Isaías 66 - Biblia en Guaraní - ?anderuete ?e’? Por? 2015

Ñanderuete ombojovakéta hekoitépe ha Sion oñemopu’ã ohóvo

1Péicha he’i pende Ruete: Pe yvága che guapyha renda, ha pe yvy che pykuéra renda; mba’eichagua óga piko peẽ pemopu’ãkuaa chéve g̃uarã ha mba’épa peẽ pejapokuaa Che apytu’u hag̃ua.

2Che po voi ojapopaiteva’ekue ko’ã mba’e ko’ãva, ha chendive opaite ko’ã mba’e oñepyrũmba, he’i pende Ruete; ha Che ama’ẽ’aína umi oñemomirĩvare, umi oñembyasývare ipytúpe ha umi oryrýivare ohendu guive che ñe’ẽ.

3Heta yvyariguápe g̃uarã peteĩchante oikuave’ẽ ramo peteĩ tóro térã ojuka ramo hapichápe, oikuave’ẽ ramo peteĩ ovecha térã omopẽ ramo jagua ajúra, oikuave’ẽ ramo tembi’u térã kure ruguykue, ohapy ramo mba’e ryakuã porã térã omomba’eguasu ramo jára gua’u ra’ãngápe. Ha’ekuéra voi oiporavo hapekuéra, ha hi’angapýpe ohayhu voi ko’ã mba’evai.

4Upévare Che avei aiporavóta ichupekuéra g̃uarã ñemotĩ ha aguerúta hi’arikuéra umi mba’e okyhyjeitéva; ahenóira’e ichupekuéra ha avave nopenái; añe’ẽra’e ha avave ndojapysakái, oikónte hikuái ojapo hag̃ua mba’e ivaíva ha péva ojapo gueteri che resa renondépe, ha oiporavo avei umi mba’e Che aguerohory’ỹva.

5Upévare pehendu pende Ruete ñe’ẽ, peẽ pekyhyjéva, pehendu che ñe’ẽ. Pene pehẽngue oñemoĩva penderehe ha penemosẽva okápe che réra rehe, he’ígui hikuái: Ñanderuete tohechauka ipu’aka ore rohecha hag̃ua peẽ pevy’aha; umía katuete oñemotĩmbava’erã.

6Ñe’ẽ ayvu oñehendu porã pe távagui, pende Ruete rogaguasúgui ou yvága Jára ñe’ẽ, oñepyrũvo omyengovia hag̃ua umi hese ija’e’ỹva rembiapo vaikue.

7Og̃uahẽ mboyve pe hóra imemby hag̃ua, imembýma peteĩ kuimba’e isy hasykatu mboyve.

8Mávapa ohendúra’e koichagua mba’e, máva piko ohecha ko’ã mba’e. Sapy’aite piko onacekuaa peteĩ tetã térã pe tetã megua yvy. Sion katu oĩra’e imemby hag̃uáicha, ha imemby pya’e imembykuéra.

9Che voi ajapo ha’e imemby hag̃uáicha ha ndachepu’akái piko ha’e imembyete hag̃ua, he’i pende Ruete. Upe Che aporomoheñóiva, ndahejaichénepa onace hag̃ua avei ko yvy apére, he’i pende Jára.

10Pevy’aitéke Jerusalen ndive, ha penderoryetéke hendive, mayma pehayhúva guive ichupe; tapenerenyhẽke vy’águi hendive, mayma ojahe’omava’ekue hese;

11pekambu peneryg̃uatã meve ha pejohu hag̃ua pekambu jave (Jerusalen) káma rehe pe ñemoangapyhy, pendepy’arory hag̃ua heko mimbipa reheve.

12Péicha he’i pende Ruete: Pema’ẽ porãke, che amyasãi py’aguapy hi’ári ysyrýicha, ha umi tetã mba’erepy ku ysyry hatãváicha ojeguerúta pene rendápe; upéramo Che añangarekóta penderehe pe sy ojapo háicha imemby okambúvare, Che pogueraháta che jyva ári ha Che pomokunu’ũta che renypy’ã ári.

13Ku sy omoangapyhy háicha imembýpe, péicha Che voi pomoangapyhýta peẽme, ha Che pomoangapyhýta Jerusalen távape.

14Peẽ pehecháta ha pendepy’a horýta; pende kanguekuéra hoky jevýta kapi’ícha ha pende Ruete pu’aka ojehechaukáta hembiguaikuéra ndive g̃uarã, ha ipochy opytáta hese ija’e’ỹva ndive g̃uarãnte.

15Pema’ẽ porãke pende Ruete rehe, Ha’e oúta tata reheve, ha umi icarrokuéra ojogua yvytu jepokápe, ojahéi hag̃ua pochypópe, ha oporohavira hag̃ua hata rendýpe.

16Pende Ruete voi ningo ombojovakéta hata rupi ha ikyse puku rupi mayma yvyariguakuérape, pende Ruete ojukáta hetaitereípe.

17Opaite umi oñemomarangatu ha oñembohekopotĩva ijára gua’úpe g̃uarã ikokue mbytépe, ha upépe ho’úva kure ro’o, anguja ha ambue tembi’u ky’áva, ko’ãva oñehundipava’erã, he’i pende Ruete.

18Che ningo aikuaapa voi hembiapokuéra ha ipy’apýpe oĩva; og̃uahẽva’erã pe ára Che ambyatýtava opaite ñe’ẽ ha opaite tetã; ha oupa rire ohecháta hikuái che reko jajaipa.

19Ijapytepekuéra amoĩta peteĩ mba’e techaukaha, ha umi hembýva ichuguikuéra amondóta ambue tetãme, Tarsíspe, Put ha Lúdpe, umi oipysóva guyrapa. Tubal ha Javánpe, ha umi tetã oĩva y rembe’y mombyrýpe, ha ndoikuaáiva mba’evete chehegui ni ndohechái Che reko jajaipa; ha’ekuéra katu omombe’úta che reko jajaipa umi tetã apytépe.

20Ha’ekuéra oguerúta mayma pene pehẽnguekuérape opaite tetãnguéra apytégui, peteĩ kuave’ẽmby ramo pende Ruetépe g̃uarã kavaju ári, cárrope, iguapyha ryrúpe, mburika ha caméllo ári, che cérro poravopyre Jerusalénpe, he’i pende Ruete, umi Israel ñemoñare ogueru háicha ikuave’ẽmbynguéra mba’yru potĩme Ijára rógape.

21Ha ajapyhýta ijapytégui pa’irã ha avei Leviguakuéra, he’i pende Ruete.

22Ha pende Ruete he’ive: Pe yvy ha yvagakuéra pyahu ajapótava, oikóta tapia g̃uarã, oikóta avei tapia g̃uarã pene ñemoñare ha pende réra.

23Opaite jasy pyahúpe ha opaite sábado oñembyatýta hikuái che rendápe chemomba’eguasu hag̃ua, he’i pende Ruete.

24Ha osẽta hikuái Jerusaléngui, ha ohecháta umi yvyarigua re’õngue oñemoĩmava’ekue cherehe; hasokuéra araka’eve nomanomo’ãi, hata ndoguemo’ãi ha opaite yvyarigua ohechávape guive ko’ã mba’e ombojeguarúta.