Juéces 14 - Biblia en Guaraní - ?anderuete ?e’? Por? 2015

Sanson ha pe kuña Filisteaygua Timnátpe

1Sanson oguejy ha og̃uahẽ Timnátpe, ha upépe ohecha peteĩ kuñataĩ umi Filisteaygua rajykuéra apytépe.

2Ha oho omombe’u itúvape ha isýpe, he’ívo: Che ahechákuri Timnátpe peteĩ kuñataĩ Filisteaygua rajykuéra apytépe; pejeruremína itúvape, ha’e ome’ẽ hag̃ua ichupe chéve che rembirekorã ramo.

3Ha itúva ha isy he’i ichupe: Ndaipóri piko kuña nde tríbu rajykuéra apytépe, térã ne retãygua apytépe reho hag̃ua Filisteayguakuéra rendápe, ñanderehe ija’e’ỹva apytépe, ne rembirekorã rekávo. Ha Sanson he’i jevy itúvape: Kóa pehecha chéve che rembirekorã, péva ningo che aipota.

4Ha itúva ha isy ndoikuaái ko’ã mba’e ouha Ñanderuetégui, Ha’e ohekágui juavy Filisteayguakuéra ndive; umi árape umi Israelguakuéra oiko Filisteayguakuéra poguýpe.

5Ha Sanson oguejy itúva ha isy ndive Timnátpe; ha og̃uahẽvo Timnat parraltýpe, péina ápe peteĩ leõ ra’yrusu okororõháme ohug̃uaitĩ ichupekuéra.

6Ha Ñanderuete Pytu Porãitéva ou Sanson ári, ha oipehe’ãmba pe leõme, ku kavara ra’y oñepehe’ã ramoguáicha, ndoguerekói ramojepe mba’eve ipópe; ha nomombe’úi itúvape ni isýpe pe ojapomava’ekue.

7Ha’ekuéra oho oñe’ẽ hag̃ua pe kuñataĩme; ha Sanson ohayhu ichupe.

8Ha ndahi’aréi ou jevy omenda hag̃uáicha, oukuévo Sanson opia pe tapégui ohecha hag̃ua pe leõ re’õngue; ha péina leõ retekue rehe ojehaitypo la réina, ha ijeírama.

9Ha ipópe ojapyhy eíra ho’u hag̃ua ohokuévo tapére, ha ohupitývo itúva ha isýpe ome’ẽ avei ichupekuéra, nomombe’úi katu ichupekuéra ha’e oguenohẽ hague pe eíra leõ retekuégui.

10Ha og̃uahẽvo pe kuñataĩ rendápe Sanson ru ojerure pe kuñataĩ rúpe ome’ẽ hag̃ua itajýra Sansónpe, hembirekorã ramo, ha Sanson ojapo upépe karuguasu, péicha mitãrusukuéra ojepokuaa háicha.

11Ha Filisteayguakuéra ohechávo ichupe okyhyje ichugui, upévare omondo 30 iñirũnguéra omoirũ hag̃ua ichupe.

12Ha Sanson he’i ichupekuéra: Che aporandúta peẽme peteĩ ñe’ẽ hasýva ojekuaa hag̃ua mba’épa he’ise, ha ko’ã 7 ára pe karuguasu aja pukukue pemyesakã ramo ha peje ramo chéve mba’épa he’ise, che ame’ẽta peẽme 30 ao peñemonde porãmba hag̃ua.

13Ha ndaikatúi ramo pemyesakã chéve, peẽ peme’ẽva’erã chéve umi 30 ao porãitéva. Ha he’i joa hikuái ichupe: Ere katu upe ne ñe’ẽ hasyetéva ha hesakã’ỹva, rohendu hag̃ua.

14Upéramo ha’e he’i ichupekuéra: Pe oporomokõvagui osẽ tembi’u, ha pe imbaretetévagui osẽ mba’e he’ẽ. Ha’ekuéra ndaikatúi oikuaa mba’épa he’ise ko porandu kóva mbohapy ára pukukuépe.

15Pe ára 4-hápe he’i hikuái Sanson rembirekópe: Eñeha’ã eikuaa ne ménagui mba’épa he’ise ko porandu asyeté ojapóva, ani hag̃ua rohapýtei nde ru róga ha ndéve avei. Orerenoipara’e ko’ápe peipe’a hag̃ua orehegui roguerekomíva.

16Ha Sanson rembireko hasẽ hesa renondépe, ha he’i: Nde ningo nande’a’éi cherehe, ha ndacherayhúi, neremyesakãigui chéve upe ñe’ẽ hasýva ereva’ekue che retã ñemoñarenguérape, ha ha’e he’i jevy: Eikuaa porãke, che ru ha che sýpe ningo jepe namyesakãi, ha piko amyesakãmbáta ndéve.

17Ha ha’e ojahe’o hesa renondépe umi 4 ára karuguasu oĩ aja pukukue; ha pe ára 7-hápe ha’e omyesakã ichupe, ojopyetereígui ichupe; ha pe kuña omombe’u jevy hetãyguakuérape.

18Pe ára 7-hápe, kuarahy oike mboyve, Filisteayguakuéra he’i Sansónpe: Mba’épa he’ẽve eíragui ha mba’épa imbareteve leõgui. Ha ha’e he’i jevy ichupekuéra: Peẽ ndapembovói rire pe yvy che vakara’y rupi, araka’eve ndapeikuaava’erãmo’ãi ko che ñe’ẽ hasýva.

19Ha Ñanderuete Pytu Porãitéva ou hi’ári ha oguejy Ascalónpe ha ojuka 30 kuimba’e Ascalonguápe; ha ojapyhy ichuguikuéra ijao ome’ẽ hag̃ua ao porã umi ñe’ẽ hasy rehegua omyesakãva’ekuépe; ha pochy rendy reheve oho jevy itúva Manóa rógape.

20Ha pe kuña ru ome’ẽ itajýra Sanson irũme, hembireko ramo.