Matéo 12 - Biblia en Guaraní - ?anderuete ?e’? Por? 2015

Hesu remimbo’ekuéra omono’õmi trígo sábado

árape

1Umi árape Hesu ohasa ohóvo sábado árape peteĩ kokue rupi. Ha hemimbo’ekuéra iñembyahýigui oñepyrũ oipo’o po’omi umi hára ho’umi hag̃ua.

2Ha umi fariséo ohechávo péva he’i: Péina ne remimbo’ekuéra ojapo upe ojejapo’ỹva’erãva sábado árape.

3Hesu katu he’i ichupekuéra: Ndapeikuaái piko pe ojehaíva Ñanderuete kuatiañe’ẽme, David ha iñirũnguéra iñembyahýi ramoguare.

4Mba’éichapa oikeva’ekue Ñanderuete rógape ha ho’u pe pan oñemboykeva’ekue Ñanderuetépe ha ndaikatuiva’ekue ha’e ni iñirũnguéra ho’u, pa’ikuéramante ho’uva’erãva.

5Térãpa ndapeikuaái ojehaiha Moises rembiapoukapýpe pa’ikuéra omba’apo ramo jepe sábado árape Ñanderuete rogaguasúpe, upeichavérõ noñemo’angaipái hikuái, (Números 28, 9).

6Ha Che ningo ha’e peẽme: Peikuaa porãke, ko’ápe oĩ mba’eguasuetevéva (Hesu Crísto voi) Ñanderuete rogaguasúgui.

7Peẽ peikuaa rire mba’épa he’ise aipota poriahuvereko ha ndaha’éi tymba rekovekue kuave’ẽmby ramo, peẽ ndapejukaukaiva’erãmo’ã umi heko porãvape.

8Pe yvyarigua Ra’y ningo pe sábado Jára voi.

Kuimba’e ipo ypíva

9Hesu oho rire upégui, oike ambue Ñanderuete rógape,

10ha upépe oĩ peteĩ kuimba’e ipo ypíva; ha fariseokuéra oñe’ẽvai hag̃ua Hesu rehe, oporandu hikuái Hesúpe: Ikatúpa ñaporomonguera sábado árape.

11Ha Ha’e he’i ichupekuéra: Mávapa peẽkuérava oguereko ramo peteĩ ovecha ha péva ho’a ramo sábado árape yvykuápe, noñeha’ãmo’ãipa oguenohẽ hag̃ua upégui.

12Ha peteĩ kuimba’e ningo mba’eguasuve peteĩ ovechágui. Upéicharamo ningo ikatu ojejapo tembiapo porã sábado árape.

13Upévo Hesu he’i pe kuimba’épe: Eipyso nde po; ha ha’e oipysóvo ipo opyta hesãi ambuéicha.

14Ha umi fariséo osẽvo upégui oñemongeta hikuái oñemoĩ hag̃ua Hesu rehe ha ojuka hag̃ua ichupe.

Pe proféta

Isaías oñe’ẽ Hesu rehe

15Ha Hesu katu oikuaávo upéva, oho upégui. Ha heta tapichakuéra oho hapykuéri, Ha’e omonguera opaite hasývape.

16Ha ojerure asy ichupekuéra ani hag̃ua oikuaauka hembiapo porã;

17oiko hag̃ua pe proféta Isaías ñe’ẽngue:

18Pema’ẽ porãke che rembiguái aiporavova’ekue rehe, Ha’e ningo pe che ahayhúva, ha ombohorýva che ánga; che Pytu Yvága pegua amoĩ hi’ári, ha tetã ambueyguakuérape oikuaaukáta pe teko porã (justícia).

19Ha’e noñorãirõmo’ãi, ndosapukaimo’ãi, avave nohendumo’ãi iñe’ẽ tape rupi,

20ndojokamo’ãi pe takuára otiríva, ha nomboguemo’ãi pe tataindy inimbo hatatĩva, Ñanderuete rembipota ojejapopa peve, ha oñembojovakepa peve hekoitépe;

21ha tetã ambueyguakuéra oha’ãrõ joava’erã Hesúpe, (Isaías 42,1-4).

Pe angaipa ituichavéva

22Upéramo ojegueru ichupe peteĩ kuimba’e oikóva mba’epochy poguýpe, ha’e hesatũ ha iñe’ẽngu; ha Hesu omonguera rire pe iñe’ẽngúvape ha’e oñepyrũ oñe’ẽ ha ohecha jevy.

23Ha umi yvyariguakuéra ijurujaipa ha he’i: Ndaha’eichénepa kóva David Ra’y.

24Umi fariséo katu ohendúvo péva oñe’ẽngururu joa ha he’i: Kóva ningo omosẽ umi mba’epochýpe huvicha Beelzebu rupínte.

25Ha Hesu oikuaágui ipy’apýpe oĩva, he’i: Umi tetã opu’ãva ha oiko vaíva ojoapytépe itapereva’erã, ha opaite táva térã óga opu’ãmbáva ojuehe ndahi’aremo’ãi.

26Ha Satana omosẽ ramo Satanáme, ijehe voi opu’ãta, ha mba’éicha piko péicha ramo ikatúta Ha’e oisãmbyhy are.

27Ha che amosẽ ramo pe mba’epochýpe Beelzebu rupi, máva rupípa péicharõ pene remimbo’ekuéra omosẽ mba’epochykuérape. Upévare ha’ekuéra oikóta pene mbojovakehararã ramo.

28Ha Che amosẽ ramo mba’epochykuérape Ñanderuete Pytu Porãitéva rupi, añetehápe Ñanderuete yvága pegua retãguasu og̃uahẽma pene rendápe.

29Ha mba’éichapa peteĩ mondaha ikatu oike pe ipy’aguasúva rógape omonda hag̃ua imba’erepyeta, oñapytĩ raẽ’ỹre ichupe, uperire ae katu oguerahakuaa oĩva hógape.

30Upe chendive oĩ’ỹva oñemoĩ cherehe, ha chendive ombyaty’ỹva katu omosarambi.

31Upévare Che ha’e peẽme: Opaichagua angaipa ha ñe’ẽ japu vai oñeperdonáta tetãyguakuérape; pe ñe’ẽ japu vai oje’éva pe Pytu Porãmbáva rehe katu noñeperdonamo’ãi araka’eve.

32Oimeraẽ iñe’ẽ japu reíva yvyarigua Ra’y rehe oñeperdonáta; upe iñe’ẽ japu reíva pe Pytu Porãmbáva rehe katu noñeperdonamo’ãi ko ára atyguasúpe ni ambue ára atyguasukuéra oútavape.

33Upévare pe yvyra iporã ramo, hi’a porãva’erã; ha pe yvyra vai hi’a vaiva’erã; hi’a rupi ningo ojekuaa pe yvyra.

34Peẽ mbói ñemoñare. Mba’éichapa peñe’ẽkuaáta mba’eporã, peẽ peneñaña ramo. Umi mba’e omyenyhẽva ñande py’apy, umíva katuete osẽ jevy ñande jurúgui.

35Pe kuimba’e ipy’a porãva ningo oguenohẽ ipy’apy porãgui mba’eporã, ha pe kuimba’e ñaña katu oguenohẽ ipy’apy vaígui mba’evai.

36Ha Che ha’e peẽme opaichagua ñe’ẽ rei yvyariguakuéra he’íva guive, Ñanderuete ohepyme’ẽva’erã ichupe upe ñembojovakeha árape.

37Ne ñe’ẽ rupi rejeguerekóta heko potĩva ramo, térã ne ñe’ẽ rupi rehóta aña retãme.

Hesu oñe’ẽ pohýi hetãyguakuéra rehe

38Umi kuatia haihára ha fariseokuéra ombohovái ichupe ha he’i: Nde, mbo’ehára, ore rohechase techaukaha (señal) rejapóva nde po rupi.

39Ha Hesu he’i ichupekuéra: Peẽ ñemoñare ñaña ha peguata okárava piko pehechase techaukaha, mba’eveichagua techaukaha noñeme’ẽmo’ãi peẽme, pe proféta Jonas rehegua techaukahámante.

40Jonas oĩ haguéicha mbohapy ára ha mbohapy pyhare pukukue pe mymba ndetuicháva ryépe, péicha avei yvyarigua Ra’y opytáta mbohapy ára ha mbohapy pyhare pukukue yvy guýpe.

41Niniveyguakuéra oñemoĩva’erã mbojovakeha árape ko’ã ñemoñare ko’ãva rehe ha ocondenáta ichupekuéra, ha’ekuéra oñembyasýgui hi’angaipakuéragui Jonas ñe’ẽ rupi. Ha péina ápe oĩ mba’eguasuvéva Jonásgui (Hesu Crísto voi).

42Pe kuñakarai, tetã ruvichaguasu yvy gotyogua, oñemoĩva’erã mbojovakeha árape ko’ã ñemoñare ko’ãva rehe, ha ocondenáta avei ichupekuéra. Ha’e ou haguére yvy apýra paha guive ohendu hag̃ua Salomon ñe’ẽ arandu, ha ko’ápe oĩ mba’eguasuvéva Salomóngui.

43Pe mba’epochy osẽ ramo yvyarigua retégui, oiko umi tenda ikãha rupi pytu’u rekávo, ha ndojohúi,

44upévare he’i: Aha jevýta che rogakuépe, asẽ haguégui. Ha oho jevy ojohu hogakue nandi, ojetypeipa porã ha oñemoporãmbapyre.

45Upérõ oho ha ogueruve hendive ambue 7 mba’epochy iñañavéva ichugui, ha oike ha opyta oiko hag̃ua hikuái ipype; ha pe kuimba’e reko ou iñañave iñepyrũmbyguarégui. Upéicha ojehúta avei ko’ã ñemoñare ñaña vaiete apytépe.

Hesu sy ha ityvyrakuéra ou hendápe

46Oñe’ẽ jave hína Hesu hetãyguakuérape, og̃uahẽ isy ha ityvyrakuéra, ha oñe’ẽse hikuái hendive okápe.

47Ha peteĩ he’i ichupe: Ma’ẽ, nde sy ha nde ryvykuéra oime okápe ha oñe’ẽse nendive hikuái.

48Ha Ha’e ombohovái imomaranduharépe, he’ívo: Máva piko che sy ha che ryvykuéra.

49Ha ikuãme ohechauka hemimbo’ekuérare, ha he’i: Na’ápe che sy ha che ryvykuéra.

50Oimeraẽ ojapóva che Ruete yvága pegua rembipota, upéva ningo che ryvy, che reindy ha che sy.