1Upéi David okañy Ramágui, profetakuéra rekohágui, ha ou Jonatan rendápe, ha he’i: Mba’éiko che rembiapokue. Mba’éiko añangue, térã mba’éiko che angaipa nde ru ndive, ha’e oñeha’ãmba chejuka hag̃ua.
2Ha Jonatan he’i ichupe: Mba’eveichave ramo neremanomo’ãi. Che ru ndojapomo’ãi mba’eve, taituicha térã taimichĩ, omombe’u’ỹre chéve; mba’éguipa che ru oñomíta chehegui ko’ã mba’e. Ndaupeichamo’ãi.
3Ha David oñe’ẽ jevy he’ívo: Nde ru oikuaa voi nde cherayhuha, ha he’íta: Jonatan ani oikuaa, anítei hi’ánga oñembyasy; añetehápe Ñanderuete ha ne ánga rekovére che ha’e ndéve, che ag̃uahẽmaha che ñemano rokẽme.
4Ha Jonatan he’i Davídpe: Opaichagua mba’e reipotáva guive che ajapopava’erã ndéve g̃uarã.
5Ha David he’i jevy Jonatánpe: Péina ko’ẽ ramo jasyra’ýta, ha che ajepokuaa aguapy tetã ruvicha ndive akaru hag̃ua; nde katu chereja takañy ñúme ko’ẽramo ára mbohapyhápe ka’aru peve.
6Ha nde ru imandu’a ramo cherehe, eréta: David heta ojerure chéve aheja hag̃ua oho pya’ete itáva Belénpe, upépe voi opaite hogayguakuéra ogueromandu’a pe kuave’ẽmby opaite áño reheguáva.
7Ha ha’e he’i ramo oĩ porã, upéicha ramo ne rembiguái opytu’ukuaa; ha ipochy mba’e ramo katu, eikuaáke mba’evai ojaposeha cherehe.
8Eiporiahuverekóna ne rembiguáipe reme’ẽma voi ningo ne ñe’ẽ ne rembiguáipe Ñanderuete rérape. Ha oĩ ramo chepype teko ñaña, chejukakuaa, natekotevẽi chereraha nde ru rendápe.
9Ha Jonatan he’i ichupe: Eity ko’ã mba’e ne akãgui, che aikuaa vove che ru ojaposeha nderehe mba’e ivaíva katuete che amombe’úta avei ndéve.
10Upémaramo David he’i Jonatánpe: Mávapa chemomarandúta nde ru ipochy ramo chendive.
11Ha Jonatan he’i Davídpe: Eju ñasẽ ñúme, ha mokõivéva osẽ ñúme.
12Upépe Jonatan he’i Davídpe: Ñanderuete, Israel Jára toiko techahare ramo. Ha che aporandu ramo ko’ẽ ramo térã ko’ẽ ambue ramo ko horaitépe che rúpe ha osẽ porãmba ramo nendive g̃uarã, voiete che amondóta ne rendápe aikuaauka hag̃ua ndéve.
13Ha oime ramo che ru ojapose ivaíva nderehe, Ñanderuete tachehavira, ha tombojo’apyve mba’evai che ári namombe’úi ramo ndéve, ha noroipytyvõi ramo reho hag̃ua angapytu’upópe. Ñanderuete toĩ nendive, oĩ haguéicha che ru ndive.
14Ha che aikove aja eiporu chendive avei Ñanderuete poriahuvereko, ani hag̃uátei che amano.
15Ha ani remboyke nde poriahuvereko araka’eve che rogayguágui. Ág̃a Ñanderuete oikytĩmbávo peteĩteĩ yvy apéregui nderehe ija’e’ỹvape, aníke reheja oñemboykétei Jonatan réra nde rógagui.
16Péicha Jonatan ome’ẽ iñe’ẽ David róga ndive he’ívo: Ñanderuete voi tohundi David rehe ija’e’ỹvape.
17Péicha Jonatan ome’ẽ jevy iñe’ẽ Davídpe, ohayhúgui ichupe, Jonatan ohayhu voi Davídpe ha’e ojehayhu háicha.
18Upéi Jonatan he’i ichupe: Ko’ẽramo jasy ra’y, ha nde guapyha inandígui ojehechakuaáta nepore’ỹha.
19Ekanỹ mbohapy ára, ha upéi eñemokanỹ pe tendápe repyta haguépema ha eha’ãrõ Ezel itaty kupépe.
20Ha che amombóta mbohapy hu’y amo gotýo ku añeha’ã ramoguáicha ajapi hag̃ua peteĩ mba’e.
21Upéi amondóta che rembiguáipe, ha ha’éta ichupe: Tereho egueru che hu’y. Ha ha’e ramo ichupe, péina pépe ágotyove ndehegui oĩ pe hu’y, ejapyhy; nde rejukuaa oĩgui py’aguapy, ha ndaipóri mba’eve ivaíva. Ñanderuete rekovére che amombe’úta pe añetegua.
22Ha che ha’e mba’e ramo pe mitãrusúpe péicha: Péina pépe che hu’y oĩ amo gotyove ndehegui; tereho, Ñanderuete voi nemondouka.
23Ñanderuete toĩ techahare ramo ñane pa’ũme opaite ára peve ha tohendu opaite mba’e ñañe’ẽmava’ekue guive.
24Upéicha David okañy pe ñúme, ha og̃uahẽvo pe jasyra’y, tetã ruvicha oguapy okaru hag̃ua.
25Ha pe tetã ruvicha oguapy jepiguáicha iguapyha ári tápia gotýo, Jonatan oguapy Saul rovái ha Abner oguapy Saul ykére, ha David guapyha opyta nandi.
26Upe árape Saul nde’íri gueteri mba’eve, he’ígui ipy’apýpe: Oiméne mba’épa ojehúra’e ichupe, ha naipotĩrigui heko, ha’e oñemboheko potĩse raẽ.
27Ambue árape, jasyra’y mokõiha ko’ẽme, David guapyha opyta gueteri nandi; ha Saul he’i ita’ýra Jonatánpe: Mba’éguipa, ko árape ha kuehe ndoúi Isai ra’y okaru hag̃ua ñanendive.
28Ha Jonatan he’i Saúlpe: David heta ojerure chéve aheja hag̃ua ichupe oho Belénpe.
29He’ívo: Ajerure ningo ndéve cherejána taha che rogayguakuéra rendápe oikuave’ẽtagui hikuái ore távape, ha che ryke’ykuéra oipota aha; upévarehe oime ramo ha’a porã ndéve, cherejána taha che ryke’ykuéra rechávo. Pévaguinte ndoúi tetã ruvicha mesápe.
30Upévo Saul ipochyeterei Jonatan ndive, ha he’i ichupe: Nde ningo kuña reko vai memby. Che piko ndaikuaái nde voi reiporavo hague Isai ra’ýpe, nde katu reñemotĩta ha remotĩta avei nde sýpe.
31David oikove aja pukukue yvy apére, nde ndereikove pukumo’ãi ni tetã ruvicha ramo. Ko’ág̃a emondo ipiarigua, ha egueru chéve Davídpe, ha’e omanomanteva’erã.
32Ha Jonatan he’i jevy itúva Saúlpe: Mba’érehe piko omanóta. Mba’éiko ojapo.
33Upévo Saul opoi hese peteĩ yvyra puku akua oikutu hag̃uáicha ichupe; ha upépe Jonatan oikuaa porã itúva ojukasenteha Davídpe.
34Upérõ Jonatan ipochyete ha opu’ã meságui, ha ndo’úi pan pe jasy pyahu ára mokõiháme; oñembyasyetereígui David rehe, itúva omotĩ haguére ichupe.
35Pyhareve, Jonatan oho ñúme, pe hóra oiporavo hagueichaite, David ndive, ha peteĩ mitã’i oho hendive.
36Ha Jonatan he’i pe mitãme: Eñaníke ha eru chéve umi hu’y apoítava. Ha pe mitã oñani ohóvo, Jonatan opoi ihu’ýgui ohasa mombyryve hag̃uáicha ichugui.
37Ha ohupitypotávo pe mitã pe hu’y ho’atahápe Jonatan opoiva’ekue, Jonatan osapukái pe mitã rapykuéguio, ha he’i: Noĩripa hu’y amo gotyove ndehegui.
38Ha Jonatan osapukái jevy mitã rapykuéri: Pya’e eñani, aníke repytátei. Ha pe mitã ohupi pe hu’y, ha ogueru ijára rendápe.
39Ha pe mitã ndoikuaái mba’evete, Jonatan ha David añoite oikuaa mba’épa he’ise ko’ã ñe’ẽ.
40Upéi Jonatan ome’ẽ iñorãirõ rembiporukuéra pe mitãme, ha he’i ichupe: Tereho ha egueraha távape.
41Ha pe mitã oho rire, David opu’ã pe itaty kupégui, ha ojayvy mbohapy jevy ohupity peve pe yvy; ha upéi oñohetũ hikuái ha mokõivéva hasẽ, ha David hasẽ hatãve.
42Ha Jonatan he’i Davídpe: Tereho angapytu’upópe, Ñanderuete reraitépe ñame’ẽ ojupe ñane ñe’ẽ ja’évo: Ñanderuete toĩ ñane pa’ũme, ne ñemoñare ha che ñemoñare pa’ũme, opaite árape. Ha David opu’ã oho hag̃ua; ha Jonatan oike jevy pe távape.
Who We AreWhat We EelieveWhat We Do
2025 by iamachristian.org,Inc All rights reserved.
