Apostolkuéra 10 - Biblia en Guaraní - ?anderuete ?e’? Por? 2015

Pédro ha Cornélio

1Cesaréape oiko peteĩ Romaygua soldádo ruvicha, hérava Cornélio, ha ha’e oisãmbyhy 100 soldádo Róma peguápe hérava La Italiána.

2Cornélio ha opaite hogayguakuéra omomba’éva Ñanderuetépe ha oñemomirĩva henondépe, ha’e oipytyvõ mboriahukuérape ipirapire rupi ha oñembo’ehína Ñanderuetépe.

3Ha’e oñembo’e jave ka’aru mbyte rupi Ñanderuetépe, ojehechauka ichupe Ñanderuete ángel ha he’i ichupe: Cornélio.

4Ha Cornélio oma’ẽ hatãvo hese oporandu ichupe kyhyjepópe: Mba’e piko oime, che jára. Ha pe ángel ombohovái ichupe: Ne ñembo’e ha ne ñepytyvõ reme’ẽva mboriahukuérape ojupíma kuave’ẽmby ñemandu’a reheguáva ramo Ñanderuete renondépe.

5Upévare emondo kuimba’ekuéra Jópepe, ha ehenoiuka Simónpe, hérava avei Pédro.

6Ha’e ningo oiko mbohupa ramo Simon, tymba pire myatyrõhára rógape, opytáva yguasu rembe’ýpe.

7Ha oho rire pe ángel oñe’ẽva’ekue hendive, Cornélio ohenói mokõi hembiguáipe ha peteĩ soldádope, omomba’eguasúva avei Ñanderuetépe.

8Ha Cornélio omombe’upa rire, omondo ichupekuéra Jópepe.

9Ambue árape ha’ekuéra oguata aja ohóvo Jópepe ha oñemoag̃uívo pe távagui, Pédro ojupi pe óga ape ári oñembo’e hag̃ua, asaje pyte rupi.

10Ha Pédro iñembyahyiete ha okaruséma, ha ojejapo aja ichupe hembi’urã, ojehechauka ichupe techapáype, iképerõ guáicha (ko ta’ãnga kóva):

11Pédro ohecha pe yvága ojepe’árõ ha oñemboguejýrõ yvy peve peteĩ mba’e savanaichagua oñeñapytĩva irundyve ijapýragui,

12ha hyepýpe oĩ opaichagua mymba ipy irundýva ha mymba otyryrýva yvýre ha guyra árare ovevéva.

13Ha Pédro ohendu peteĩ oñe’ẽva ichupe he’ívo: Pédro epu’ã, ejuka ha he’u.

14Pédro katu ombohovái: Nahániri, che Jára, araka’eve che nda’úi gueteri koichagua mymba ro’o ipotĩ’ỹva, ha Ñanderuete omboykeukamava’ekue ndoje’úi hag̃ua (Moisés rembiapokapy rupi).

15Ha pe oñe’ẽva ichupe he’i: Umi mba’e pende Ruete omopotĩva’ekue rehe ani nde ere hese iky’aha.

16Opaite ko’ã mba’e ojehu mbohapy jevy, ha upéi ojehupi jevy umi mba’e yvága gotýo.

17Pédro opyta upérõ ipy’andýi, ha ndoikuaa porãi mba’épa he’ise ko’ã mba’e ojehechaukava’ekue ichupe. Upejave Cornélio remimboukuéra oporandu Simon rehe, ha og̃uahẽ pe tymba pire myatyrõhára róga rokẽme,

18ha oporandu hikuái oimépa ko’ápe peteĩ mbohupa Simon, hérava avei Pédro.

19Ha Pédro ojepy’amongeta aja gueteri pe ojehechaukava’ekue rehe, pe Pytu Porãmbáva he’i ichupe: Péinako, oĩ mbohapy kuimba’e oúva ndepiári.

20Epu’ã ha tereho hendivekuéra py’apeteĩ reheve, Che ningo ambou ichupekuéra ne rendápe.

21Upérõ Pédro oguejy umi kuimba’e rendápe ha he’i: Che ningo Pédro, peẽ pehekáva, ha ma’erã piko peju che rendápe.

22Ha ha’ekuéra he’i: Cornélio, peteĩ soldádo ruvicha, 100 soldádo ári, ore ruvicha, orembou ne rendápe, ha’e ningo peteĩ kuimba’e heko potĩva ha okyhyjéva Ñanderuetégui. Herakuã porãva opaite Judayguakuéra apytépe. Ñanderuete oñe’ẽ hendive peteĩ ángel rupi ha he’i nerenoiuka hag̃ua Cornélio rógape, ha’e ojapysaka hag̃ua ne ñe’ẽ rehe.

23Upérõ Pédro omog̃uahẽ ha ombohupa ichupekuéra. Ambue ko’ẽme katu opu’ã ha oho hendivekuéra, ha mbovymi hermáno Jopeyguáva omoirũ ichupe.

24Ha pe ára ambuépe oike hikuái Cesaréape, Cornélio katu oha’ãrõhína ichupekuéra, ha hendive igénte ha iñangirũnguéra ohenoiukamava’ekuépe Pédro ra’ãrõvo.

25Ha Pédro og̃uahẽvo Cornélio rógape, ha’e osẽ omomaitei hag̃ua ichupe ojeitývo ipy renondépe.

26Pédro katu omopu’ã ichupe ha he’i: Epu’ã, che ningo kuimba’e ndeichaguánte avei.

27Ha oñemongeta aja hendive oike ha ojohu heta oñembyatymava’ekue.

28Upérõ Pédro he’i ichupekuéra: Peẽ ningo peikuaa porã voi ndaijaiha Judayguakuérape oike hag̃ua tetã ambueygua rógape térã okaru hag̃ua hendivekuéra, opáichavo Ñanderuete ningo ohechaukáma chéve anive hag̃ua che amboyke avavépe térã ahechakuaa ipotĩ’ỹva ramo.

29Upévare peẽ cherenoiukávo pya’e aju amboykévo ore jepokuaa. Ha ko’ág̃a aikuaase ma’erãpa peẽ cherenoiukára’e.

30Upérõ Cornélio ombohovái: Ojapóma irundy ára che añembo’e jave aína che rógape ka’aru mbyte rupi oñemoĩ sapy’a peteĩ kuimba’e ijao mimbipáva che renondépe.

31Ha péva he’i chéve: Cornélio, ne ñembo’e ha ne ñepytyvõ reme’ẽva mboriahukuérape Ñanderuete ohendúma ha ohechapáma.

32Upévare emondo ne kuimba’ekuérape Jópepe ha ehenoiuka Simónpe, hérava avei Pédro, ha’e ningo oiko mbohupa ramo Simon rógape, peteĩ tymba pire myatyrõhára, oĩva yguasu rembe’ýpe.

33Upévare ningo pya’e rohenoiuka ha nde rejapo porã rejúvo. Ko’ág̃a roñembyatyroína Ñanderuete renondépe rohendu hag̃ua opaite mba’e Ha’e he’iukáva oréve ndérupi.

34Upérõ Pédro oñepyrũ oñe’ẽ ha he’i: Añetehápe ko’ág̃a ahechakuaa Ñanderuete nomboykeiha avavépe.

35Opaichagua tetãygua okyhyjéva guive ichugui ha oñemohembiapo porãva oguerohory ichupe.

36Ñanderuete ombouva’ekue iñe’ẽ porã Israelguakuérape Hesu Crísto rupi, Ha’e ningo opavave Jára voi.

37Peẽ ningo peikuaa voi umi mba’e ojehuva’ekue Judéa departaméntope, pe oñepyrũva’ekue Galiléa departaméntope Juan Bautísta bautísmo rupi.

38Ha mba’éichapa Ñanderuete omyenyhẽ Hesu Crístope Pytu Porãmbávagui ha pu’akágui, omonguera hag̃ua hasývape ha omosẽ mba’epochykuérape, opaite ko’ã mba’e ojehu Ñanderuete oĩgui Hesu Crísto ndive.

39Ha ore ningo opaite Hesu Crísto rembiapo rechahare voi, Ha’e ojapova’ekue Juda departaméntope ha Jerusalen távape, ha uperire ha’ekuéra omosãingo Hesúpe kurusúre.

40Ñanderuete katu omoingove jevy ichupe mbohapy ára haguépe ha oheja Ha’e ojehechauka hag̃ua oréve.

41Hesu Crísto ndojehechaukái opaite hetãyguakuérape, ore hechaharekuérapente, Ha’e oiporavo raẽva’ekue, ha rokaru ha roy’uva’ekue hendive, Ha’e oñemoingove rire omanova’ekue apytégui.

42Ha Ha’e oremondo romombe’u hag̃ua opaite tetãyguakuérape, Hesu Crísto ombojovaketaha umi oikovévape ha umi omanóvape, upevarã Itúva, Ñanderuete, oiporavomava’ekue ichupe.

43Opaite proféta oñe’ẽ hese ha he’i Ha’émante ikatuha oipe’a tetãyguakuéra tembiapo vaígui (angaipágui) ojeroviaite ramo Hesu Crísto rehe.

44Ha Pédro he’i jave gueteri ko’ã ñe’ẽ, opaite oñembyatýva ári ho’a pe Pytu Porãmbáva.

45Ha umi hermáno Judaygua ouva’ekue Pédro ndive ohecharamoite Ñanderuete ombouha avei pe Pytu Porãmbáva tetã ambueyguakuéra ári.

46Ha’ekuéra ohendúgui tetã ambueyguakuéra oñe’ẽha avei ambue ñe’ẽme, Pytu Porãmbáva pu’aka rupi, omomba’eguasúvo Ñanderuetépe, upévare Pédro he’i:

47Ikatúnepa rombotove (ronega) pe bautísmo ichupekuéra. Ichupekuéra oñeme’ẽma pe Pytu Porãmbáva, oñeme’ẽ haguéicha ñandéve (Israelguakuérape).

48Ha Pédro obautizauka ichupekuéra Hesu Crísto rérape. Upéi ha’ekuéra ojerure asy ichupe opytave hag̃ua hendivekuéra, mbovymi ára jepe.