Romayguakuérape 11 - Biblia en Guaraní - ?anderuete ?e’? Por? 2015

Upéicharamo jepe Ñanderuete oiporiahuverekohína gueteri Israélpe

1Upévare aporanduse: Ñanderuete piko opoíma hetã Israélgui. Mba’evéicharõ. Che ningo avei peteĩ Israelgua, Abraham ñemoñare, Benjamin tríbugui.

2Ñanderuete ndopoíri hetã Israélgui, yma guive Ha’e voi oiporavova’ekue ichupekuéra. Térã piko ndapeikuaái Elías ñe’ẽ, omoĩ vaívo Israel retã Ñanderuete renondépe he’ívo:

3Che Ruete, ha’ekuéra ojuka nde profetakuérape, oity hikuái ne kuave’ẽmby rendakuéra ha oñeha’ãmba hikuái chejuka hag̃ua avei, (1 Réyes 19,10.14).

4Mba’épa Ñanderuete ombohovái ichupe: Che añongatúma chéve g̃uarã 7.000 kuimba’e noñesũiva’ekue Baal renondépe omomba’eguasu hag̃ua ichupe.

5Upeichaite ningo avei ko’ág̃a, opyta hembyremi Ñanderuete oiporavova’ekuépe, ipy’a porãgui.

6Péva ningo ojehu Ñanderuete py’aporã rupi, ndaha’éi kuimba’e térã kuña rembiapo porã rupi. Upéicha rire Ñanderuete py’aporã ndaha’eiva’erãmo’ã py’aporã añeteguáva.

7Aipórõ mba’e piko. Umi mba’e Israel retã ohupityseva’ekue ndohupitýi, umi Israelgua Ñanderuete oiporavova’ekue katu ohupitýma, ambuekuéra katu oñembopy’a hatãma,

8ojehai háicha: Ñanderuete oñohẽ Israel retã ári peteĩ pytu ombohopehýiva ichupekuéra, ha ombotýva hesakuéra ani hag̃ua ohecha hikuái, ha omboty ijapysakuéra ani hag̃ua ohendu hikuái, ha péva ojehu ko ára kóva peve, (Isaías 29,10).

9Ha David he’i: Imesakuéra toiko henondepekuéra iñuhã ramo ha ifiestakuéra iñepysãngahakuéra ramo, (Salmokuéra 69,22-23).

10Ta’iñypytũ hesakuéra ohechave’ỹ hag̃uáicha, ha ijatúa taikarapã tapia g̃uarã.

11Che ningo ha’e: Oñepysãnga piko Israelguakuéra ho’aite hag̃ua. Mba’evéicharõ. Israelguakuéra oñepysãngágui og̃uahẽ meve salvacion tetã ambueyguakuérape g̃uarã, Israel oñembopy’a hakate’ỹ ha oñemokyre’ỹ hag̃ua avei.

12Israel ñepysãnga ogueru heta mba’eporã opaite ambue tetãnguérape, ha Israel rembiapo vai rupi ambue tetãnguéra oikuaa pe salvacion rape, mba’e piko oikóne tetã ambueyguakuérape, Israel oñemboheko porã ramo avei.

13Che ha’ese peẽ tetã ambueyguakuérape, che voi ningo tetã ambueygua apóstol, kóva he’ise Ñanderuete remimbou ichupekuéra g̃uarã, ha che amomba’e che rembiapo:

14Che añeha’ã ambopy’a kyre’ỹ hag̃ua Israel retãyguakuérape ojesalva hag̃ua mbovymi jepe ijapytégui.

15Israel oñemboykégui Ñanderuetégui ambue tetãnguéra oñembopy’apeteĩ Ñanderuete ndive, mba’e piko ojehúne opaite tetãnguérape, Israel oñembopy’apeteĩ jevy ramo avei Ñanderuete ndive, katuete omombáyta heta tetã ambueyguakuérape ñemanógui, tekove añeteguápe g̃uarã.

16Pe pan tenondeguáva oñemboykéma ramo Ñanderuetépe g̃uarã, ko’yteve pe mása oñembopatukamava’ekue, ichugui ojejapova’ekuégui pe pan tenondeguáva. Ha máta hapo oñemboykéva Ñanderuetépe g̃uarã, katuete hakãnguéra oñemboyke avei Ñanderuetépe g̃uarã.

17Oñekytĩ’o ramo mbovymi olívo yvyra rakã ijyvyra mátagui ha nde ramo pe olívo rakã ka’aguyguigua oñemoĩva’ekue hendaguépe, eikuaa porãke, nde reikoveha ko olívo máta rykuere porãitégui,

18upévare ani reñembotuicha rei umi ambue hakãnguéra rehe, ha reñembotuicha ramo, eikuaa porãke, nandéi remongaruha pe olívo yvyra rapo, hapokuéra omongaru uvei opaite yvyra rakãnguéra hykuere porãite rupi, ha ndéve avei.

19Ha sapy’a rembohovaise ramo, ha ere mbovy hakãnguéra oñekytĩ’ova’ekue che añemoinge hag̃ua hendaguépe.

20Añete ningo, eikuaa porã katu, hakãnguéra oñekytĩ’ova’ekue ndojeroviáigui, ha nde rejeroviágui reñemoingemava’ekue hendaguépe, upévare ani reñembotuicha, ekyhyje uvei.

21Ñanderuete noperdonái ramo oikytĩ’o hag̃ua imáta rakãteévape, cháke, ko mba’e kóva ojehukuaáne ndéve avei.

22Ema’ẽ porãke, Ñanderuete ipy’a porã, Ha’e katu ohavirakuaa avei. Ñanderuete ohavira umi iñe’ẽrendu’ỹvape, ha nde neñe’ẽrendu porã ramo Ha’e ohechaukáta ipy’aporã, repoi ramo katu Ñanderuetégui, Ñanderuete nekytĩ’óta avei pe ijyvyra mátagui.

23Ha umi Israelgua oñekytĩ’ova’ekue (Ñanderuete yvyrágui), Ñanderuete ombojoaju jevýta ichupekuéra ojerovia jevy guive hese. Ñanderuete pu’aka imbaretete ombojoaju jevy hag̃ua.

24Nde, ñepyrũ guive, peteĩ olívo ka’aguyguigua (ojerovia’ỹva), upéicharamojepe nembojoajúma ijyvyra olívo máta rehe, ko’yteve Ha’e ombojoajukuaa porãve ijyvyra rakãteévare (Israelguakuérare).

Israel retã ojesalváta

25Che hermanokuéra, aipota peẽ peikuaa porã ko mba’e ñemi kóva: Ani peẽ peimo’ã penearanduha: Israel retã oñembopy’a hatãta oikepa peve opaite tetã ambueyguakuéra apytégui umi ojesalvava’erãvante.

26Uperire aémante opaite Israelgua hembýva ojesalvava’erã avei, ojehai háicha. Ouva’erã Jerusaléngui pe osalvátava Israelguakuérape, Ha’e oipe’a hag̃ua ijapytégui iñañangue, (Isaías 59,20-21).

27Ha Che añembopy’apeteĩta Israel ndive, ha ha’éma avei aipe’ataha hi’angaipakuéra.

28Ko’ág̃a heta Israelguakuéra oñemoĩ gueteri Hesu Crísto evangélio rehe ha upévare avei penderehe, upeichavéramo jepe Ñanderuete ohayhuhína Israelguakuérape iñepyrũha ára guive, Ha’e oiporavógui ichupekuéra.

29Araka’eve Ñanderuete ndopoimo’ãi hetã Israélgui, ni ndoipe’a jevymo’ãi iporiahuvereko me’ẽmby ome’ẽmava’ekue Israélpe.

30Peẽ voi ymave napeneñe’ẽrenduiva’ekue avei Ñanderuetépe, ko’ág̃a katu pehupity Ñanderuete poriahuvereko, Israel naiñe’ẽrendúigui.

31Upéicha avei Israel ko’ag̃agua naiñe’ẽrendúi, ha ndoipotái gueteri Ñanderuete poriahuvereko peteĩ jopói ramo, peẽ katu pehupitýma, opáichavo katuete og̃uahẽtahína pe ára Israelguakuéra ohupitytaha avei Ñanderuete poriahuvereko (grácia).

32Ñanderuete ombyatypa opavavépe pe ñe’ẽrendu’ỹ poguýpe, oiporiahuvereko hag̃ua opavavépe.

33Ñanderuete imba’eita, iñarandu ha ikuaapy ipypukuete. Ñande yvyariguakuéra ndaikatúi ñamyesakã ni jaipyguara, ñande yvyarigua arandu rupi, Ñanderuete rapekuéra ni imbojovakekuéra.

34Máva piko oikuaa Ñanderuete pensamientokuéra. Térã máva piko ohekombo’eraka’e ichupe.

35Térã máva piko ome’ẽ raẽ Ñanderuetépe peteĩ mba’e, Ha’e omyengovia jevy hag̃ua (Job 41,2).

36Opaite mba’e oĩva guive ou voi ichugui, ojejapo Ha’érupi ha oiko ichupe g̃uarã, upévare toñemomba’eguasu Ñanderuetépe opaite ára atyguasukuéra pukukue.