Isaías 62 - Biblia en Guaraní - ?anderuete ?e’? Por? 2015

1Jerusalen rayhupápe ndaikatúi akirirĩ ha ndaikatúi apytu’u oiko jevy peve ijapytépe justícia kuarahy rendýicha ha salvacion tata’ýicha.

2Upéramo tetãnguéra ohecha joáta nde reko iporãha ha opaite tetã ruvicha oma’ẽta ne rerakuã porã rehe ha Ñanderuete ome’ẽta ndéve téra pyahu, ijuru he’ítava.

3Ha reikóta Ñanderuete pópe tetã ruvicha akã jeguaka ramo ha tetãnguéra techaukaha ramo nde Jára pópe.

4Araka’evéma ndoje’eveimava’erã nderehe kuña ojepoíva, ha ne retã rehe ndoje’eveimava’erã oñemonadiva’ekue; reñembohérata katu che rembiguái, ha ne retãme che rembireko, Ñanderuete mborayhu oĩtagui ndepype, ha ne retã yvy katu oguerekótama iména.

5Peteĩ karia’y omenda háicha peteĩ kuñataĩ rehe, péicha nde apohare omendáta nderehe; ha pe ména ovy’a háicha hembireko ndive, péicha avei nde Jára ovy’áta nendive.

6Jerusalen, nde táva tápia yvate ári amoĩ umi mañahára (guárdia) oñangarekóva nderehe, ha’ekuéra ndaikatúi opytu’u ára ni pyharekuépe. Upéicha avei peẽ pejeroviáva Ñanderuete rehe, ani pepytu’útei,

7anítei pepytu’u pemopu’ãmba jevy peve Jerusalen, ha oñemyasãi porã jevy peve Jerusalen réra ko yvy tuichakuépe.

8Ñanderuete ome’ẽma iñe’ẽ ha omongu’e jave ipu’akaguasu he’i: Araka’eve name’ẽveiva’erã nde trígo nderayhu’ỹvape, hembi’urã ramo; ha nderehe ija’e’ỹvape neremboy’umo’ãi nde víno, nde remba’apo pohýigui nde parraltýpe.

9Imono’õhára voi ho’uva’erã, ha upévare omomba’eguasúta pende Ruetépe; ha umi ohykue’óva pe parral’a, ho’uva’erã avei ivíno che rogaguasu korapýpe.

10Pehasa hasa táva rokẽ rupi, pemopotĩ tetãygua rape; pembojoja joja pe tape, pemopotĩ itágui ha pemopu’ã poyviveve umi tetãme g̃uarã.

11Pema’ẽ porãke, Ñanderuete omyasãiukáma ko’ã mba’e yvy apýra paha peve ha peje Jerusalen tavayguakuérape: Péina ápe ouhína ndesalvátava, nde jopoirã reheve, ha ne rembiapokue repy oĩ hendive.

12Ha’ekuéra omboherava’erã Israélpe: Tetã heko potĩva, Ñanderuete ojoguamava’ekue; ha hérata: Táva Ha’e ohayhúva, Ñanderuete rekoha.