Jeremías 23 - Biblia en Guaraní - ?anderuete ?e’? Por? 2015

Jeremías oñe’ẽ pohýi umi ombyaívape hetãme

1Cháke, he’iuka Ñanderuete, peẽ ovecha rerekua pembyai ha pemosarambíva che ovecha aty, che retãyguakuérape,

2upévarehe, Ñanderuete, Israel Jára he’i umi herekuakuérape, oñangarekóva che retã rehe: Peẽ pemosarambipa che ovechakuéra, pemondyipa ha napeñangareko porãi hesekuéra, upévare Che pohaviráta pene rembiapo vai haguére, he’iuka Ñanderuete.

3Ha Che voi ambyatýta che ovechakuéra hembýva opaite tetã amosarambi haguégui, ha umi hembýva guive aguerupa jevýta hetãteépe; ha’ekuéra okakuaa ha oñemboheta jevy hag̃ua.

4Che ahenóita ovecha rerekua oñangareko porãva’erã hesekuéra; ha ndokyhyjeveiva’erã hikuái, ndojepy’apyiva’erã ha noñembohoryveimava’erã hesekuéra, he’i pende Ruete.

5Pema’ẽ porãke, outamahína pe ára, he’i pende Ruete, amopu’ã jevýta Davídpe g̃uarã peteĩ iñemoñare pyahu heko potĩva ha iñarandúva, Ha’e oikóta tetã ruvicha ramo, ombovy’a jevypa hag̃ua ha hekoitépe ombojovakéta hetãyguakuérape.

6Hi’árape Juda ovy’áta ha Israel oikóta py’aguapýpe; ha oñembohérata ichupe ko téra kóva rupi: Ñanderuete, ñande justícia.

7Upévarehe peikuaa porãke outahína umi ára he’i pende Ruete ndoje’eveiva’erã: Ñanderuete pu’aka ogueruva’ekue Israel ñemoñarenguérape Egípto retãgui,

8oje’éta uvei: Ñanderuete pu’aka oguenohẽ ha ogueruva’ekue Israel ñemoñarenguérape tetã yvatégui, ha opaite umi tetã mamo oñemosarambi haguégui; oiko jevy hag̃ua hikuái ijyvyteépe.

Ñe’ẽ umi maranduhára japu rehe

9Ajepy’apy asyeterei ningo che py’apýpe umi proféta rehe ha che kangue oryryipa, oka’úvaicha aiko, ha apyta ku kuimba’e ho’ávaicha ho’u rire heta víno, péicha aĩ Ñanderuete renondépe ha iñe’ẽ heko pegua renondépe.

10Pe tetãpy henyhẽgui tapichakuéra oporombotavývagui, maldicion rupi pe tetã itaperepa; pe kapi’ity ñumegua ipirupa; oñeha’ãmba hikuái oiko vai hag̃ua ha omboyke pe justícia (tekojoja).

11Ñanderuete he’i: Umi proféta ha pa’ikuéra jepe iñañamba ha oiko vaipa che rogaguasúpe,

12upévarehe henonderãme opytáta ku tape isỹiete ha iñypytũvaicha; oñemyañáta ichupekuéra ho’a hag̃ua; Che voi aguerúta mba’evaietéva hi’arikuéra, ijehaviraha áñope, he’i pende Ruete.

13Ahecha ningo umi proféta Samária pegua omomarandu mba’evaiete Baal rérape, ha upéicha ombotavy che retã Israel peguápe.

14Ha umi proféta Jerusalen pegua ojapo avei mba’evaiete: Oporomyakã ratĩ hikuái, oporombotavy hikuái ha omombarete umi iñañávape heko vaípe, ani hag̃ua avave opoi heko ñañágui; ha’ekuéra ha hetãyguakuéra ojogua Sodóma ha Gomorrayguápe.

15Upévarehe, Che, Yvága Atykuéra Jára, ha’e umi proféta rehe: Peikuaa porãke, Che ha’ukáta ichupekuéra mba’ero, ha amboy’ukáta ichupekuéra pohã vai (ponzóña); umi proféta Jerusalen peguágui oñemosarambi voi pe teko ñañáme oñemyasãiva hetãpy rehe.

16Péicha he’i Ñanderuete, Yvága Atykuéra Jára: Peẽ Judaygua ani pehendu umi proféta omomarandúva peẽme; penembotavy ningo hikuái, omombe’u peẽme umi techapáy heñoiva’ekue ipy’apýpente, ha ndaha’éi pende Ruete jurúpe guare.

17Umi oñembohorýva pende Ruetére he’i hikuái: Ñanderuete he’i peguerekotaha py’aguapy; ha umi oñembopy’ahatãvape he’i hikuái: Ndoumo’ãi pendeári mba’eve ivaíva.

18Ha máva piko oikuaa pende Ruete py’apy, ha máva piko ohecha térã ohendu iñe’ẽ. Ha mávapa ojapysaka porãra’e iñe’ẽ rehe térã ohendúra’e ichupe.

19Upévagui pende Ruete pochy osẽta yvytu’atãicha; ha oipeju hatã jave ojeitýta umi iñañaitéva akã ári.

20Pende Ruete pochy noñemboykemo’ãi ojapopa peve ipy’apýpe oipotáva guive; ha og̃uahẽ vove umi ára peikuaa porãta, Che ha’éva guive ojehutaha avei.

21Umi proféta umívape Che namondoiva’ekue ha nañe’ẽiva’ekue ichupekuéra, ha’ekuéra katu oho oprofetiza ha oñe’ẽ gua’u che rérare.

22Ha’ekuéra oikuaa rire che py’apýpe oĩva oikuaaukava’erãmo’ã che ñe’ẽ che retãyguakuérape, ha ombojevy jeyva’erãmo’ã hape vaígui ha hembiapo vaikuégui.

23Che ningo pende Jára ohechapáva, hi’ag̃ui térã mombyry ramojepe, he’i pende Ruete.

24Oĩnepa okañykuaáva itakua pypukuetépe ahecha’ỹ hag̃ua ichupe. Che namyenyhẽi piko yvagakuéra ha pe yvy, he’i Yvága Atykuéra Jára.

25Che ahendupa umi proféta he’íva guive, pe japu omomarandúva che rérape, ha he’i hikuái: Ahecha che képe, ahecha che képe.

26Araka’e pevépa oikóta umi proféta japu ha oikuaaukáta ipy’apýgui heñóivante.

27Oñeha’ãmba ombyesarái hag̃ua che retãyguakuérape che réragui, upévagui omombe’u joa ojupe iképe ohechava’ekue, ituvakuéra hesarái haguéicha che réragui oiko hag̃ua Baal rapykuéri.

28Pe proféta ohecháva iképe, tomombe’u ike peguare ramo; ha che ñe’ẽ ame’ẽva’ekue, tomyasãi hekoitépe che ñe’ẽ ramo. Pe trígo ra’ỹi piko ojogua pe kapi’i pirúpe, he’i pende Ruete.

29Che ñe’ẽ ku tatáicha, he’i pende Ruete, ku martílloicha ojokáva ita.

30Upévarehe, Che apu’ã umi proféta rehe, he’i pende Ruete, oikónte omonda hag̃ua che ñe’ẽ hapichakuéragui.

31Peikuaa porãke, Che naimeiha umi proféta ndive, oiporu vaígui ijuru, he’i ramojepe: Ñanderuete péicha he’i.

32Peikuaa porãke, he’i pende Ruete, Che añemoĩta umi proféta rehe omombe’úva ike pegua ijapúvare, ombotavy hag̃ua che retãyguápe ijapu rupi ha ijuru he’ẽ rupi, Che katu namondói ni ndajokuáiri ichupekuéra; ha mba’evete iporãva ndojapói hikuái ko tetã kóva rehe, he’i pende Ruete.

33Ha pe tetã oporandu ramo ndéve, térã peteĩ proféta, térã peteĩ pa’i oikuaase ramo: Mba’épa he’ise Ñanderuete mba’e pohýi, nde eréta ichupekuéra: Peẽ voi pende Ruete mba’e pohýi, ha upévagui Che poitýta yvýre.

34Umi proféta ha umi pa’i térã tetãyguakuéra he’i reívape ko ñe’ẽ: Ñanderuete ñe’ẽ ipohýi. Che amboúta upe kuimba’e upévape ha hogayguakuérape jehavira ipohyietéva.

35Péicha pejeva’erã pene irũnguérape, ha oñopehẽnguekuéra ojoapytépe: Mba’épa ombohováira’e Ñanderuete, ha mba’épa he’iséra’e oréve Ñanderuete.

36Ha araka’evéma ndapejeveiva’erã: Ñanderuete ñe’ẽ ipohyiha; ha upeichavéramo jepe oiporúva ko ñe’ẽ kóva, Che voi aikóta ichupe g̃uarã mba’e pohýirõ, peẽ pemoambue haguére che ñe’ẽ ame’ẽva’ekue peẽme.

37Ha péicha nde eréta umi profétape: Mba’épa ombohovái ndéve Ñanderuete, ha mba’épa he’iséra’e Ñanderuete.

38Ha ombohovái ramo: Ñanderuete marandu ipohýi, upévarehe Ha’e péicha he’i: Peje haguére Ñanderuete ñe’ẽ ipohyiha, Che ha’euka rire peẽme anivéma peje pende Ruete ñe’ẽ ipohyiha,

39upévarehe Che poitýta tesaráipe, ha poipe’áta che ypýgui ha Jerusaléngui avei, ame’ẽmava’ekue peẽme ha pende rukuérape,

40ha amoĩta pendeári ñemotĩ ipohýiva opaite ára peve g̃uarã, anivéma hag̃ua penderesarái.