitãitereígui.

21Upémaramo Zeba ha Zalmuna he’i: Epu’ãna nde voi orejuka hag̃ua; nde ningo kuimba’e ipy’aguasúva. Ha Gedeon opu’ã, ha ojuka Zeba ha Zalmunápe; ha ojapyhy umi jeguaka oĩva icaméllo ajúra rehe.

22Ha umi Israelgua he’i Gedeónpe: Eikóna nde oréve ore retã ruvicha ramo, nde ha nde ra’y, ha nde ra’y ra’yre peve, nde oresalvágui Madian poguýgui.

23Gedeon katu he’i: Ndaikomo’ãi pene retã ruvicha ramo, ha che ra’y ndoikomo’ãi avei pende ruvicha ramo, Ñanderuete ningo pende ruvicha.

24Ha Gedeon he’i ichupekuéra: Ajerurese peẽme peteĩ mba’e: Peteĩteĩva tome’ẽ chéve peteĩ namichãi peipe’ava’ekue umi ñanderehe ija’e’ỹvagui.

25Ha ombohovái hikuái: Torypaitépe rome’ẽta ndéve. Ha omyasãi peteĩ ahoja, ha hi’ári oity hikuái umi namichãi oipe’ava’ekue Madianguakuéragui.

26Ha umi namichãi ojerureva’ekue ipohýi 18,2 kílo óro, ojepapa’ỹre umi ambue jeguaka ha aokuéra Madian retã ruvichakuéra oguerekova’ekue ijehe, ha avei umi jeguaka oĩva’ekue icamellokuéra ajúra rehe.

27Ha ko’ã ñamichãigui Gedeon ojapouka peteĩ póncho mbyky (efod), pa’iguasu omondéva, ha oñongatuka itáva Ofrápe; ha opaite Israelguakuéra omomba’eguasu ko póncho mbykýva; ha oiko ñepysãngaha ramo Gedeon ha hogayguakuérape g̃uarã.

28Péicha Madiaygua ho’a Israel ñemoñarenguéra poguýpe, ha araka’eve noñakãrapu’ãvéi. Ha Israel retã opytu’u 40 año pukukue Gedeon oikove aja.

29Uperire Jerobaal, Joas ra’y, oho ha oiko hógape.

30Gedeon oguereko 70 ta’ýra, ha’e hembireko hetágui.

31Avei ikuña Siquem pegua imemby avei ichugui, ha ohenói imembýpe Abimelec (he’ise che ru oiko tetã ruvicha ramo).

32Ha Gedeon, Joas ra’y, omano itujaite rire, ha oñeñotỹ ichupe itúva, Joas oñeñotỹ haguépe, Ofrápe, umi Abiezergua mba’évape.

33Ha ojehu katu Gedeon omano rire, Israel ñemoñarenguéra oñemboheko vai jevy ha oho Baalkuéra rapykuéri, ha oiporavo hikuái ijararã Baal-berítpe.

34Ha Israel ñemoñarenguéra naimandu’avéi Ñanderuete, Ijára rehe, osalvava’ekue ichupekuéra mayma hesekuéra ija’e’ỹvagui, oikóva guive ijerekuévo;

35Ha naimba’erechakuaái hikuái Jerobaal róga ndive, péva hína Gedeon, umi mba’e porãita ha’e ojapova’ekue Israel rehe.