Daniel 1 - Biblia en Guaraní - ?anderuete ?e’? Por? 2015

Daniel ha iñirũnguéra Babilónia retãme

1Joacim, Juda retã ruvicha, oisãmbyhyhína jave mbohapy áño, ou Nabucodonosor, Babilónia retã ruvicha, omongora hag̃ua Jerusalen táva.

2Ha Ñanderuete omoĩ Nabucodonosor pópe Joacim, Juda retã ruvichápe, heta Ñanderuete rogaguasu rembiporu reheve; ha umía Nabucodonosor ogueraha Babilóniape, ijára tupãópe, oñeñongatuhápe avei imba’erepyeta.

3Ha Nabucodonosor he’i Aspenaz, hembiguaiguasúpe, peteĩ oñekytĩ’oiteva’ekuépe (eunúco), oiporavo hag̃ua Israel tríbu apytégui hetã ruvicha ha mburuvicha ra’ykuérape,

4umi karia’y hesãi ha iporãva, iñarandu, iñakã porã ha ikatupyrýva omba’apo hag̃ua chéve che rogaguasúpe; ha toñembo’e ichupekuéra oñe’ẽ ha ohaikuaa hag̃ua Caldeaygua ñe’ẽme.

5Pe tetã ruvicha ome’ẽuka ichupekuéra pe tembi’u ha víno ha’e ho’úva avei; ha he’iuka tojehekombo’e ichupekuéra mbohapy áño pukukue, ha uperire ogueru hag̃ua ichupekuéra tetã ruvicha renondépe hembiguairãnguéra ramo.

6Upéicha ojeporavo avei Judaygua apytégui: Daniel, Ananías, Misael ha Azarías.

7Ko’ãvape Nabucodonosor rembiguaiguasu ome’ẽ téra pyahu: Daniélpe, ombohéra Beltsasar; Ananíaspe, Sadrac; Misaélpe, Mesac; ha Azaríaspe, Abed-nego.

8Daniel katu noñemongy’aséi pe tembi’u ha pe víno tetã ruvicha ome’ẽva ho’u hag̃uágui, upévagui ojerure Aspenázpe anítei ha’e ojopy ichupe ha iñirũnguérape ani hag̃ua oñemongy’a pe tembi’u pévarupi,

9ha Ñanderuete ombopy’a porãite Aspenázpe, Daniel ndive g̃uarã.

10Ha Aspenaz he’i Daniélpe: Che akyhyje tetã ruvichágui, ha’e voi ome’ẽukava’ekue peẽme pene rembi’urã ha pe víno imeságui; ág̃a ha’e ohechávo pende rova hesa’yjuveha pende rapichakuéragui, peẽ voi cheakã’oukáta tetã ruvicha renondépe.

11Upémaramo Daniel he’i Melsárpe, kóvape Aspenaz omoĩ oñangareko hag̃ua Daniel, Ananías, Misael ha Azarías rehe.

12Ajerure ndéve reha’ã hag̃ua ne rembiguaikuéra rehe 10 ára pukukue, ha toñeme’ẽ oréve koga’ánte ro’u hag̃ua ha y roy’u hag̃ua.

13Upéi embojoja ore rova umi ambue mitãrusu rováre, ho’úva tetã ruvicha rembi’u, ha upéi ejapo ne rembiguaikuéra rehe nde rejaposéva.

14Ha ha’e omoneĩ ichupekuéra ko’ã mba’épe, ha omongaru ichupekuéra 10 ára aja, ha’ekuéra ojerure hagueichaite.

15Ha 10 ára haguépe hovakuéra hesãi ha iporãve umi ambue mitãrusúgui, ho’úva tetã ruvicha rembi’úgui.

16Upémaramo Melsar ogueraha jevy pe tembi’u ha pe víno ojegueruva’ekue ho’u hag̃ua hikuái, ha ome’ẽ ichupekuéra koga’a ha ýnte.

17Ñanderuete voi omoarandu ko’ã irundy karia’ýpe ha ome’ẽ akã porã opaichagua arandúpe; Daniélpe omoarandu avei oikuaa hag̃ua mba’épa he’ise umi kuimba’e térã kuña ohecháva iképe térã ojehechaukáva payetépe.

18Ha og̃uahẽvo pe ára Nabucodonosor he’i hague, Aspenaz ogueraha ichupekuéra tetã ruvicha rendápe.

19Ha pe tetã ruvicha oñe’ẽ hendivekuéra, ha opaite karia’y apytégui ndojejohúi ambue ikatúva oñembojoja Daniel, Ananías, Misael ha Azarías rehe; upévare opyta hikuái tetã ruvicha Nabucodonosor rembiguái ramo.

20Opaichagua mba’épe pe tetã ruvicha omba’eporandúva guive ichupekuéra, ha’ekuéra oikuaa ha ha’e ojohu iñaranduveha hikuái 10 jevyve (vecesve) opavave Babilónia karai iñaranduvéva ha ipaje apoharakuéragui.

21Daniel opyta tetã ruvicha rógape, Círo oisãmbyhy aja peteĩ áño.