2 Crónicas 30 - Biblia en Guaraní - ?anderuete ?e’? Por? 2015

Ezequías omboarete pe páscua

1Upéi Ezequías oguerahauka opaite Juda ha Israel retãme, ha Efrain ha Manasesguápe peteĩ kuatiañe’ẽ ou hag̃ua Jerusalénpe Ñanderuete rogaguasúpe omboarete hag̃ua pe páscua Ñanderuete, Israel Járape g̃uarã.

2Ha tetã ruvicha oñomongeta mburuvichakuéra ndive ha mayma Jerusalénpe ijatýva ndive, omboarete hag̃ua pe páscua jasy mokõiha jave.

3Upejave ndaikatúigui omboarete hikuái, ndahetáigui pa’i oñemboheko potĩmbyréva, ha tetãyguakuéra noñembyatypáigui avei Jerusalénpe.

4Ko’ã mba’e oĩ porã tetã ruvichápe ha mayma ijatýva guivépe g̃uarã.

5Ha he’i hikuái oñemoherakuã hag̃ua avei opaite Israel retãme, Beerséba guive Dan peve, ou ha omboarete hag̃ua pe páscua Ñanderuete, Israel Járape g̃uarã Jerusalénpe, ojehai háicha Moises kuatiañe’ẽme; hetaiterei árama noñemboaretevéigui.

6Ha umi temimondo oho ogueraha hag̃ua tetã ruvicha ha mburuvichakuéra kuatiañe’ẽ opaite Israel ha Juda retãme, ha he’iuka ichupekuéra: Israel ñemoñarenguéra pejevy Ñanderuetépe, Abraham, Isaac ha Israel Járape, Ha’e ojere jevy hag̃ua avei hetãyguakuéra hembyva’ekue, Asíria retã ruvicha pógui.

7Ani peikótei pende rukuéra ha pende ryke’ykuéraicha opu’ãmava’ekue Ñanderuete, ituvakuéra Jára rehe, ha Ha’e opoi ichuguikuéra angekõi poguýpe, peẽ pehecha haichahína ko’ág̃a.

8Ani peñembohova’atãtei pende rukuéraicha; peñemoĩ uvei Ñanderuete poguýpe, ha peju hogaguasúpe, Ha’e oiporavova’ekue opaite ára peve; ha peiko Ñanderuete, pende Jára rembiguái ramo, ha ipochy ojeíta pendehegui.

9Pejevy ramo Ñanderuetépe, pende ryke’ykuéra ha pende ra’ykuéra ojohúta poriahuvereko umi mombyrygua ruvicha renondépe, oupa jevy hag̃ua ko yvy kóvape; Ñanderuete, pende Jára ipy’aporã, ha iporiahuvereko noñemboykemo’ãi pendehegui, peẽ pejevy ramo hendápe.

10Hemimondokuéra ohasa peteĩ távagui ambue távape, Efrain ha Manases yvy rupi, Zabulon peve, ha’ekuéra katu opuka ha oñembohory hesekuéra.

11Upeichavéramo jepe, oĩ mbovymi kuimba’ekuéra Asergua, Manasesgua ha Zabulongua ñemoñarenguéra apytégui oñemomirĩva ha ou Jerusalénpe.

12Juda ári katu oĩ Ñanderuete po ome’ẽva ichupekuéra peteĩchagua py’a ojapo hag̃ua tetã ruvicha ha mburuvichakuéra ñe’ẽ, Ñanderuete ñe’ẽ he’i háicha.

13Ha oñembyaty Jerusalénpe heta tapichakuéra omboarete hag̃ua pe areteguasu pan levadura’ỹre reheguáva, pe jasy mokõiháme; ha oiko aty ndetuicháva.

14Ha opu’ã hikuái oipe’apa hag̃ua umi ambue kuave’ẽmby renda oĩva Jerusalénpe; oipe’a avei pe kuave’ẽmby renda ojehapyhápe mba’e ryakuã porãva, ha oitypa hikuái Cedron ysyrýpe.

15Upéi oikuave’ẽ hikuái pe páscua, pe ára 14-hápe, pe jasy mokõiháme; ha umi pa’i ha Levigua otĩetereígui oñemboheko potĩ joa, ha ogueru kuave’ẽmby ojehapypava’erãva Ñanderuete rogaguasúpe.

16Ha oñemoĩ hikuái henda ha hi’árape ojepokuaa háicha, Moises, Ñanderuete rembiguái he’i haguéicha; ha umi pa’i ohypýi pe tuguy, ojapyhýva Leviguakuéra pógui.

17Ha oĩgui hetaiterei ijatýva apytépe oñemboheko potĩ’ỹva, upévagui Leviguakuéra oikuave’ẽ pe páscua umi oñemopotĩ’ỹva’ekue rehe, omboheko potĩ hag̃ua ichupekuéra Ñanderuetépe g̃uarã.

18Oĩgui hetaiterei Efrain, Manases, Isacar ha Zabulongua, noñembohekopotĩriva’ekue he’i háicha Moises kuatiañe’ẽme ha upéicha ho’u hikuái pe páscua. Ha Ezequías oñembo’e hesekuéra, he’ívo: Ore Ruete, Nde ndepy’aporã, eipytyvõmína opaite ombosako’iva’ekuépe ipy’akuéra ndereka hag̃ua.

19Ore Ruete, ore rukuéra Jára, jepémo noñembohekopotĩrira’e oñekotevẽ háicha oike hag̃ua Ñanderuete rogaguasúpe.

20Ha Ñanderuete ohendu Ezequíaspe, ha omonguera tetãyguakuérape.

21Péicha Israel ñemoñarenguéra oĩva Jerusalénpe omboarete avei vy’apópe pe areteguasu pan levadura’ỹre reheguáva 7 ára pukukue; ha upejave Leviguakuéra ha pa’ikuéra meme árape, opurahéi mba’epúpe Ñanderuetépe g̃uarã.

22Ha Ezequías oñe’ẽ mayma Leviguakuéra iñakã porãva ndive Ñanderuete rembiapópe. Ha ho’u hikuái umi oñekuave’ẽva’ekuégui pe areteguasúpe 7 ára aja, ha oñekuave’ẽvo ikuave’ẽmby py’aguapy reheguáva, omomba’eguasu Ñanderuete, ituvakuéra Járape.

23Ha mayma ijatýva guive he’i hikuái omboareteve hag̃ua pe areteguasu 7 arave; ha omboareteve hikuái vy’apópe ambue 7 ára.

24Pe tetã ruvicha Ezequías ome’ẽ umi ijatývape 1.000 tóro ra’yrusu ha 7.000 ovecha; ha umi mburuvicha avei ome’ẽ tetãyguakuérape 1.000 tóro ra’yrusu ha 10.000 ovecha; ha oĩ heta pa’ikuéra oñemboheko potĩmava’ekue.

25Ovy’a joa mayma Judaygua oñembyatýva, ha avei umi pa’i ha Leviguakuéra, ha opaite Israel retãgui oumava’ekue; upéicha avei umi tetã ambueygua ouva’ekue Israel retãme, ha umi oikóva Juda retãme.

26Ha péicha oiko vy’a tuichaitereíva Jerusalénpe; Salomon, David ra’y, tetã ruvicha Israélpe guare ára guive ndoikovéiva peichagua vy’aguasu Jerusalénpe.

27Upéi umi pa’i ha Levigua oñembo’y ohovasa hag̃ua hetãyguakuérape; ha iñe’ẽnguéra og̃uahẽ yvágape Ñanderuete heko porãitéva rendápe.