Levítico 19 - Biblia en Guaraní - ?anderuete ?e’? Por? 2015

Ñemboheko potĩ ha tekojoja rembiapoukapykuéra.

1Ñanderuete oñe’ẽ Moiséspe, ha he’i:

2Eñe’ẽ mayma Israel ñemoñarenguéra ijatývape, ha ere ichupekuéra: Peñemboheko porãva’erã, Che ningo Jahve, pende Jára, Che chereko porãgui.

3Oimeraẽva omomba’eva’erã isy ha itúvape, ha che jepytu’uha ára pemboareteva’erã. Che ningo Jahve, pende Jára.

4Ani pemomba’eguasu tupãnguérape téra ambue jára ra’ãngápe, ha ndapejapoiva’erã pende jararã mba’e hykupyrégui. Che ningo Jahve, pende Jára.

5Ha peikuave’ẽvo chéve kuave’ẽmby py’aguapy reheguáva, peikuave’ẽva’erã hekópe chembovy’a hag̃uáicha.

6Oje’uva’erã peikuave’ẽha árape, ha uperiregua árape; ha umi hembýva mbohapyha árape, ojehapyva’erã tatápe.

7Ha oje’u ramo ára mbohapyhápe, upéva mba’evaiete, nachembovy’amo’ãi ha ndojehupitymo’ãi py’aguapy oñeha’ãrõva.

8Ha upe ho’úva ogueraháta ijehe hembiapo vaikue, omongy’águi pende Ruete mba’e, oñemboykemava’ekue ichupe g̃uarã; ha upe tapicha upéva ojejukava’erã hetãyguakuéra apytépe.

9Remono’õ ramo nde koga’a, neremono’õiva’erã nde kokue rembe’yete peve, ha nderejeporekaiva’erã umi mba’e ho’ava’ekuére.

10Ha nde parral’a nderehekái jo’ava’erã, ha neremono’õiva’erã umi hi’a okuiva’ekue; mboriahúpe ha tetã ambueyguápe g̃uarã rehejava’erã umía. Che ningo Jahve, opavave Jára.

11Napemondaiva’erã, napendejapuiva’erã ha napeporombotavyiva’erã.

12Ani peme’ẽ rei pene ñe’ẽ che réra rehe, upéicha pemongy’áta pende Jára réra, Che ningo Jahve.

13Aníke rejopýtei nde rapichápe, ha aníke remondátei ichugui. Nderejokoiva’erã pe tembiapo repy umi omba’apóva ndéve g̃uarã ambue ára peve, ha’e oikotevẽgui pe plátare.

14Ani remaldeci ohendu’ỹvape ni hesatũvape, ani remoĩ ñepysãngaha, rekyhyjeva’erã uvei nde Járagui. Che ningo pende Ruete.

15Nde reporombojovakeva’erã hekoitépe, ani reipytyvõ imboriahúvape ni heta mba’e oguerekóvape, ombotavyse ramo pe mbojovakehárape.

16Aníke reñe’ẽ rei ne retãyguáre. Ani reñeha’ã reñohẽ hag̃ua nde rapicha ruguy ñembojovakehápe. Che ningo Jahve, pende Ruete.

17Ani ndepy’aro ne pehẽngue ndive, ha oime ramo ojavýva eavisa porã ichupe, ani hag̃ua hembiapo vai oja avei nderehe.

18Ani reñevenga ha ani ndepochýtei ne retãygua ndive, rehayhuva’erã katu nde rapichápe rejehayhu háicha ndejupe. Che ningo Jahve, pende Ruete.

19Che ñe’ẽ rejapova’erã. Nderembojehe’aiva’erã ne rymba tymba ojuehegua’ỹva ndive; nde kokuépe nereñemitỹiva’erã mba’e ra’ỹi joparápe, ha neremondeiva’erã ao iñinimbo joparaguiguáva.

20Peteĩ kuimba’e oñeno ramo peteĩ kuña tembiguáiva oñeprometemava’ekue ndive, ha ne’ĩra gueteri oñevende ichupe térã noñeme’ẽi gueteri ichupe oiko hag̃ua sã’ỹre, mokõivévape ojehavirava’erã, ndojejukaiva’erã katu umívape, pe kuña oikógui gueteri ambue kuimba’e poguýpe.

21Ha pe kuimba’e ogueruva’erã peteĩ ovecha mácho pende Ruetépe, pe óga jojohuha rokẽme, oikuave’ẽ hag̃ua kuave’ẽmby angaipa reheguáva ramo.

22Pe kuave’ẽmby rupi pe pa’i omoĩ porã jevy ichupe pende Ruete ndive ha hi’angaipa ojapova’ekue oñeperdonáma.

23Ha peikévo Canaan yvýpe ha peñotỹ ramo opaichagua yvyra hi’áva, peguerekóta hi’a tenondeguáva ku pire’i oñekytĩ’o’ỹva ramo (ndape’umo’ãi); mbohapy áño aja peguerekóta ipire oñekytĩ’o’ỹva ramo; hi’akue ndoje’uiva’erã.

24Hi’akue pe año irundyha peguare oñemboykeva’erã pende Ruetépe, oñemomba’eguasu hag̃ua ichupe.

25Ha pe áño 5-hápe katu pe’úta hi’akue, hi’a hetave hag̃ua peẽme. Che ningo Jahve, pende Ruete.

26Ndape’uiva’erã mba’evete tuguy reheve. Ndapeikoiva’erã ta’yvõ térã paje apoha rapykuéri.

27Napemoperõiva’erã pene akã rague pene akã jerekuévo, ha napeikytĩriva’erã pene rendyva apỹi ojapo háicha umi ojerovia gua’úva ijárare.

28Ha napeikarãiva’erã pende rete pire omanóva rehe, ha ndapejapoiva’erã pendejehe mba’eveichagua ta’ãnga. Che ningo Jahve, pende Ruete.

29Neremongy’aiva’erã nde rajýpe erévo ha’e oiko hag̃ua kuña reko vai ramo, ani hag̃ua pe tetã henyhẽ teko ñañágui ha oñemotĩete.

30Pemboareteva’erã che jepytu’uha ára, ha pemomba’eguasu pe óga jojohuha oĩháme. Che ningo Jahve, pende Ruete.

31Aníke peho paje apohára térã oha’yvõva rendápe; ni pemba’eporandútei anguerape; ỹrõ peẽ peñemongy’áta avei hendivekuéra. Chénte Jahve, pende Jára.

32Pe iñakã rague morotĩmbámava (itujáva) renondépe reñembo’yva’erã, ha emboete pe itujáva rova, ha nde Járagui rekyhyjeva’erã. Che ningo Jahve, pende Ruete.

33Ani pejopy pe tetã ambueyguápe, oikóva penendive pene retãme.

34Pe tetã ambueygua, oikóva pende apytépe, peguerekova’erã ichupe pendereheguáva ramo, ehayhu ichupe rejehayhu háicha, peẽ voi peikova’ekue avei tetã ambueygua ramo Egípto retãme. Che ningo Jahve, pende Jára.

35Pembojovake hekópe ha peiporu métro térã pésa heko peguáva.

36 Balánza pésa ipohýi jojava’erã. Che ningo Jahve, pende Jára, poguenohẽva’ekue Egípto retãgui.

37Pejapopa hekópe opaite che ñe’ẽ ha opaite che rembiapoukapy, Che Jahve, ha’e hagueichaite.