Galaciayguakuérape 2 - Biblia en Guaraní - ?anderuete ?e’? Por? 2015

Umi ambue apostolkuéra

oñembopy’apeteĩ Páblo ndive

1Ohasa rire 14 áño, che aha jevy Jerusalénpe Bernabe ndive, ha agueraha avei Títope chendive.

2Che aha Jerusalénpe Ñanderuete ojehechaukágui chéve ahava’erãha. Ha aikuaauka Hesu Crísto iglésia karai ancianokuérape pe evangélio che amyasãiva ambue tetãnguéra apytépe, ha añoháme ohendu hag̃ua hikuái che jurúgui che rembiapokue, hesakuérapepa iporã térã nahániri.

3Ha Títo oĩ upérõ chendive, ha’e ningo peteĩ Greciaygua, nombopire’i’oukái (noñecircuncidaukái) jepe hikuái ichupe.

4Ore katu roñemoĩ umi hermáno gua’u rehe, oikeva’ekue ñemiháme ore apytépe oipyguara hag̃ua pe sãso (libertad) roguerekóva Hesu Crísto ndive, ha orejopy hikuái ore roiko jevy hag̃ua Moises rembiapoukapykuéra poguýpe.

5Umi hermáno gua’u poguýpe ningo ore noroñemoĩri sapy’amínte jepe, pe evangélio añetegua opyta hag̃ua peẽme g̃uarã oñemoambue’ỹre.

6Ha umi apóstol nachembo’éi mba’eve ipyahúva. Heta voi ningo oĩ oñembotuichaséva apostolkuéra renondépe, che nahániri, Ñanderuete katu noma’ẽi avei yvyarigua rerakuã porã rehe.

7Upéva rãngue ha’ekuéra ohechakuaa porã avei Ñanderuete oipotaha che amyasãi Hesu Crísto evangélio Israelgua’ỹvape, Pédro omyasãi háicha pe evangélio Israelguakuérape.

8Ñanderuete pu’aka omba’apo porã háicha Pédrope omyasãi hag̃ua pe evangélio Israelguakuéra apytépe, upéicha Ñanderuete omba’apo avei chepype che amyasãi hag̃ua Hesu Crísto evangélio Israelgua’ỹva apytépe.

9Upéicha Jacóbo, Pédro ha Juan, ojererekóva umi omyakãva ramo Hesu Crísto iglésia (Jerusalénpe) ohechakuaa porã Ñanderuete cherenói hague imborayhu rupi, upévare orepopyhy hikuái, chéve ha Bernabépe, ha he’i oréve roho hag̃ua romyasãi Hesu Crísto evangélio Israelgua’ỹvape, ha’ekuéra omyasãi háicha Israelguakuéra apytépe.

10Ojerurénte oréve oremandu’ami hag̃ua mboriahukuéra rehe (oikovahína Jerusalénpe), ha upéva ningo añeha’ãmba ajapo hag̃ua avei.

Páblo oñe’ẽ pohýi Pédrope

11Upéi Pédro ou ramoguare Antioquíape, hovápe che añemoĩ hese ha’e ojejavy haguére.

12Pédro okarúgui Israelgua’ỹva ndive Jacóbo remimondokuéra og̃uahẽ mboyve hendápe, ha Jacóbo remimondokuéra ou rire, Pédro oñemomombyry ha ndokarusevéi Israelgua’ỹva ndive, okyhyjégui umi Israelguakuéragui.

13Upéramo umi ambue Israelgua, ojeroviáva Hesu Crísto rehe, oñembohova mokõi avei Pédro ndive, ha Bernabe jepe hova mokõi avei.

14Ha ahecháma ramo ha’ekuéra ndoikói pe evangélio he’i háicha, ha’e Pédrope opavave rovake: Nde Judaygua ramo, mba’érehepa reiko Judaygua’ỹva rekópe ha rejopy gueteri Judaygua’ỹvape oiko hag̃ua Judaygua rekópe.

15Ñande ñanace Judaygua ramo, upéicharõ ñande ndaha’éi tetã ambueyguakuéra angaipavóra.

16Jaikuaa ningo yvyariguakuéra noñemboheko potĩri ojapo ramojepe Moises rembiapoukapy, ojerovia rire uvei Hesu Crísto rehe ae, ha ñande avei jajeroviáva guive Hesu Crísto rehe Ha’e ñanemopotĩ, ndaha’éi jajapo haguére Moises rembiapoukapykuéra, avave noñemboheko potĩkuaáigui ojapo ramojepe Moises rembiapoukapykuéra.

17Ñande jaheka ramo pe teko potĩ (justícia) Hesu Crísto rupi jajeroviágui hese ha jaiko ramo gueteri pe angaipa poguýpe, upéicharamo Hesu Crísto oiko avei angaipa rembiguái ramo, ha péva ndikatuiete.

18Hesu Crísto chepe’a riréma pe Moises rembiapoukapy poguýgui, ha che voi ajesalvase jevy ramo ajapógui Moises rembiapoukapy che pu’aka rupi, upéicharamo Hesu Crísto omano rei chéve g̃uarã, ha che aiko gueteri angaipa poguýpe; angaipavóra oñeperdona’ỹva ramo.

19Moises rembiapoukapy rupi amanóma ko’ã tembiapoukapy ko’ãvape g̃uarã, aikove hag̃ua Ñanderuetépe g̃uarã, (Hesu Crísto rembiapo porã kurusu rehe).

20Che añembokurusúmagui Hesu Crísto ndive, ndaikovéima che, Hesu Crísto oikógui chepype. Che aikove ramojepe che ro’ópe, aikove che jerovia rupi Ñanderuete Ra’y rehe, Ha’e cherayhúgui ha oñeme’ẽmava’ekue che aikove hag̃ua Ha’érupi.

21Che namboykéi Hesu Crísto mborayhu (ojehechaukámava iñemano rupi); añemboheko potĩse rire, ajapóvo Moises rembiapoukapy, Hesu Crísto omano reieteva’erãmo’ã chéve g̃uarã.