Jonas 4 - Biblia en Guaraní - ?anderuete ?e’? Por? 2015

Jonas ipochyete.

1Jonas katu ipy’aro asyeterei ha ipochy.

2Ha oñembo’e Ñanderuetépe ha he’i: Nde, che Ruete, péva voi che ha’eva’ekue, aimérõ gueteri che retãme. Pévagui voi pya’e pya’e akañyse Tarsíspe, che ningo aikuaa porã voi, Nde, che Ruete, reiporiahuvereko ha ndepy’a porãha, hasyha ndepochy hag̃ua ha Nde reporohayhuseveha rehavira rãngue.

3Upévare che Ruete ajerure ndéve ehekýina chehegui che rekove, iporãvénte chéve amano aikove rãngue.

4Ha Ñanderuete he’i ichupe: Rejapo porã piko ndepochyeterei hag̃ua.

5Ha osẽ Jonas tavapýgui ha oñemomombyrymi kuarahyresẽ gotýo, ha omopu’ã peteĩ kuarahy’ã ijupe g̃uarã ha oguapy iguýpe, ohecha hag̃ua mba’épa ojehúne Nínivepe.

6Ha Ñanderuete, pe Jaraitéva omoheñói peteĩ mba’ysyvo máta Jonas oĩháme ombokuarahy’ã hag̃ua iñakã, omoangapyhy hag̃ua ichupe, ha Jonas ovy’aite ko mba’ysyvo kóva reheve.

7Ambue ko’ẽme katu Ñanderuete ombou peteĩ yso ombyai hag̃ua pe mba’ysyvo,

8ha ojehu osẽvo kuarahy, Ñanderuete ombou peteĩ yvytu hakúva oipejúva kuarahyresẽguio, ha Jonáspe ojope rasy kuarahy iñakãme ha ombopy’amano ichupe, ha’e ningo omanoseiterei ha he’i: Iporãve chéve amano aikove rãngue.

9Upévo Ñanderuete he’i Jonáspe: Iporã piko, ndepochy ipiru haguére ko mba’ysyvo kóva. Iporãite, he’i Jonas, chepochy amano hag̃uáicha.

10Ha Ñanderuete he’i ichupe: Nde reiporiahuverekókuri pe mba’ysyvo, nde neremba’apói ramojepe hese, ni nandéi remongakuaava’ekue.

11Ha Chépa ndaiporiahuverekoichéne Nínivepe, pe tavaguasuete oĩháme hetave 120.000 kuimba’e ha kuñakuéra ndaikatúiva ombojuavy ivaíva iporãvagui, akatúa térã asúpe, ha tymba hetaiterei ningo oiko avei ipype.