1 Réyes 12 - Biblia en Guaraní - ?anderuete ?e’? Por? 2015

Israel tríbu oñemoĩ Roboam rehe

1Roboam oho Siquémpe, Israelguakuéra oupágui upépe oiporavo hag̃ua ichupe tetã ruvicha ramo.

2Ha Jeroboam, Nebat ra’y, ohendúvo péva, oĩ gueteri Egíptope, okañy haguépe Salomón renondégui, ha ojevy avei,

3oñehenóigui ichupe. Ha Jeroboam ha Israelguakuéra oñe’ẽ Roboámpe he’ívo:

4Nde ru ombopohýi ore rekove, nde katu embovevuive ko’ág̃a oréve michĩmi ko tembiguái rembiapo ratã nde ru omoĩva’ekue oreári, ha roikóta ne rembiguáirõ.

5Ha ha’e he’i ichupekuéra: Tapeho peju jevy che rendápe mbohapy ára haguépe, ha tetãyguakuéra ohopa.

6Upémaramo tetã ruvicha Roboam oporandu umi karai ancianokuéra oikova’ekuépe itúva Salomón renondépe, ha’e oikovérõ guare, ha he’i ichupekuéra: Mba’éichapa peẽ cherekombo’e añe’ẽ jevy hag̃ua ko’ã tetãyguápe.

7Ha’ekuéra ombohovái ichupe: Eñe’ẽ porã hendivekuéra ha neñe’ẽrendu ramo ko árape ko’ã tetã rembiguái ñe’ẽ ha rejapo ramo hembipota, ha’ekuéra oikóta ne rembiguái ramo opaite árape.

8Ha’e katu omboyke ko’ã karai ancianokuéra rekombo’epy ha ojehekombo’euka karia’ykuérape okakuaava’ekue hendive, ha oikóva ipytyvõhára ramo.

9Ha he’i ichupekuéra: Mba’éichapa peẽ cherekombo’e, añe’ẽ jevy hag̃ua ko’ã tetãyguápe, oñe’ẽva’ekue chéve ha he’i hikuái: Embovevúi oréve michĩmi pe cárga pohýi nde ru omoĩva’ekue oreári.

10Upéramo umi mitãrusu okakuaamava’ekue hendive he’i ichupe: Péicha reñe’ẽva’erã ko’ã tetãyguápe he’iva’ekue ndéve: Nde ru ombopohýi oréve opaite mba’e nde katu embovevuive oréve: Che kuã michĩvéva ipoguasuve che ru ku’águi;

11peikuaa porãke che ru omoĩ ramo pende ári cangálla ipohýiva, che katu ambojo’áta peẽme pende cárga, che ru penenupã tukumbópe, che poinupãukáta tukumbo alacran ruguái akuápe.

12Pe ára mbohapyhápe Jeroboam hetãyguakuéra ndive ou jevy Roboam rendápe, ha’e he’i haguéicha ichupe he’i jevy.

13Ha tetã ruvicha Roboam ombohovái pohyieterei hetãyguakuérape, omboykévo umi karai anciáno rekombo’e.

14Ha ha’e ombohovái hetãyguakuérape umi karia’ykuéra ohekombo’e haguéicha ichupe, ha he’i: Che ru ombopohýi ramo pende cárga, che katu ambojo’avéta pende cárga, che ru penenupã tukumbópe, che katu poinupãta tukumbo alacran ruguái akuápe.

15Upéicha tetã ruvicha ndojaposéi hetãyguakuéra rembipota, Ñanderuete voi omoĩgui ko’ã mba’e ipy’apýpe, oiko hag̃ua iñe’ẽ he’imava’ekue Ahías, Silogua juru rupi, Jeroboam, Nebat ra’ýpe.

16Israelguakuéra ohechávo tetã ruvicha ndojaposeiha hembipota ombohovái Roboámpe he’ívo: Ma’erãpa ñamoirũta Davídpe, ore ndoroguerekói Isai ra’y ndive ore mba’erã. Israelguakuéra, jaha ñande rógape. David toñangareko Juda tríbu rehénte. Upémaramo Israelguakuéra ohopa hógape.

17Upeguive Roboam oisãmbyhy Juda retãmente.

18Ha tetã ruvicha Roboam omondo Adorámpe, omoakãva opaite Salomón rembiguaikuérape, ambue Israelguakuéra rendápe, ha’ekuéra katu ojuka ichupe itápe. Upémaramo tetã ruvicha Roboam pya’ete ojupi icárrope okañy hag̃ua Jerusalénpe.

19Péicha Israel ojehekýi David rógagui ko ára peve.

20Ha Israelguakuéra ohendúvo Jeroboam ou jevýma hague, ohenoiuka ichupe ijatyhápe, ha omoĩ ichupe hikuái Israel retã ruvicha ramo, 10 Israel tribukuéra ári, ha avave ndohói David róga rapykuéri, Juda tríbu añoiténte.

21Ha Roboam oúvo Jerusalénpe, ombyaty Juda ha Benjamin tribukuéragui 180.000 kuimba’e iporavopyre ha oñorãirõ porãkuaáva, ojeity hag̃uáicha ambue Israel tribukuéra ári; Roboam, Salomon ra’y, oisãmbyhységui opaite Israel tribukuéra ári.

22Ha Ñanderuete oñe’ẽ Semaías, hembiguaiteépe, ha he’i:

23Eñe’ẽ Roboam, Salomón ra’ýpe, oikóva Juda retã ruvicha ramo, ha opaite Juda ha Benjamin tribukuérape, ha ambue tetãyguápe (oikóva Juda yvýpe) ha ere,

24péicha he’i pende Ruete: Ani pehótei, ha ani peñorãirõtei pende ryke’ykuéra ndive, peteĩteĩva katu tapeho jevy pende rógape. Che voi ajapo ko’ã mba’e. Ha ohendu hikuái Ñanderuete ñe’ẽ, ha ojevy ha oho hikuái hógape Ñanderuete he’i haguéicha ichupekuéra.

Jeroboam angaipa

25Upéramo Jeroboam omyatyrõ jevy pe táva Siquem, oĩva Efrain cérrope, ha oiko ipype, ha upégui osẽ ha omyatyrõ Penuel.

26Ha Jeroboam he’i ipy’apýpe: Israelguakuéra ova jevýta David róga rehe,

27oho ramo oikuave’ẽ kuave’ẽmby ojehapypáva Ñanderuete rógape oĩva Jerusalénpe, Israelguakuéra py’a ohasa jevyva’erã ijára Roboam, Juda retã ruvicha ndive, ha chejukáta hikuái, ha omoirũ jevýta hikuái Roboam, Juda retã ruvichápe.

28Ha ojepy’amongeta rire ko’ã mba’e rehe, tetã ruvicha Jeroboam ojapo mokõi tóro ra’y ra’ãnga órogui, ha he’i hetãyguakuérape: Hetaitéma pejupi Jerusalénpe, péina ápe pende jára, pendegueruva’ekue Egípto retãgui.

29Ha peteĩ omoĩ Bet-élpe; ha ambue, Dánpe.

30Ha ko’ã mba’e rupi oñemoangaipa hikuái; hetãyguakuéra ohógui omomba’eguasu hag̃ua umi ta’ãnga Dan térã Betélpe.

31Omopu’ã avei óga yvy yvate ári, ha omoĩ ipype pa’i tetãygua apytégui ndaha’éiva Levi ñemoñare.

32Ha Jeroboam omboareteguasu avei pe jasy 8-hápe, pe ára 15-hápe Judayguakuéra omboarete háicha avei ha ha’e oikuave’ẽ pe kuave’ẽmby renda ári omopu’ãva’ekue Bet-élpe, umi tóro ra’ãngápe g̃uarã. Omoĩ avei pa’ikuéra Bet-élpe, umi yvy yvate ha’e omopu’ãva’ekuépe g̃uarã.

33Upéicha Jeroboam oikuave’ẽ pe kuave’ẽmby renda ári Bet-élpe pe ára 15-hápe, pe jasy 8-hápe, ha’e voi oiporavo ha oipotágui, ojapo vy’aguasu Israelguakuérape g̃uarã, ha ojupi pe kuave’ẽmby rendápe ohapy hag̃ua mba’e ryakuã porã.