2 Réyes 11 - Biblia en Guaraní - ?anderuete ?e’? Por? 2015

Atalía oñemomba’e Juda retã ruvicha guapyhaguasu rehe

1Atalía, Ocozías sy, ohechávo imemby omano hague, opu’ã ha ojukauka opaite tetã ruvicha ra’ykuérape.

2Joseba, pe tetã ruvicha Joram rajy, Ocozías reindy, ojapyhy Joas, Ocozías ra’ýpe, ha oguenohẽ ñemiháme umi tetã ruvicha ra’y ojejukatavahína apytégui, ha omokañy ichupe ha herekuápe Atalíagui, peteĩ kotýpe oñeñongatuhápe frazadakuéra, savanakuéra ha arambohakuéra, ha upéicha ndojejukái ichupe.

3Ha oiko herekua ndive kañyháme Ñanderuete rógape 6 áño pukukue; ha Atalía oiko Juda retã ruvicha ramo.

4Ha og̃uahẽvo pe áño 7-hápe pe pa’i Joiada ohenói umi soldádo aty 100 arigua ruvichakuérape ha umi ñe’ẽ rerahahárape ha ogueraha ichupekuéra Ñanderuete rógape, ha oike hendivekuéra peteĩ jekupytýpe, ha omoñe’ẽme’ẽ ichupekuéra Ñanderuete rógare ha upéi ohechauka ichupekuéra tetã ruvicha ra’ýpe.

5Ha he’i ichupekuéra: Ko’ã mba’e peẽ pejapova’erã; pemboja’o umi soldádo oĩva guive mbohapy aty, ojojaitévape ha peteĩ aty ñemboja’opyre oñangarekova’erã tetã ruvicha rógare pe jepytu’uha árape.

6Ambue aty ñemboja’opyre katu oĩta Shur táva rokẽme, ha pe mbohapyha aty ñemboja’opyre oĩta umi soldádo oĩha rokẽ mboypyrive. Péicha peñangarekóta pe óga rehe, ani hag̃ua ojeike rei ipype.

7Ha umi ambue mokõi soldádo aty oñangarekóva Ñanderuete róga rehe pe jepytu’uha árape (sábado) opytáta tetã ruvicha ypýpe.

8Ha peimembáta tetã ruvicha jerekuévo, ha peguerekóta pene ñorãirõ rembiporu pende pópe; ha oimeraẽva oikéva pende apytépe tomano. Ha peimeva’erã tetã ruvicha ndive mamo ohohápe.

9Ha umi soldádo aty, 100 arigua ruvichakuéra, ojapopa pe pa’i Joiada he’i haguéicha ichupekuéra; ha peteĩteĩ ojapyhy umi ipoguy peguápe, pe soldádo aty oike ha pe ambue osẽva pytu’uha árape, ha oupa hikuái pa’i Joiada rendápe.

10Ha pe pa’i ome’ẽ umi soldádo atýpe, 100 arigua ruvichakuérape, umi yvyra puku akua ha umi soldádo rete mo’ãha, tetã ruvicha David mba’ekue, oĩva Ñanderuete rógape.

11Ha umi soldádo oñembohysýi, hembiporu ñorãirõ megua reheve, pe óga yke akatuaha guive pe yke asuha peve, pe kuave’ẽmby renda ha Ñanderuete rogaguasu ypýpe, ha tetã ruvicha jerekue rehe.

12Upéi Joiada oguenohẽ tetã ruvicha ra’ýpe, ha omoĩ hese pe coróna ha pe jeguaka ijyváre, ha omona iñakãre acéite opyta hag̃ua tetã ruvicha ramo; ha ojepopetepa joa ha he’i hikuái: Tetã ruvicha toikove pukúkena.

13Ha Atalía ohendúvo tetãyguakuéra oñaníva ryapu, oho oike tetãyguakuéra atýpe Ñanderuete rogaguasu oĩháme.

14Ha oma’ẽvo, ohecha tetã ruvichápe oñembo’ýva Ñanderuete rogaguasu horcon ykére ojejepokuaa háicha, ha umi mburuvicha ha umi turu mbopuhára oĩmba henondépe; ha opaite tetãygua ovy’a joa, ha ombopu joa iturukuéra. Upévo, Atalía omondoro ijao, ha sapukaipópe he’i: Oñepu’ã cherehe, oñepu’ã cherehe.

15Ha pa’i Joiada katu he’i umi soldádo aty 100 arigua ruvichakuérape: Peguenohẽ ichupe Ñanderuete rogaguasu ryepýgui, ha oimeraẽva omoirũvape ichupe pejuka kyse puku akuápe, anítei katu pejuka ichupekuéra Ñanderuete rogaguasúpe.

16Ha ombohape ichupe umi tapicha pa’ũ rupi; ha ogueraha ichupe pe tape kavaju arigua oikeha rupi tetã ruvicha rógape, ha upepete ojuka ichupe.

17Upéramo Joiada oñe’ẽme’ẽ Ñanderuete, tetã ruvicha ha tetãyguakuéra ndive, oiko hag̃ua hikuái Ñanderuete retãtee ramo, ha upeichaite avei ojapo tetã ruvicha ha tetãyguakuéra oñondive.

18Ha opaite tetãyguakuéra oike Baal tupãópe oity hag̃ua opaite kuave’ẽmby renda ha ta’ãngakuéra, ha ojuka hikuái Matan, Baal pa’ípe, umi kuave’ẽmby renda renondépe. Ha pe pa’i Joiada omoĩ peteĩ soldádo aty oñangareko hag̃ua Ñanderuete rogaguasu rehe.

19Ha upéi umi soldádo aty ruvichakuéra, umi soldádo ha tetãyguakuéra ndive ogueraha tetã ruvichápe Ñanderuete rogaguasu guive tetã ruvicha róga peve, ha oike hikuái pe tahachi rokẽ rupi; ha tetã ruvicha oguapy pe tetã ruvicha guapyhaguasúpe.

20Ha opaite tetãyguakuéra ovy’a joa, ha umi tetãygua oiko py’aguapýpe ojejuka rire Atalíape kyse pukúpe pe tetã ruvicha róga ypýpe.

21Joas oguereko 7 áño oñepyrũvo oisãmbyhy.