2 Corintoyguakuérape 2 - Biblia en Guaraní - ?anderuete ?e’? Por? 2015

1Upéicharamo hi’ã ningo chéve, iporãve ani aha jevy pene rendápe py’ambyasy reheve.

2Ha che pomoñembyasýrõ máva piko chembovy’a jevýta, ndaha’éirõ upe che voi amoñembyasyva’ekuépe.

3Kóva voi ningo ahai peẽme, ani hag̃ua añembyasy ag̃uahẽ vove, tavy’a uvei maymáva ndive ajeroviágui che vy’a ha’eha avei pende vy’a.

4Heta py’a jejopy, angekõi ha heta tesay reheve ahai ko kuatiañe’ẽ kóva peẽme g̃uarã, ani hag̃ua che pomoñembyasy, peikuaa uvei pe mborayhu arekóva penderehe ituichaiteha.

Páblo operdona

pe hermáno

ho’ava’ekuépe

5Pe chemoñembyasýva, katuete penemomba’embyasy avei.

6 Ovaléma pe jehavira (castígo), heta pende apytégui oñemoĩma hese.

7Upévarehe ko’ág̃a iporãve peẽ peperdona ha pemoangapyhy ichupe ani hag̃ua ha’e ipy’aro.

8Upévare che ajerure peẽme pehechauka jevy ichupe pene mborayhu.

9Upevarã che ahai avei ko kuatiañe’ẽ kóva, che aikuaa hag̃ua peẽ pekakuaa porãha pehóvo pende jeroviápe ha peẽ peneñe’ẽrenduhapeína opaite mba’épe.

10Peẽ peperdona ramo peteĩ hembiapo vaívape, che aperdona avei ichupe, ha pe tembiapo vai che aperdonamava’ekue, aperdonáma penderehehápe, che aperdonáma Hesu Crísto renondépe,

11ani hag̃ua Satana ñanembotavy, jaikuaa porãgui hembiapo.

Páblo ojepy’apy ndojohúi haguére Títope Tróaspe

12Ag̃uahẽvo Tróaspe amyasãi hag̃ua Ñanderuete ñe’ẽ porãite che ajohu heta che rembiaporã,

13ndajohúigui Troáspe che hermáno Títope, ndaikatúi che apytu’u che pytu porãme, upévare che amomaitei paha ha aha Macedóniape.

14Che agradece katu Ñanderuetépe, Ha’e ombopoguy haguére Hesu Crísto rupi, hese ija’eỹva ha Hesu Crísto ojehechauka orérupi ikuaapy ha romosarambiha opárupi hyakuã porãva.

15Ñande ningo Hesu Crísto mba’e ryakuã porã ñande Ruetépe g̃uarã, umi ojesalváva ha avei umi oñehundívape g̃uarã.

16Ko’ãvape g̃uarã ore romyasãi te’õ ryakuã omano hag̃ua, ambuépe katu romyasãi tekove ryakuã oikove hag̃ua. Ha mávapa ivale omombe’u hag̃ua Ñanderuete ñe’ẽ porãite.

17Ore ndoroikói ambuekuéraicha, omyasãiva Ñanderuete ñe’ẽ ombyaty mbyaty hag̃ua iñe’ẽ myasãi rupi heta pirapire. Ore katu romyasãi hekópe ha py’aporãme Ñanderuete ñe’ẽ porãite, ha Hesu Crísto voi oreporavo roiko hag̃ua Ñanderuete he’i háicha.