1 Corintoyguakuérape 16 - Biblia en Guaraní - ?anderuete ?e’? Por? 2015

Pe pirapire oñembyaty Hesu Crísto rehegua mboriahúvape g̃uarã

1Pe pirapire ambyatyuka haguéicha Galácia iglesiakuérape oñembohasa hag̃ua Jerusalen iglésiape pembyaty peẽ avei.

2 Cáda domíngope pembyatymi pende rógape pirapire, peteĩteĩ ikatúva peme’ẽ pehupity haguéicha ani hag̃ua peẽ peñepyrũ pemono’õ pe pirapire che ag̃uahẽ riréma.

3Ha ag̃uahẽvo pene rendápe amondose Jerusalénpe che kuatiañe’ẽnguéra ha pende pirapire umi hermanokuéra reheve, peẽ peiporavótava pende pejeroviaha (de confiánza),

4ha tekotevẽtarõ che aha avei, toho hikuái chendive.

5Aháta pene rendápe, ahasa rire Macedónia rupi, upérupi tekotevẽ ahasa.

6Penendive apytaségui aremive, ikatúrõ pe araro’y pukukue aja, ha aha jevy ramo, iporã peẽ chemoirũ che ahasehápe.

7Ko’ág̃a ahasakuévonte ndapohechaséi, aha’ãrõgui ajukuévo apyta aremive hag̃ua penendive, Hesu Crísto oipota ramo.

8Ko’ápe Efésope, apytase pe Pytu Porãmbáva arete peve (Pentecostes peve).

9Ojepe’águi chéve peteĩ okẽ amyasãi hag̃ua Ñanderuete ñe’ẽ porãite (evangélio), heta ohenduségui, oĩ ramojepe avei umi oñemoĩva Hesu Crísto rehe.

10Timotéo og̃uahẽ ramo pene rendápe peipytyvõ porãke ichupe ani hag̃ua ha’e okyhyje opyta hag̃ua penendive, ha’e omba’apo avei chéicha Hesu Crísto rembiapópe.

11Upévare aníke avave pende apytépe ndapejapói ichupe mba’eve ramo, pemoirũ uvei ichupe py’aguapýpe og̃uahẽ meve che rendápe, che aha’ãrõgui ichupe ambue ñane hermanokuéra ndive.

12Ñane hermáno Apólospe ajerure asy oho hag̃ua pene rendápe ambue ñane hermanokuéra ndive, ha’e katu ndohoséi ko’ág̃a, ohóta ijaha árape ichupe.

13Peñeñangarekóke! Pepyta hatãkena pende jeroviápe, peñomokyre’ỹ ha peñomombaretéke.

14Opaite mba’e pejapóva guive, pejapo mborayhúpe.

15Ajerure asy peẽme, che hermanokuéra, peẽ pehechakuaa porã hag̃ua Estéfanas hogayguakuéra ndive ojerovia tenondeva’ekue Hesu Crístore Grécia retãme, ha’e ha hogayguakuéra, oñeha’ãmba omba’apo hag̃ua Hesu Crísto rembiapópe.

16Pemoirũ ha peipytyvõ porãke ichupe ha opaichagua hermanokuéra oñeha’ãmbáva Hesu Crísto rembiapópe.

17Avy’aite ningo Estéfanas, Fortunáto ha Acaico ou haguére che rendápe, ha’ekuéra chembovy’a pene rendaguépe.

18Ha’ekuéra ningo ombovy’a che pytu porãme ha pende pytu porãme avei. Pehechakuaa porãke koichagua hermanokuérape.

19Ásia pegua iglesiakuéra penemomaiteiuka. Aquíla ha Priscíla penemomaiteiuka Hesu Crísto rérape, ha upéicha avei umi Hesu Crísto reheguáva oñembyatýva hógape.

20Opaite hermanokuéra penemomaiteiuka. Peñomomaitei iglesiaygua ñehetũ (béso) reheve.

21Che pomomaiteiuka che potee rupi.

22Oime ramo ndohayhúiva Hesu Crístope, upéva toñemaldeci. Maranáta (Hesu Crísto tou jevy).

23Hesu Crísto poriahuvereko (topyta penendive).

24Che mborayhu añeteguáva Hesu Crísto rupi toĩ opavave penendive.