Matéo 22 - Biblia en Guaraní - ?anderuete ?e’? Por? 2015

Oñehenói mendahápe

1Ha Hesu oñe’ẽ jevývo hendivekuéra oñepyrũ ñe’ẽ mbojoja rupive ha he’i:

2Ñanderuete retãguasu ojoguaite peteĩ tetã ruvichaguasúpe ojapóva vy’aguasu ita’ýra omenda ramoguare.

3Ha omondo hembiguaikuérape ohenóivo ojeju hag̃ua pe mendahápe. Ha umi oñehenóiva ndouséi.

4Ha omondo jevy ambue hembiguáipe, he’ívo: Ma’ẽ, ambosako’ipáma karuguasurã che rymba tóro ha che rymbakuéra ikyráva ojejukapáma, oñekotevẽva guive oĩmbaitéma, peju katu pe mendahápe.

5Ha’ekuéra katu nopenái hese, ha ohopa joa ikokuépe ha iñemuháme;

6ha ambue katu oapresa umi tembiguáipe ha ojahéi hese ha ojuka.

7Ha pe tetã ruvichaguasu ipochy opytávo, ha omondo isoldadokuéra ha ojukapa umi oporojuka reívape, ha ohapypa itavakuéra.

8Upémaramo he’i hembiguaikuérape: Oñembosako’ipáma ningo pe mendarã, ha umi oñehenoiva’ekuépe ndaijái voi ou hag̃ua mendahápe.

9Upévare tapeho ko’ág̃a umi cálle joasaha rupi, ha opaite pejohúvape pehenói ou hag̃ua mendahápe.

10Ha umi tembiguái osẽ ha ombyaty opaite ojohúvape guive, heko vaíva ha heko potĩvape; ha pe mendahápe henyhẽte umi kuimba’e ha kuña oñehenoiva’ekuégui.

11Ha pe tetã ruvichaguasu oike ohecha hag̃ua umi oguapývape imesápe, ha ojohu upépe peteĩ kuimba’e oñemonde’ỹva ao mendahápe g̃uarãicha.

12Ha oporandu ichupe: Nde che angirũ (amígo), mba’éicha piko reikéra’e ko’ápe, mendaha pegua ao’ỹre. Ha ha’e okirirĩ ichugui.

13Upémaramo pe tetã ruvichaguasu, he’i hembiguaikuérape: Peipykua ha peipokua, ha pemombo okápe pytũháme, upépe oikóta tasẽ ha tãi pururũháme.

14Heta ningo oñehenóiva, ha mbovymi umi ojeporavótava.

Oñeme’ẽva’erã impuésto

térãpa nahániri

15Upéramo fariseokuéra oho ha oñomongeta hikuái oñondive mba’éichapa ikatu oity Hesúpe iñe’ẽ rupive iñuhãme.

16Ha ombou hendápe hemimbo’ekuéra, umi Heródes reheguáva ndive, oporandu hag̃ua Hesúpe: Mbo’ehára roikuaa ningo nde rehayhuha pe añeteguáva, ha rembo’eha Ñanderuete rape hekópe, ha nderekyhyjeiha avavégui, Nde nerema’ẽigui yvyariguakuéra rehe, mba’eichaguápa ha’e.

17Eréna oréve, mba’épa hi’ã ndéve: Iporãpa ñame’ẽ impuésto Róma ruvichaguasu Césarpe, térãpa nahániri.

18Ha Hesu ohechakuaágui iñañaha hikuái, he’i: Mba’érehepa peẽ chepy’ara’ã vai, peẽ tova mokõi.

19Pehechauka chéve pe pirapire oñeme’ẽva’erãva impuésto ramo. Ha ogueru ichupe hikuái peteĩ denário (monéda ovaléva 6 grámo óro morotĩ).

20Ha Hesu oporandu ichupekuéra: Máva ra’ãngápa kóva ha máva rérapa ojehai hese.

21Ha he’i ichupe hikuái: César mba’e. Upévo Hesu he’i ichupekuéra: Peme’ẽ Césarpe, César mba’éva, ha Ñanderuetépe, Ñanderuete mba’éva.

22Ohendúvo iñe’ẽ ohecharamo joaite, ha oheja ichupe, ha ohopa hikuái upégui.

Umi oikove jevýtava, omendátapa térã nahániri

23Upe árape oñemboja Hesu rendápe umi saduceokuéra, ndogueroviáiva ojeikove jevytaha, ha oporandu ichupe:

24Mbo’ehára, Moises ningo he’imava’ekue: Oĩ ramo peteĩ kuimba’e omendáva omano ramo ita’yra’ỹre, ityvýra tomenda hembirekokue rehe, omoheñói hag̃ua ñemoñare ityke’ýra rérape g̃uarã, (Deuteronómio 25,5-6).

25Oĩ ningo ore apytépe 7 kuimba’e ojoryvýva; pe ijypykue omenda ha omano ita’yra’ỹre; ha hembirekokue opyta ityvýrape g̃uarã;

26ha upéicha avei ojehu pe mokõiha peguápe, ha pe mbohapyha peguápe, ha pe sieteha pegua peve.

27Ha’ekuéra omanomba rire, ipahápe omano avei pe kuñakarai.

28Ha ojeikove jevyha árape mavaite hembirekótapa ha’e. Hekovépe, umi sietevéva hembirekova’ekue.

29Ha Hesu ombohovái ichupekuéra: Pejavy, ndapeikuaáigui Ñanderuete kuatiañe’ẽ ni Ñanderuete pu’aka.

30Ojeikove jevývo ningo ndaiporimo’ãi menda ni noñemomendamo’ãi; pe yvágape ningo ojeikóta umi yvága rembiguaichaite (angelkueraichaite).

31Ha napemoñe’ẽi piko Ñanderuete kuatiañe’ẽ he’íva umi omanomava’ekue rehe, ha Ha’e he’iva’ekue peẽme:

32Che ha’e Abraham Jára, Isaac Jára, Jacóbo Jára; Ha’e ndaha’éi omanóva Jára, oikovéva Járante.

33Ohendúvo upéva hetãyguakuéra ohecharamo joa imbo’epy ha tĩndyhápe oho hikuái.

Pe tembiapoukapy ituichavéva

34Umi fariseokuéra oikuaávo Ha’e omokirirĩ porã hague saduceokuérape. Oñembyaty ha oñemongeta hikuái oñondive.

35Ha peteĩva, umi fariseokuéra apytégui, oikuaa porãva Moises rembiapoukapykuéra, oporandu Hesúpe:

36Mbo’ehára, mba’eichagua Ñanderuete rembiapoukapy apytépe pe ituichavéva.

37Ha Hesu he’i ichupe: Ehayhu Ñanderuetépe, nde Járape, nde py’aite guive, ha ne angaite guive ha ne apytu’ũnguaite guive (arandukue reheve).

38Kóva ningo pe tembiapoukapy tenondeveguáva ha pe ituichavéva.

39Ha pe mokõiha pegua ningo koichaguaiténte avei: Rehayhuva’erã nde rapichápe, nde rejehayhu haichaite.

40Ha ko’ã mokõi tembiapoukapy rehe oñeñapytĩ (oñembojoapy) opaite Moises rembiapoukapykuéra ha profetakuéra ñe’ẽnguéra.

Máva ra’ýpa Hesu Crísto

41Ha Hesu oporandu umi fariseokuéra oñembyatývape:

42Mba’épa peje pe Crísto rehe. Máva ra’ýpa Ha’e. Ha’ekuéra he’i: David ra’y ningo.

43Ha Hesu he’i jevy ichupekuéra: Ha mba’éicha piko David, Pytu Porãmbáva rupive, ombohéra ichupe, che Jára, he’ívo:

44Pe Jára he’i che Járape: Eguapy che akatúa gotýo, amoĩmba peve nde py guýpe, nderehe ija’e’ỹvape.

45Ha David ohenói ramo ichupe che Jára, mba’éicha piko ita’ýrata.

46Ha avave noporandusevéi ichupe mba’eve.