1Acab omano rire, Moabguakuéra opu’ã Israelguakuéra rehe.
2Ha Ocozías ho’a hóga yvate Samária pegua rovetãgui ha oñehũnga vaieterei, upévare ohenói hembijokuaikuérape ha he’i ichupekuéra: Tapeho ha pemba’eporandu Baal-zebub (mberu jára), Ecron járape, akuerátapa ko mba’asy kóvagui.
3Upéramo Ñanderuete yvága rembiguái oñe’ẽ Elías, pe Tisbeguápe, he’ívo: Epu’ã ha ehug̃uaitĩ tetã ruvicha rembijokuaikuéra ndive, ha ere ichupekuéra: Ndaipóri piko Israélpe pende Ruete, peho hag̃ua pemba’eporandu Baal-zebub, Ecron járape.
4Upévare péicha Ñanderuete he’iuka: Ocozías nopu’ãmo’ãvéi máramo hupágui, katuete omanóta. Ha Elías oho jevy.
5Ko’ã tembijokuái ojevývo tetã ruvicha rendápe, Ocozías oporandu ichupekuéra: Mba’érehe piko peju jevy pya’eiterei.
6Ha’ekuéra he’i ichupe: Rojohu peteĩ kuimba’e he’iva’ekue oréve: Tapeho ha pejevy tetã ruvicha rendápe, ha peje ichupe: Péicha he’iuka Ñanderuete: Ndaipóripa peteĩ Jára Israel retãme, remondo hag̃ua remba’eporandúvo Baal-zebub, Ecron járape. Upévare nde rupágui nerepu’ãmo’ãvéima, añetehápe remanóta.
7Upémaramo Ocozías he’i ichupekuéra: Mba’éicha piko ra’e pe kuimba’e pejohuva’ekue tapére, he’iva’ekue peẽme ko’ã mba’e ko’ãva.
8Ha ha’ekuéra he’i jevy ichupe: Peteĩ kuimba’e ijao havijupáva, ha oiporúva peteĩ ku’a jokuaha vakapiguiguáva. Upévo ha’e he’i: Péva Elías, pe Tisbegua.
9Upéi, Okozías omondo ipiári peteĩ soldádo ruvicha, 50 soldádo reheve, ha oho hikuái Elías rendápe; ha péina Elías oguapyhína peteĩ cérro ru’ãme. Ha pe soldádo ruvicha he’i ichupe: Ñanderuete rembiguái, tetã ruvicha he’iuka ndéve reguejy hag̃ua.
10Ha Elías he’i pe soldádo ruvichápe: Che, Ñanderuete rembiguái ramo, to’a tata yvágagui ha tanehundi ne 50 soldádo reheve. He’ipávo, ho’a tata yvágagui ha ohundi ichupe ha avei umi 50 kuimba’e hendive oĩvape.
11Upéi tetã ruvicha omondo jevy ambue soldádo ruvicha 50 kuimba’e reheve; ha oñe’ẽ Elíaspe he’ívo: Ñanderuete rembiguái, tetã ruvicha he’iuka ndéve: Pya’e eguejy.
12Ha Elías he’i ichupe: Che Ñanderuete rembiguái ramo, to’a tata yvágagui, ha tanehundi ne 50 irũnguéra reheve. Upévo, ho’a tata yvágagui ha ohundi avei ichupe ha avei umi 50 hendiveguápe.
13Ha Ocozías omondo jevy ambue soldádo ruvicha 50 soldádo reheve; ha pe mburuvicha péva og̃uahẽvo Elías rendápe oñesũ ha omba’ejerure ichupe, he’ívo: Ñanderuete rembiguái, ajerure ndéve remomba’emi hag̃ua che rekove ha ko’ã ne rembiguaikuéra rekove.
14Aikuaa porã ningo ho’áma hague tata yvágagui ha ohundi mokõi soldádo ruvicha ha 100 soldádope; ko’ág̃a ko che rekove to’a porã nde resa renondépe.
15Upémaramo Ñanderuete yvága rembiguái he’i Elíaspe: Tereho hendive, ani rekyhyje ichugui. Ha ha’e opu’ã ha oguejy hendive tetã ruvicha rendápe.
16Ha Elías he’i ichupe: Péicha he’iuka ndéve Ñanderuete: Remondo haguére ne rembijokuaikuéra omba’eporandu hag̃ua Baal-zebub, Ecron járape, ndaipóri ramoguáicha Israélpe pende Jára remba’eporandu hag̃ua, upévagui nerepu’ãmo’ãvéi nde rupágui, katuete remanóta.
17Ha Ocozías omano, Ñanderuete he’i haguéicha Elías juru rupi. Ha ityvýra Joram oisãmbyhy hendaguépe, Ocozías ndaita’ýraigui; ha péva ojehu pe ambue Joram, Josafat ra’y, Juda retã ruvicha, oñepyrũvo oisãmbyhy mokõi áño.
18Ambue Ocozías rembiapokue ojehaipa umi Israel retã ruvichakuéra rembiapokue kuatiañe’ẽme, (Crónicas).
Who We AreWhat We EelieveWhat We Do
2025 by iamachristian.org,Inc All rights reserved.
