Job 41 - Biblia en Guaraní - ?anderuete ?e’? Por? 2015

1Reguenohẽnepa Leviatan (tejujagua tuichaite nunga) pindáre, térãpa remosãkuaa ikũgui.

2Remosãnepa itĩ ha rembokuánepa hañykã ty’ãime (gánchope).

3Ojerure asýnepa ndéve reiporiahuvereko hag̃ua ichupe, térã nembojuruhe’ẽne repoi jevy hag̃ua ichugui.

4Ha’e oñemoĩnepa peteĩ ñe’ẽme nendive oiko hag̃ua ne rembiguái ramo hekove aja pukukue.

5Reñembosaráinepa hendive ku guyra ndive ramoguáicha, térã remosãnepa ichupe nde rajykuérape g̃uarã.

6Umi pira kutuhára ovendénepa ichupe térã omboja’ónepa ome’ẽ hag̃ua hepýre.

7Hu’y ohasánepa ipire rupi ojuka hag̃ua térãpa pira kutuhára ombokuáne iñakã ijyvyra puku hakuápe.

8Epokóna hese ha tapiaite nemandu’áta pe ñorãirõ rehe, ha araka’eve nderepoko jevyveichéne.

9Opaite umi oha’ãrõva osẽ jevy hag̃ua pe Leviatan ñorãirõgui, oñembotavy voi ijupe, oimeraẽva ohecháva guive ichupe ipy’amanóta.

10Ndaipóri ipy’aguasúva omombayséva ichupe, ha upéramo mba’eichagua kuimba’e piko aipo ramo ikatúva oñemoĩ cherehe.

11Mávapa ome’ẽ chéve peteĩ mba’e, che amyengovia hag̃ua ichupe. Opaite mba’e ningo oĩva guive yvága guýpe che mba’e voi.

12Añe’ẽseve hete porã, ipu’aka ha ipy’aguasu rehe.

13Mávapa oipiróma ipire iñanambusuetéva. Mávapa oñembojáma hese opoko hag̃ua hembe rehe.

14Mávapa oipe’a ijuru ohecha hag̃ua hãinguéra ndetuicháva ha oporomondýiva.

15Ipire iñanambusuetéva ojogua pe soldádo retemo’ãha rysýipe, oñemboty porãva.

16Oñembojoaju porã ambue rehe, yvytu jepe ndoikéi ipa’ũnguéra.

17Ojapa ha ojetu’u ojuehe, ha ndaikatúi ojepe’a ojuehegui.

18Iñatĩarõ ohesape, ha hesakuéra ojogua ko’ẽtĩ ropepípe.

19Ijurúgui osẽ tata rendy, omosarambívo tata piriri.

20Itĩnguáragui osẽ tatatĩ, ojogua y timbópe osẽva pe japepo (ólla) opupúvagui.

21Ipytu omyendy tatapỹicha, ha ijurúgui osẽ tata rendy.

22Ijatúa imbareteiterei, henonderãme opavavete okyhyje ichugui.

23Hye ro’o jepe hatã hiérroicha ha ndoku’éi.

24Ipy’a hatã itáicha, imbarete pe molíno ita iguypeguáicha.

25Ha’e opu’ã ramo ipy’aguasuetevéva jepe oñemondyipa ha ipy’amano.

26Kyse puku, hu’y ha yvyra akua puku ndojapói mba’eve hese.

27Ichupe g̃uarã pe hiérro ojogua kapi’ípe ha pe brónce ojogua yvyra tujukuépe.

28Pe hu’y nomokañýi ichupe; umi itaguasu ojejapíva hese kapi’íchante ichupe g̃uarã.

29Oñenupãrõ ichupe yvyra poguasúpe oñandúnte oñenupãrõ guáicha ichupe kapi’ípe, ha yvyra puku akua rehe opukánte.

30Hye guýpe ipire atã ha hakua, ha ohasa rire tuju rupi ojogua umi ñemitỹhárape omono’õ haguépe imáquinape (trilladéra).

31Pe y yguasu pegua ha’e ombopupu ku y oĩva japepo peguáicha.

32Ho’yta haguépe pe y ryjúi imorotĩmba.

33Yvy apére ndaipóri peichagua mymba, ha’e ndokyhyjéi mba’evégui.

34Ha’e oñembohory opaite ambue mymba rehe, ha’e voi ningo mayma mymba ñarõ ruvichaguasu.