Salmokuéra 22 - Biblia en Guaraní - ?anderuete ?e’? Por? 2015

Peteĩ jepy’apy vai rehegua sapukái - David purahéi

1Che Ruete, che Jára, mba’érehe piko chereja reíra’e. Mba’érehe piko remomombyryete chehegui ne ñepytyvõ porã ha che mba’ejerure asy opa rei.

2Che Ruete, arakuépe amba’ejerure asy ha Nde nachembohováiri, ha pyharekuépe ndaikatúi apytu’u.

3Nde reko porãite ningo, ne rendápe Israelguakuéra omog̃uahẽ ipuraheikuéra nembotuicha hag̃ua.

4Jeroviapópe ore rukuéra nera’ãrõ, ha Nde reguenohẽva’ekue ichupekuéra ijejopy vaígui.

5Ha’ekuéra omba’ejerure asyva’ekue ndéve ha Nde reipytyvõ porã ichupekuéra, ha ojerovia haguére nderehe natekotevẽi otĩ hikuái.

6Che katu peteĩ ysónte, che ndaha’evéima mba’eve. Ambuekuéra oñembohorýnte ha opukánte cherehe.

7Oimeraẽva cherecháva oñembohory cherehe, oñembojuru puku hikuái ha oñemoakãmbovavávo he’i hikuái:

8Ha’e voi oñemoĩma Ñanderuete pópe, Ha’e toipytyvõ avei ichupe ha toipe’a ichupe ijejopy vaígui, ojerovia haguére hese.

9Ha Nde voi cherenohẽva’ekue che sy ryégui, ha chejokova’ekue kyhyje’ỹme che sy pyti’a rehe aikove guive.

10Aiko guive ko yvy apére aikotevẽ nderehe, che sy rye guive Nde voi ningo che Jarateetéva.

11Ani reñemomombyryvétei chehegui, hi’ag̃uietégui che jejopy vai ha ndaipóri ambue che pytyvõhára.

12Heta tóro iñarõva ojere cherehe, umi tóro imbaretéva Basan pegua chemongorapa.

13Ojurupe’a hikuái ku leõ okororõvaicha.

14Aiko ku y oñeñohẽ háicha, opaite che kanguekuéra ojehekyipa, che py’apy ha’ete ku araitýicha, hyku ohóvo che ryepýpe.

15Ku kambuchi pehẽnguéicha ikã che mbarete, ha che kũ oja che apekũ rehe, ha Nde chemoĩ umi omanómava yvy timbokuápe.

16Jaguakuéra oĩ che jerekuévo, kuimba’e cherayhu’ỹva ojerepa cherehe, tekove ñañáva aty chemongora leõnguéraicha, Nde chemoñeno ñemano yvy timbópe.

17Aipapakuaa che kanguekuéra ha upejave oma’ẽ hikuái ha ojesareko cherehe.

18Oñomboja’opa hikuái che aokuéra rehe, ha che ao rehe oity hikuái po’a oiporavo hag̃ua mávapa ijararã.

19Ha Nde, che Ruete, ani reñemomombyryvétei chehegui, Nde chemombaretekuaánte, pya’éna chepytyvõ.

20Eguenohẽmína che ánga ikyse pukúgui, ha chepe’ami ko’ã jagua ñarõgui,

21ko’ã leõ jurúgui ha umi tóro saite ratĩgui.

22Upéramo amombe’úta nde réra che ryvykuérape ha romomba’eguasúta umi heko potĩva atýpe.

23Peẽ pekyhyjéva Ñanderuetégui, pemomba’eguasúke ichupe, pembotuichákena héra peẽ mayma Israel ñemoñarenguéra, ha peñemomirĩ henondépe, opaite peẽ Israel ñemoñarenguéra.

24Ñanderuete ndopoíri upe ojepy’apy asývagui ha nomotĩmo’ãi ichupe, ha ichugui nomokañýi hova, ohendu uvei pe omba’ejerure asývape.

25Che romomba’eguasúta atyguasúpe, che ñe’ẽ ame’ẽva’ekue ajapóta avei, ohecha hag̃ua umi nderehe ojeroviáva.

26Imboriahúva okarúta hyg̃uatãmba peve, umi ohekáva ichupe omomba’eguasúta ichupe, upévare hekove arakuéra ipukuvéta.

27Oikovéva guive imandu’a joáta ha oupa jevýta Ñanderuete rendápe ha opaite tetãnguéra yvy paha guive oúta omomba’eguasu hag̃ua ichupe.

28Ñanderuete voi ningo ko yvy ruvicha guasu ha Ha’e oisãmbyhy tetãnguérape.

29Umi mba’eita oguerekóva ojeitýta yvýre, henondépente oñesũ joáta, opavave oñenóta yvy timbópe, hi’angakuéra ijehegui ndaikatúigui oikove.

30Iñemoñarenguéra omomba’eguasúta ichupe, oikuaaukáta Ñanderuete réra ita’yrarãnguéra peve.

31Ha’ekuéra ouva’erã ha omombe’u jevýta ijustícia iñemoñarenguérape ha oikuaáta hikuái Ha’e voi ojapopa hague.