Salmokuéra 64 - Biblia en Guaraní - ?anderuete ?e’? Por? 2015

David ojerure Ñanderuete oñangareko hag̃ua hese

1Ehendumína, Nde, ore Ruete, che ñe’ẽ pyahẽ asy, emo’ã che rekove anítei che ha’a chemongyhyjéva ha cherayhu’ỹva pópe.

2Cheñomi umi iñañáva rembiapo vaígui, umi tekove vai ayvúgui.

3Ohãimbe’ehína ikũnguéra (ijurukuéra) ku kyse pukúicha, ha iñe’ẽ iróva opoihína hu’ýicha.

4Ka’aguýgui opoi ihu’y heko potĩva rehe, ihu’ýpe ojapi porã avave oha’ãrõ’ỹre, ha avavégui ndokyhyjéi hikuái.

5Oñomokyre’ỹ hikuái ojapo hag̃ua mba’evai, ha ñemiháme oñomongeta omoĩ hag̃ua iñuhã, ha he’i hikuái: Avave ndaorerechamo’ãi.

6Oitypeka hikuái ñaña reko rehe, oñeha’ãmba ombosako’i porã hag̃ua hembiapo vairã, yvyarigua apytu’ũme heñóiva ha ipy’apýpe oimo’ã hikuái avave ndoikuaamo’ãi.

7Ihu’ýpe katu Ñanderuete ojapíta ichupekuéra, peteĩ sapy’aitépe oñeñandupaitéta ojejapi vai hague.

8Ijuru voi oitýta ichupekuéra, ha oñembohorypáta hesekuéra oimeraẽ ohecháva guive ichupekuéra.

9Ha upévo yvyariguakuéra okyhyjepáta, ha he’íta: Kóa ningo Ñanderuete rembiapo, Ha’e oisãmbyhy porãmbahína.

10Heko potĩva katu horyetéta Ñanderuete ndive, ha ojeroviáta hese, ha opaite heko potĩva ovy’aitéta Ñanderuete ndive.