Isaías 3 - Biblia en Guaraní - ?anderuete ?e’? Por? 2015

Ñanderuete ombojovake Juda ha Jerusalénpe

1Pejesarekóke, Ñanderuete, yvága atykuéra Jára, oipe’áta Jerusalen ha Judágui: Ipytyvõ, ipan, hi’upyrã ha hi’y oikotevẽva.

2Oipe’áta avei ipy’aguasúva, isoldadokuéra, imbojovakehára, iproféta, imba’ekuaáva (oha’yvõva) ha karai ancianokuérape;

3oipe’áta avei isoldádo ruvicha, 50 soldádo arigua, umi oporohekombo’éva, umi ikatupyryetereíva heta mba’e apópe ha ipaje apoharakuérape.

4Ha hi’arikuéra omoĩta mitãrusu imburuvicha ramo, ha iñañáva isãmbyhyhara ramo.

5Umi tetãygua oñemoĩta ojuehe, ha tapichakuéra opu’ãmbáta iñirũ rehe; mitãrusukuéra opu’ãta itujáva rehe, ha pe imboriahúva imburuvicha rehe.

6Peteĩ kuimba’e ojapyhýta ityke’ýra po, itúva rógape, ha he’íta ichupe: Nde ningo nde ao porã gueteri, reikóta oréve ore mburuvicha ramo, ejapyhy nde pópe ha eisãmbyhy ko tapere kóvare.

7Ha’e katu ombohováita upe ára upévape: Ndaikomo’ãi pene pohãnohára ramo, che rógape ndaipóri pan, ni ao amondekuaáva, upévare ani chemoĩtei mburuvicha ramo tetãyguakuéra ári.

8Jerusalen ojeitýma ha Juda ho’áma, iñe’ẽ ha hembiapo vai rupi, oñemoĩ haguére Ñanderuete rehe ha heko jajaipa rehe.

9Hova atã oñe’ẽ hesekuéra, Sodóma peguáicha omyasãi hembiapo vai, noñomivéima mba’eve. Angái, angái hi’angakuéra, omono’õ no’õgui ijupe g̃uarã mba’evai.

10Peje heko potĩvape oho porãmbataha, hembiapo porã hi’áta ha péva ho’uva’erã.

11Angái, angái, pe tekove vai ohasa asýta, ipo rembiapo vaikue oñemyengoviáta ichupe.

12Mitãrusu ojopy che retãyguakuérape ha kuñakuéra oisãmbyhy che retã. Nde, che retã, umi nesãmbyhýva nembotavy voi, ha omokarẽ nde rape.

13Yvága atykuéra Jára opu’ã ombojovake hag̃ua, Ha’e oñembo’y omohenda porã hag̃ua tetãnguérape.

14Ñanderuete ou ombojovake hag̃ua karai ancianokuéra ha mburuvichakuérape. Peẽ voi pemonandi parraltykuéra ha pemyenyhẽ pende rógape umi mba’e peipe’amava’ekue mboriahukuéragui.

15Mba’éicha rupípa peẽ pepyrũ che retãyguakuéra rehe ha pehundi peiporiahuvereko’ỹre mboriahukuérape, ko ñe’ẽ kóva Ñanderuete, yvága atykuéra Jára he’ígui voi penderehe.

Jerusalen kuñakuéra ojehaviráta

16Ñanderuete he’ive: Israel rajykuéra oñembotuicha ha omopu’ã iñakã oma’ẽ tie’ỹ vai ha ojehechauka hag̃ua oñemokoni konimba, ha ipykuéra ombojeroky roky,

17upévare Ñanderuete omoperõta Sion rajykuéra akã, Ha’e omboíta iñakã ahoja omotĩete hag̃ua.

18Upe ára upévape Ñanderuete oipe’áta ichuguikuéra opaichagua jeguaka oiporúva ipýre, isyváre ha ijajúrare:

19Inamichãi, umi jeguaka oiporúva ipyapýre ha oipe’áta avei pe ao pererĩ oñuãva hova,

20ijao jeguaka akã ha akã rague rehegua, umi mba’e ryakuã porã ryru ha ijajurigua,

21ikuãirũ, itĩjeguaka,

22oipe’áta avei ijao hepýva, ijahoja’i, ijao ajúra pegua, ipóncho porã,

23 ijespéjo, ijao hepýva, ijaorã pererĩ ha iñakã jeguakáva.

24Ha umi mba’e ryakuã porã rãngue oĩta mba’e inéva; ha ku’a jopyha rekovia oĩta tukumbo vakapikueguigua, akã rague ñemohenda porã rekovia oñemoakã perõta; ao hepýva rãngue oñemondéta ao vosakuépe ha kuña rova porã rekovia oĩta kuña rova pere.

25Ne kuimba’ekuéra ho’ava’erã kyse pukúpe, ha nde py’aguasúva remanova’erã ñorãirõme.

26Táva rokẽnguéra, ha’ekuéra oñembyaty haguépe, oñembyasýta ha oñemondéta ao vosakuépe ha ha’eñoite oguapýta tyre’ỹ ramoguáicha yvy timbópe.