Números 16 - Biblia en Guaraní - ?anderuete ?e’? Por? 2015

Core oñemoĩ Moises rehe

1Core, Izhar ra’y, Coat ra’y, Levi ra’y, ha Datan ityvýra Abiram ndive, Eliab ra’ykuéra ha On, Pelet ra’y, Ruben ra’ykuéra oñembyaty hikuái hapichakuéra ndive,

2ha oñembo’y hikuái Moises renondépe ha Coat ndive oĩ 250 kuimba’e: Israel aty ruvichakuéra, mburuvichakuéra ha kuimba’e herakuã porãva,

3ha umía ou Moises ha Aaron rendápe oñemoĩ hag̃ua hesekuéra ha he’i hikuái ichupekuéra: Mba’érehe piko peẽ peñembotuicha ha peñemoĩ opaite Israel atyguasu rehe, opaite Israelgua heko potĩva Ñanderuete oikógui ñande apytépe.

4Moises ohendúvo ko’ã mba’e oñesũ tĩndyhápe;

5ha oñe’ẽ Corépe ha hendive oúvape, he’ívo: Ko’ẽ ramo Ñanderuete ohechaukáta mávapa imba’e, mávapa heko potĩ ha mávapa Ha’e oipota oñemboja henondépe; Ha’e ohechaukáta upe Ha’e oiporavomava’ekuépe.

6Péicha pejapo: Nde, Core, ha ne irũnguéra pejapyhy pene myatatĩha,

7tatapỹi hendýva reheve ha pemoĩ hi’ári mba’e ryakuã porã ha pejupa ko’ẽ ramo Ñanderuete renondépe; ha upe kuimba’e Ñanderuete oiporavótavape, upéva taheko potĩ; peẽ Leviguakuéra peñembotuichaiterei.

8Moises he’ive Corépe: Ejapysaka ko’ág̃a nde, Levi ra’yre:

9Naimba’eguasúipa peẽme g̃uarã Israel Jára penemboykévo Israel atýgui ha pendeporavo peservi hag̃ua Ñanderuete róga rembiapópe ha peime hag̃ua pene retãyguakuéra renondépe peservi hag̃ua ichupekuéra.

10Ñanderuete oheja peẽ Leviguakuéra peñemboja hag̃ua hendápe, ha napeneryg̃uatãigui peikose avei Jahve pa’ikuéra ramo.

11Upéicharupi peẽ ha penendive oĩva peñembyatýva guive peñemoĩ Ñanderuete rehe; ha ndaha’éi Aaron rehe, ha mba’éiko ha’e, peñe’ẽ vai hag̃ua hese.

12Upéi Moises ohenoiuka Datan ha Abiram, Eliab ra’ykuérape, ha’ekuéra katu he’iuka Moiséspe: Ore ndorojumo’ãi ne rendápe.

13Naimba’eguasúipa ndéve oregueru hag̃ua peteĩ yvy osyryhápe kamby ha eíra, ha ág̃a orejukase avei ko desiértope, reñembojára hag̃ua orerehe mbaretepópe.

14Ha nde ndaoremoingéi gueteri pe yvy osyryhápe kamby ha eíra, ha nereme’ẽi avei oréve pe yvy ni parraltykuéra ore mba’e teerãva. Rehesa’ótapa avei ko’ã kuimba’épe, ore ndorohomo’ãi.

15Upéramo Moises ipochyeterei, ha he’i Ñanderuetépe: Ani rema’ẽtei ikuave’ẽmby rehe; che ndajapyhýi ichuguikuéra peteĩ búrro jepe, ha avave rehe ndajapói ivaíva.

16Upéi Moises he’i Corépe: Nde ha nendive oĩva, pejupa ko’ẽ ramo peñembyaty Ñanderuete renondépe; nde, ne irũnguéra ha Aaron;

17ha peteĩteĩva tojapyhy imyatatĩha ha pemoĩ mba’e ryakuã porã ha peñemboja Ñanderuete renondépe pene 250 myatatĩha ha mba’e ryakuã porã reheve, ha nde ha Aaron peñembojava’erã avei pe óga jojohuha renondépe pene mba’e myatatĩha reheve.

18Ha peteĩteĩva ojapyhýta imyatatĩha ha omoĩta ipype tata ha hi’ári mba’e ryakuã porãva, ha pejupáta pe óga jojohuha rokẽme, che ha Aaron rojúta avei.

19Ha ambue pyhareve Core ombyatyuka opaite Israelguakuérape pe óga jojohuha renondépe; upevove Ñanderuete reko jajaipa ojehechauka mayma ijatývape.

20Ha Ñanderuete oñe’ẽ Moises ha Aarónpe, ha he’i:

21Pejei ko aty apytégui, ha peteĩ sapy’aitépe ambokusuguéta ichupekuéra.

22Ha’ekuéra oñesũ tĩndyhápe, ha he’i hikuái: Ore Ruete, Nde ningo kuimba’e ha kuña pytu Jára. Nde nereñemoangaipái ore roñemoangaipa háicha. Mba’érehepa ndepochýta mayma ijatýva ndive.

23Upémaramo Ñanderuete oñe’ẽ Moiséspe, ha he’i:

24Eñe’ẽve Israelguakuérape ha ere: Pejei Core, Datan ha Abiram róga tymba pirekueguigua ypýgui.

25Upémaramo Moises opu’ã ha oho Datan ha Abiram rendápe, ha umi Israel karai ancianokuéra oho joa hapykuéri.

26Ha Moises oñe’ẽ opaite oñembyatývape, ha he’i: Pejei ko’ã kuimba’e iñañáva róga tymba pirekueguigua ypýgui, ha ani pepokótei mba’eve imba’ekuéra rehe, ani hag̃ua peẽ pemano avei hi’angaipakuéra rehe.

27Ha ojei hikuái Core, Datan ha Abiram róga tymba pirekueguigua jerekuégui; ha Datan ha Abiram osẽ ha oñembo’y hogakuéra rokẽme, hembirekokuéra opaite, ita’ýra ha imitã ra’ymimi ndive.

28Ha Moises he’i: Ko’ã mba’e rupi peikuaáta Ñanderuete chembou hague ajapo hag̃ua ko’ã mba’e, ha ndajapoiha mba’eve chejehegui reínte.

29Ko’ãva omano ramo ambue kuimba’e ha kuñakuéra omano háichante, upéicharamo ojekuaáta Ñanderuete nachemboúi hague.

30Ñanderuete katu ojapo ramo mba’e pyahu, ha pe yvy ojejurupe’a ramo ha omokõ ramo ichupekuéra opaite imba’e ha hekove reheve oikéta ramo omanomava’ekue retãme, upéicharamo peikuaa porãta ha’ekuéra oñembohory hague Ñanderuete rehe.

31Ha ojehu, he’ipávo ko’ã mba’e, pe yvy ojeka ipy guypekuéra,

32ha pe yvy ojejurupe’a ha omokõ ichupekuéra, hogakuéra, ha opaite tapichakuéra oĩva guive Core ndive, ha opaite imba’erepy reheve.

33Ha’ekuéra oike hekove reheve omanómava retãme opaite mba’e oguerekóva reheve ha pe yvy ojejaty jevy ha ndojehechavéima ichupekuéra.

34Ha mayma Israelgua oĩva’ekue guive ijerekue rehe, okañy sapukaipópe upégui ha he’i hikuái: Anítei pe yvy ñanemokõtei avei ñandéve.

35Ñanderuete renondégui osẽ avei tata, ha ohundi umi 250 kuimba’épe oikuave’ẽva pe mba’e ryakuã porãva.

36Upéramo Ñanderuete oñe’ẽ Moiséspe, ha he’i:

37Ere Eleazar, pa’i Aaron ra’ýpe: Embyaty imyatatĩhanguéra tata rendýgui, ha eñongatu amo gotyove; umi tembiporu oñemboykemava’ekuégui pende Ruetépe g̃uarã.

38Imyatatĩha rupi ijarakuéra oñemoangaipava’ekue; ko’ág̃a peinupã umía martíllope ha pemopererĩ, pemo’ã hag̃ua pe kuave’ẽmby renda tápia; oikuave’ẽgui hikuái ipype ha oñemboykemava’ekuégui Ñanderuetépe g̃uarã, ha oikóta mandu’aha ramo Israel ñemoñarenguérape g̃uarã.

39Ha pa’i Eleazar ombyaty umi omanombava’ekue myatatĩha bronceguiguáva; ha oinupãuka martíllope ha omopererĩ porã rire oiporu oñu’ã hag̃ua kuave’ẽmby renda tápiare.

40Israel ñemoñarenguéra imandu’a hag̃ua Aaron ñemoñarenguérante oikuave’ẽva’erãha mba’e ryakuã porã Ñanderuete renondépe, ha ani hag̃ua ojehu ichupekuéra Core ha iñirũnguérape ojehu haguéicha ha Ñanderuete he’i haguéicha ichupe Moises juru rupi.

41Ambue árape Israel ñemoñarenguéra aty oñe’ẽ pohýi Moisésre ha Aaron rehe, ha he’i: Peẽ pejuka Ñanderuete retãyguakuérape.

42Ha ojehu oñembyatývo pe aty opu’ã Moises ha Aaron rehe, ha ha’ekuéra oma’ẽ pe óga jojohuha rehe, pe arai omo’ãmbaite pe óga jojohuha ha Ñanderuete reko jajaipa ojehechauka ichupekuéra.

43Ha Moises ha Aaron ou pe óga jojohuha renondépe.

44Ha Ñanderuete oñe’ẽ Moiséspe, ha he’i:

45Pejei ko aty kóa pa’ũgui, ha peteĩ sapy’aitépe ahundipáta ichupekuéra. Ha ha’ekuéra oñesũ tĩndyhápe.

46Ha Moises he’i Aarónpe; Ejapyhy mba’e myatatĩha, ha emoĩ ipype tata pe kuave’ẽmby rendágui ha emoĩ hi’ári mba’e ryakuã porãva ha pya’e tereho pe aty oĩha gotýo remoĩ porã jevy hag̃ua ichupekuéra, Ñanderuete oñepyrũmagui ohavira ha pe ñemanoguasu ohupitýma ichupekuéra.

47Upémaramo Aaron ogueraha pe mba’e myatatĩha, Moises he’i haguéicha, ha oñani pe aty oĩháme; ha péina pe ñemano oñepyrũmara’e tetãyguakuéra apytépe; ha ha’e omoĩ pe mba’e ryakuã porãva ohupity hag̃ua pe perdon.

48Ha ha’e oñembo’y jave umi omanomava’ekue ha oikovéva gueteri pa’ũme; opi pe ñemano.

49Umi omanómava’ekue oĩkuri 14.700, ojepapa’ỹre umi omanomava’ekue Core ha iñirũnguéra ndive.

50Upéi Aaron oho jevy Moises rendápe pe óga jojohuha rokẽme, opímagui pe ñemano.