Provérbios 29 - Biblia en Guaraní - ?anderuete ?e’? Por? 2015

1Pe tapicha omboykéva opaite tekombo’e oñemohatãve ohóvo, oñehundiva’erã katuete.

2Umi heko potĩva oisãmbyhy oñemboheko porã aja hetãyguakuéra hory, ha pe iñaña rekóva oisãmbyhy oñembohetahetávo, hetãyguakuéra ipyahẽ asy.

3Pe kuimba’e ohayhúva arandu ombohory itúvape, ha upe oikóva kuña vai rapykuéri katu ohundipa imba’erepyeta.

4Pe tetã ruvicha heko potĩ rupi omombarete hetãme, ha upe ojerure rurevéva (impuésto) ombyai hetãme.

5Upe ombojuruhe’ẽva hapichápe, ombosako’i ñuhã haperãme.

6Pe tekove ñaña rapépe oĩ heta ñuhã; ha pe heko potĩva katu opurahéi ha ovy’ava’erã hape rehe.

7Pe heko potĩva oheka teko porã imboriahúvape g̃uarã, ha pe iñañáva katu omboyke pe justícia.

8Umi tapicha heko ñembohorýva ohatapyña hetãyguakuéra pochy rendy, ha umi iñarandúva katu ombogue ipochy.

9Peteĩ iñarandúva ohekombo’ese ramo peteĩ ivýrovape, kóa ipochýta ha opukáta, ndaipy’aguapymo’ãi.

10Umi tekove vai oñohẽva hapicha ruguy ndaija’éi pe heko potĩva rehe, ha umi heko porãva katu oipytyvõ umi heko potĩvape.

11Pe ivýrova ojorapaite ipochy, ha pe iñarandúva katu oñeha’ã ombopy’aguapy hag̃ua ichupe.

12Peteĩ tetã sãmbyhyhára ojapysaka ramo pe ñe’ẽ japu rehe, hembiguaikuéra iñañambava’erã.

13Pe imboriahúva ha oporojopýva oiko Ñanderuete poguýpe, Ha’e ningo mokõivéva apohare.

14Pe tetã ruvicha ombojovakéva hekoitépe avei imboriahúvape, iguapyhaguasu oñemoĩ hatãva’erã ha’e oikove aja.

15Pe jehavira ha tekombo’e ome’ẽ arandu, ha oñeme’ẽrõ peteĩ mitãrusúpe ha’e oipotáva guive ha’e omotĩva’erã katuete isýpe.

16Hetavérõ iñañáva, hetaveva’erã avei tembiapo vai, umi heko potĩva katu ohechava’erã ha’ekuéra oñehunditaha.

17Ehekombo’e porãke nde ra’ýpe ijejavýgui, ha nembopy’aguapýta, ha ha’e ombohorýta ne ánga.

18Pe tetã ojehechauka’ỹháme Ñanderuete rembipota techapáy (vision) rupi, upépe oñembohetave ohóvo teko ñaña, umi heko potĩva iñe’ẽrendúva Ñanderuete rembipotápe katu ovy’ava’erã.

19Peteĩ tembiguái ndopoimo’ãi hembiapo vaígui, oñeñe’ẽnte ramo ichupe, ohendu porã ramojepe, ndopoiséi hembiapo vaígui.

20Rehecha ramo peteĩ tapicha oñe’ẽ hetaitereíva opensa porã’ỹre, naipohãmo’ãi, ipohãve katu peteĩ ivýrovape g̃uarã.

21Pe jára omokunu’ũva hembiguáipe imitãmi guive, amo ipahápe ha’e oñemoĩta hese.

22Pe tapicha ipochy reíva omopu’ã ñorãirõ, ha pe ipochyetereíva katu heta jevyve oñemohembiapo vai.

23Pe tapicha oñembotuicháva oñemotĩva’erã ha pe ánga oñemomirĩva oñembotuichava’erã.

24Pe omoirũva mondahápe ndohayhúi hi’ánga, ohendu hembiapo vairã ha ndikatúi he’i mba’eve.

25Upe okyhyjéva yvyariguakuéragui ho’ava’erã ñuhãme ha Ñanderuete rehe ojeroviáva oñemoĩ porãva’erã.

26Hetahína umi ohekáva mburuvichakuéra ñepytyvõ, Ñanderuetégui katu ouhína pe pytyvõ añeteguáva.

27Umi heko potĩvape g̃uarã umi tapicha iñañáva ombojeguaru, ha umi iñañáva ndohayhúi umi heko potĩvape.