1Miriam ha Aaron oñe’ẽ vai Moises rehe, ha’e omenda haguére peteĩ kuñakarai Cusguáva rehe.
2Ha he’i hikuái: Moises rupi añóntepa Ñanderuete oñe’ẽne. Noñe’ẽichénepa orérupi avei. Ha Ñanderuete ohendupa.
3Ha Moises oñemomirĩve ha ipy’aporãve opaite ambue kuimba’e ha kuñakuéra ndive oikóva guive ko yvy apére.
4Upéi Ñanderuete he’i Moises, Aaron ha Miriámpe: Tapeho peẽ mbohapyvéva pe óga jojohuha rendápe, ha oho hikuái.
5Upéramo Ñanderuete oguejy peteĩ arai rupive ha oñemoĩ pe óga jojohuha rokẽme, ha ohenói Aaron ha Miriámpe og̃uahẽ hag̃ua pe óga jojohuha rokẽme.
6Ha he’i ichupekuéra: Ko’ág̃a pehendu porãke che ñe’ẽ. Oĩ ramo pende apytépe peteĩ proféta, Che ajehechaukáta ichupe techapáy rupi, térã iképe añe’ẽ hag̃ua hendive,
7ndaupéichai, che rembiguái Moises ndive, heko porãvégui opaite ambue che rembiguaikuéragui ha ojapo hekópe che rembipota.
8Hovakete añe’ẽ hendive, hesakã porã háicha, ha ndaha’éi ta’ãnga rupi; ha ha’e ohecháma Jahve rete. Mba’éguipa ndapekyhyjéira’e peñe’ẽvai hag̃ua che rembiguái Moises rehe.
9Upérõ Ñanderuete pochy hendy hesekuéra ha oho.
10Ha pe arai oñemboyke rire pe óga jojohuhágui, péina Miriam ileprapa ku yro’y rypy’áicha (heládaicha) ha Aaron oma’ẽ Miriam rehe, ha péina ileprapa.
11Ha Aaron he’i Moiséspe: Nde, che jára, anína remoĩtei ore ári ko angaipa; ku itarovávaicha ore rembiapo, ore roñemoangaipágui.
12Aníkena ha’e opytátei ku onacéva membykua ramo isy ryégui, ha ho’o oñembyaipapotávaicha.
13Upéramo Moises omba’ejerure Ñanderuetépe ha he’i: Ajerure asy ndéve, che Jára, emonguerána ichupe ko’ág̃a.
14Ñanderuete katu ombohovái Moiséspe: Itúva ondyvu ramo hova rehe, noguerotĩriva’erãpa ha’e 7 ára pukukue. Toñemosẽ ichupe pende rekohágui 7 ára pukukue, ha upéi tou jevy pende rekohápe.
15Péicha oñemosẽ Miriámpe hekohágui 7 ára pukukue; ha Israelguakuéra noñemongu’éi henonderãme, Miriam ou jevy peve hekohápe.
16Uperire katu tetãyguakuéra oipykúi Hazerótgui, ha opyta hikuái Paran desiértope.
Who We AreWhat We EelieveWhat We Do
2025 by iamachristian.org,Inc All rights reserved.
