2 Réyes 15 - Biblia en Guaraní - ?anderuete ?e’? Por? 2015

Azarías oisãmbyhy Judayguakuérape

1Jeroboam ombotývo 27 áño Israel retã ruvicha ramo, Azarías, Amasías ra’y, oñepyrũ oisãmbyhy Juda retãme.

2Oñepyrũvo oisãmbyhy oguereko 16 áño, ha oisãmbyhy 52 áño Jerusalénpe; isy hérakuri Jecolía, peteĩ Jerusalengua voi.

3Ha ojapo iporãva Ñanderuete resa renondépe, itúva Amasías ojapo haguéicha.

4Upeichavéramo jepe ndoje’íri umi yvy yvate, Judayguakuéra oikuave’ẽ ha ohapyha gueteri mba’e ryakuã porã.

5Ha Ñanderuete ombohasy tetã ruvichápe léprape; ha péicha oiko omanoha ára peve, ha oiko ha’eñoháme ambue ógape, ha ita’ýra Jotam poguýpe opyta tetã ruvicha rogaguasu ha ha’e oisãmbyhy hetãyguakuérape.

6Ambue Azarías rembiapokue, ha opaite mba’e ojapova’ekue, ojehaipa Juda retã ruvichakuéra rembiapokue kuatiañe’ẽme.

7Ha Azarías omano rire oñeñotỹ ichupe David távape, ha ita’ýra Jotam oisãmbyhy hendaguépe.

Zacarías oisãmbyhy

8Azarías ombotývo 38 áño Juda retã ruvicha ramo; Zacarías, Jeroboam ra’y, oñepyrũ oisãmbyhy Israel retã ruvicha ramo 6 jasýnte.

9Ha ojapo ivaíva Ñanderuete resa renondépe, ituvakuéra ojapo haguéicha; noñemboykéi Jeroboam, Nebat ra’yre angaipakuéragui, omoangaipava’ekue Israelguakuérape.

10Salum, Jabes ra’y, oñemoĩ hese ha oikutu ichupe hetãyguakuéra rovake, ojuka peve, ha oisãmbyhy hendaguépe.

11Ambue Zacarías rembiapokue ojehai Israel retã ruvichakuéra rembiapokue kuatiañe’ẽme.

12Ha péicha oikóma Ñanderuete ñe’ẽ he’iva’ekue Jehúpe: Nde ra’y oguapýta Israel guapyhaguasúpe ha ha’e rire ita’ýra ra’y jepeve.

Salum oisãmbyhy

13Uzías ombotývo 39 áño Juda retã ruvicha ramo; Salum, Jabes ra’y, oñepyrũ oisãmbyhy Israel retãme, ha’e oisãmbyhýnte katu peteĩ jasy.

14Menahem, Gadi ra’y, ou Tirságui Samáriape, ha oikutu Salum, Jabes ra’ýpe, ojuka peve, ha oisãmbyhy hendaguépe.

15Ambue Salum rembiapokue, ha pe ñepu’ã oipyahava’ekue, ojehai Israel retã ruvichakuéra rembiapokue kuatiañe’ẽme.

16Upéramo Menahem mbaretepópe omondapa opaite mba’eporãva ojohúva guive Tifsápe ha ijerekuévo Tirsa peve, mbaretépe omonda ichupekuéra ndoipe’ái haguére ichupe itáva rokẽnguéra, ha ombovo opaite kuña hyeguasúva rye.

Menahem oisãmbyhy

17Azarías ombotývo 39 áño Juda retã ruvicha ramo, Menahem, Gadi ra’y, oñepyrũ oisãmbyhy Israel retã ruvicha ramo Samáriape 10 áño pukukue.

18Ha ojapo ivaíva Ñanderuete resa renondépe; oikove aja pukukue noñemboykéigui umi Jeroboam, Nebat ra’yre angaipágui, omoangaipamava’ekue avei Israelguakuérape.

19Ha ou Pul, Asíria retã ruvicha, ojeity hag̃ua Israel retã ári; ha Menahem ome’ẽ ichupe 33.500 kílo pláta (óro morotĩ) oipytyvõ hag̃ua ichupe opyta porãve hag̃ua Israel retã ruvicha ramo.

20Ha ko’ã pirapire ko’ãva Menahem oguenohẽ Israelguakuéragui. Opaite karai poguasúva ha ipirapire hetávagui, peteĩteĩ ome’ẽva’erã Asíria retã ruvichápe 560 grámo pláta; ha Asíria retã ruvicha oho jevy ha ndopytái Israel retãme.

21Ambue Menahem rembiapokue, ha opaite mba’e ojapova’ekue, ojehai Israel retã ruvichakuéra rembiapokue kuatiañe’ẽme.

22Ha omano rire Menahem ita’ýra Pekahía oisãmbyhy hendaguépe.

Pekahía oisãmbyhy

23Azarías ombotývo 50 áño Juda retã ruvicha ramo; Pekahía, Menahem ra’y, oñepyrũ oisãmbyhy Israel retã ruvicha ramo Samáriape, mokõi áño pukukue.

24Ha’e ojapo ivaíva Ñanderuete resa renondépe, noñemboykéigui Jeroboam, Nebat ra’yre angaipakuéragui, omoangaipava’ekue Israelguakuérape.

25Ha opu’ã hese Peka, Remalías ra’y, isoldádo ruvicha, ha oikutu ichupe ha iñirũnguéra Argob ha Arie ndive tetã ruvicha rógape, oĩva Samáriape, ha 50 kuimba’e Galaad pegua oipytyvõ ichupe; ha ojuka rire ichupe, oisãmbyhy hendaguépe.

26Ambue Pekahía rembiapokue, ha opaite mba’e ojapova’ekue, péina oime ojehai Israel retã ruvichakuéra rembiapokue kuatiañe’ẽme.

Peka oisãmbyhy

27Azarías ombotývo 52 áño Juda retã ruvicha ramo; Peka, Remalías ra’y, oñepyrũ oisãmbyhy Israel retã ruvicha ramo Samáriape; ha’e oisãmbyhy 20 áño.

28Ha ojapo ivaíva Ñanderuete resa renondépe; ha noñemboykéi avei Jeroboam, Nebat ra’yre angaipakuéragui, omoangaipava’ekue Israelguakuérape.

29Peka, oĩ ramo Israel retã ruvicha ramo, ou Tiglat-pileser, Asíria retã ruvicha, ha omoĩ ipoguýpe Ijon, Abel-bet-maaca, Janoa, Cedes, Hazor, Galaad, Galiléa ha opaite Neftali tríbu yvy; ha ogueraha avei hetápe hembiguairã Asíriape.

30Ha Oséas, Ela ra’y, opu’ã Peka, Remalías ra’y rehe; ha ojukávo ichupe, oisãmbyhy hendaguépe, Jotam, Uzías ra’y, ombotývo 20 áño.

31Ambue Peka rembiapokue, ha opaite mba’e ojapova’ekue, ojehaipa Israel retã ruvichakuéra rembiapokue kuatiañe’ẽme.

Jotam oisãmbyhy

32Peka, Remalías ra’y, ombotývo mokõi áño Israel retã ruvicha ramo; Jotam, Uzías ra’y, oñepyrũ oisãmbyhy Juda retã ruvicha ramo.

33Oñepyrũvo oisãmbyhy oguereko 25 áño, ha oisãmbyhy 16 áño Jerusalénpe. Isy réra Jerusa, Sadoc rajy.

34Ha ojapo iporãva Ñanderuete resa renondépe, itúva Uzías ojapo haguéicha.

35Upeichavéramo jepe nombyaíri umi yvy yvate, hetãyguakuéra oikuave’ẽ ha ohapýgui gueteri mba’e ryakuã porã umi yvy yvateha rupi. Ha’e ojapo pe okẽ ijyvatevéva Ñanderuete rogaguasu rehegua.

36Ambue Jotam rembiapokue, ha opaite mba’e ojapova’ekue, ojehai Juda retã ruvichakuéra rembiapokue kuatiañe’ẽme.

37Umi ára umívape Ñanderuete oñepyrũ ombou Juda ári Resin, Síria retã ruvichápe, ha avei Peka, Remalías ra’ýpe.

38Ha Jotam omano rire, oñeñotỹ ichupe avei, itúva David távape, ha hendaguépe oisãmbyhy ita’ýra Acaz.