Isaías 10 - Biblia en Guaraní - ?anderuete ?e’? Por? 2015

1Angái, angái, umi he’íva ha ohaíva tembiapoukapy heko pegua’ỹva oporojopy asy hag̃ua.

2Ha’ekuéra omboyke ñembojovake heko peguáva imboriahúva ndive, ha ombojovake vai oipe’a hag̃ua mbaretépe imenave’ỹva mba’erepy, ha omondapa hag̃ua umi ityre’ỹvape.

3Ha mba’éiko pejapóta pe jehaviraha árape. Mavarehépa pejekose penepytyvõ hag̃ua, ou ramo mombyrygua penembotapere hag̃ua. Moõpa pehejáta pene mba’erepy.

4Cherehe’ỹ ojegueraháta ñemokarapã ha jepokuahápe ha ho’a joa hag̃ua omanóva apytépe. Ha ko’ã mba’e reheve jepe Ñanderuete pochy ndopimo’ãi, ipo ojepysónte gueteri hi’arikuéra.

Asíria, Ñanderuete rembiporu

5Che, chepochýgui, he’i pende Ruete, aiporúta Asíriape che yvyra po’i ha che tukumbo ramo, ipópe amoĩma che pochy.

6Che amondóta Asíriape ojeity hag̃ua pe tetã chembopochýva ári (Israel ári), ha’ekuéra oñemoĩgui cherehe. Asíria oipe’a hag̃ua mbaretepópe imba’erepyeta, ha opyrũ hag̃ua hese tymba repoti peguáicha oĩva tape rehe.

7Asíria retã ruvichaguasu katu nde’íri péicha ipy’apýpe, opensa ombopoguy ha ohapo’o hag̃ua heta tetãme.

8Ha’e voi he’i: Opaite che mburuvichakuéra ndaha’éi piko tetã ruvicha meme.

9Chéverõ g̃uarã Calno ha Carquemis peteĩcha, Hamat ha Arfad peteĩcha avei, ha Samária Damáscoicha.

10Che ambopoguy ha aity umi tetã jára gua’u ra’ãnga ha avei ningo umi ambue tetã oguerekove ijára ra’ãnga Jerusalen ha Samária oguerekóvagui.

11Ajapo haguéicha Samária rehe ha ijára ra’ãngakuéra rehe, ndajapoichénepa avei Jerusalen ha ijára gua’u ra’ãngakuéra rehe.

12Ha ojehuva’erã Ñanderuete ojapouka rire hembiapo Sion cérro ha Jerusalénpe, Ha’e ohaviráta avei Asíria retã ruvichápe, ha’e ojererovu ha oñembotuicha haguére ipy’apýpe.

13Ha’e voi ningo péicha he’i: Che pyapy mbarete rupi, che arandu rupi ha che akã porãgui ambopoguy umi tetãme ha tóroicha aity imburuvichaguasukuérape iguapyhaguasúgui.

14Che po rupi agueraha tetãnguéra mba’erepyeta, oñepo’ẽ háicha guyra raitýpe ha oñembyaty háicha guyra rupi’akuéra ojeheja reiva’ekue, péicha añemomba’e opaite tetãnguéra rehe; ha ndaipóri avave omongu’éva jepe ipepo, térã ojejurupe’áva hasẽ hag̃ua.

15Pe hácha oñemomba’eguasúnepa ijára renondépe, ha’e oity jave pe yvyra; oñembotuichánepa pe serrúcho ijára renondépe, ha’e oikytĩ jave; térãpa pe tetã ruvicha yvyra po’i oñemoĩta ijára rehe; térãpa pe tukumbo oinupãta ijárape;

16upévare Ñanderuete, yvága atykuéra Jára, ombohasýta umi imbaretévape, ha ipu’aka ohundíta ichupekuéra tata tuicha rupi.

17Ha Israel rataindýgui oikóta tata, ha Heko Porãvagui oikóta tatarendy, omyendy ha ohundi hag̃ua peteĩ araitépe iñanandy ha iñuatĩndy.

18Ika’aguy ha ikokue porã oñehundíta, hi’ánga ha hete hasýta omanombotávaicha,

19upérõ peteĩ mitã ikatu oipapa ha ohaikuaa umi yvyra hembýva ka’aguýpe.

20Ha ojehuva’erã upe ára upévape, umi hembýtava Israel retãgui ha umi okañýtava Jacóbo rógagui, ndojejokoveimava’erã araka’eve ihundihare rehe, ojejokóta uvei Ñanderuete rehe, Israel Jára Porã rehe.

21Ha hembyremi ou jevýta, Jacóbo rembyre ojeroviáta Ñanderuete rehe.

22Nde Israel, ne retãygua heta ramo jepe ku yguasu rembe’y yvyku’ícha, hembyremínte ou jevýta. Ko ñehundiguasu katuete oikóta ha og̃uahẽta ku yvytu ratãicha.

23Ñanderuete, yvága atykuéra Jára, ojapóta katuete opaite mba’e he’iva’ekue guive hetã rehe.

24Upévare pende Ruete, yvága atykuéra Jára, péicha he’i: Che retã, nde reikóva Siónpe, ani rekyhyjétei Asíriagui. Asíria opu’ã ramo nderehe ijyvyra po’i reheve nenupã hag̃ua, Egípto ojapo haguéicha,

25ndahi’aremo’ãi apoíta che ñeko’õigui ahundi hag̃ua avei Asiriayguakuérape,

26upérõ pende Ruete, yvága atykuéra Jára, omopu’ãta hese itukumbo, ha ojehu jevýta pe jejukaguasu oiko haguéicha Madiánpe, pe Oreb itaguasu ypýpe, ha omopu’ã ramoguaréicha Egípto rehe ijyvyra po’i pe yguasu rehe.

27Ha ojehuva’erã upe ára upévape nde ati’ýgui ojepe’áta pe cárga ha oñemopẽva’erã pe cangálla nde atúagui, umi soldádo ipy’aguasúva renondépe.

28Asíria og̃uahẽ Ajátpe, ohasa Migron peve; Micmáspe oipapáta isoldádo aty.

29Ohasa hikuái pe ysyry ojehasahápe (pásope); oike hikuái Gébape ha oke upépe; Rama oryrýi; Gibeat, Saul mba’ekue, okañy.

30Esapukái hatãke, Galim rajy, toñehendu Lais peve, Anatot osapukái angái, angái.

31Madmena ipy’a tarovapa; umi Gebímpe oikóva okañymba.

32Og̃uahẽ Nóbpe ha upépe opytu’u peteĩ ára, upéi ohupi ipo Sion, Jerusalen cérro rehe.

33Pema’ẽ porãke pende Ruete, yvága atykuéra Járare, ohakã’ova’erã mbaretepópe umi yvyra rakã ijyvatéva, ha umi yvyra ru’ã ho’apava’erã.

34Upérõ oñekytĩva’erã háchape pe ka’aguy iñypytũva, ha umi Líbano yvyra ho’ava’erã tyapuguasupópe, Ha’e oitýgui.