Zacarías 5 - Biblia en Guaraní - ?anderuete ?e’? Por? 2015

Pe kuatiañe’ẽ jejokuapy ovevéva Pe techapáy 6-ha

1Ha ajesaupi jevývo, ojehechauka chéve peteĩ kuatiañe’ẽ jejokuapy ovevéva.

2Ha he’i chéve: Mba’épa rehecha. Ha che ha’e ichupe: Ahecha peteĩ kuatiañe’ẽ jejokuapy ovevéva, ipukukue 8,75 métro ha ipykue 4,37 métro.

3Upéramo he’i chéve: Kóa ningo pe maldicion ohupitýtava ko tetã kóvape. Umi omondáva guive ojehaviráta ha umi ome’ẽva iñe’ẽ japu reheve ojehaviráta avei.

4Che aguenohẽuka ko maldicion kóva, he’i ángel atykuéra Jára, oiko ha opyta hag̃ua umi ógape, ijára oñe’ẽme’ẽ reíva che rérape ha umi omondávape, ombokusuguepa peve ijyvyrakuéra ha ijitakuéra jepe ikusuguepáta.

Pe kuña oĩva kambuchípePe techapáy 7-ha

5Upéi osẽ pe yvága rembiguái oñe’ẽ hag̃ua chendive ha he’i: Ejesaupi ko’ág̃a, ha ema’ẽmi umi mba’e rehe ojehechaukavétava ndéve.

6Ha che ha’e: Mba’e piko péva. Ha ha’e he’i chéve: Kóva hína peteĩ kambuchi; ha he’i avei: Kóva ningo tetãnguéra rembiapo vai.

7Ema’ẽ porãke, ojehupívo iñembotyha plomoguiguáva ojehecha peteĩ kuña oguapýva pe kambuchi ryepýpe.

8Kóva ningo pe ñaña reko, ha omyaña jevy pe kuña pe kambuchi ryepýpe, ha omboty jevy ijuru iñembotyha plomoguiguávape.

9Uperire ajesaupi, ha ama’ẽvo ahecha mokõi kuña og̃uahẽvahína, ipepokuérape oipeju yvytu, ipepo ku tujujúicha ha ohupi hikuái pe kambuchi ha ogueraha pe yvy ha araikuéra pa’ũme.

10Upéi aporandu pe yvága rembiguáipe: Moõpa ogueraha hikuái pe kambuchi.

11Ha ha’e he’i chéve: Oñemopu’ã hag̃ua ichupe itupão Babilónia retãme, ha oñembosako’ipa rire omoĩta hikuái ipyendag̃ua ári.