Números 27 - Biblia en Guaraní - ?anderuete ?e’? Por? 2015

Zelofehad rajykuéra ojerure avei iloterã

1Ha peteĩ kuimba’e Zelofehad, Héfer ra’y, kóva Galaad ra’y, kóva Maquir ra’y, ha Manases, kóva Jose ra’y, ha’e itajýra 5, herakuéra: Maala, Noa, Hogla, Milca ha Tirsa;

2ha ãva ou oñemboja Moises ha pa’i Eleazar renondépe, ha opaite mburuvichakuéra ha opaite atyguasu renondépe, pe óga jojohuha rokẽme, ha he’i hikuái:

3Ore ru omanóma desiértope, ha’e noñemoĩriva’ekue katu Core ha iñirũnguéra ndive Ñanderuete rehe, ha’e omano hi’angaipa rehénte, ha’e ndaita’ýrai.

4Mba’érepa ojepe’áta ore ru réra Manáses tríbugui, ndaita’ýrai haguére. Peme’ẽna oréve ore yvy loterã ore ru pehẽnguekuéra apytépe.

5Ha Moises oporandu Ñanderuetépe.

6Ha Ñanderuete ombohovái Moiséspe, ha he’i:

7Zelofehad rajykuéra he’i porã; eme’ẽ ichupekuéra avei iloterã itúva pehẽnguekuéra apytépe, ha itúva lóte, rembohasáta ichupekuéra iloterã ramo.

8Ha eñe’ẽ Israel rogaguasukuérape, erévo: Oĩ ramo peteĩ kuimba’e omanóva ita’yra’ỹre, pembohasáta ilóte itajýrape iloterã ramo,

9ha ndaitajýrai ramo, peme’ẽta ilóte ityvyrakuérape;

10ha ndaityvýrai ramo, peme’ẽta ilóte itúva ryvykuérape,

11ha itúva ndaityvýrai ramo, peme’ẽta ilóte ipehẽngue hi’ag̃uivévape imba’erã ramo; kóa peteĩ tembiapoukapy Israel rogaguasukuérape g̃uarã, Ñanderuete oñe’ẽ Moiséspe ojejapopa hag̃ua iñe’ẽ.

Josue opyta Moises rendaguépe

12Ñanderuete he’i Moiséspe: Ejupi ko Abarim cérrope rehecha hag̃ua pe yvy ame’ẽtava Israelguaguasukuérape.

13Ha rehecha rire, nde avei reikéta ne retãyguakuéra atýpe (nde remanóta), ku nde ryke’y Aaron oñembyaty haguéicha.

14Peẽ pepu’ãva’ekue che ñe’ẽ rehe Sin desiértope, pe atyguasu oñemoĩ ramoguare cherehe, peẽ nachemomba’eguasúigui pe y rupi hesakuéra renondépe. Ko’ã mba’e ojehuva’ekue Cadéspe, Sin desiértope.

15Upémaramo Moises he’i Ñanderuetépe:

16Ore Ruete, Nde ningo tetãnguéra rekove ha ñemano Jára, eiporavo ambue kuimba’épe che rendaguépe.

17Upe kuimba’e upéva tomyakã ichupekuéra opa rupiete ha tomoirũ ichupekuéra oho ha oukuévo, ne retã Israel ani hag̃ua oiko herekua’ỹre.

18Ha Ñanderuete he’i Moiséspe: Aiporavóma Josue, Nun ra’ýpe, ipype oĩ yvága pegua Pytu Porã ha remoĩta hi’ári nde po;

19ha remoĩta pa’i Eleazar ha mayma Israelguakuéra renondépe ha embohasa Josuépe ne retã ruvicha reko.

20Embohasa ichupe avei nde reko, Israel rogaguasukuéra taiñe’ẽrendu ichupe.

21Ha’e toñembo’y pa’i Eleazar renondépe, ha ha’e omba’eporandúta pende Ruetépe Urim ha Tumim rupi; ha mayma Israel rogaguasukuéra taiñe’ẽrendu ha’e he’ívape guive.

22Ha Moises ojapo Ñanderuete he’i haguéicha ichupe, ohenói Josuépe ha omoĩ pa’i Eleazar ha Israel atyguasu renondépe.

23Omoĩ ipo hi’ári, ha ombohasa Josuépe hetã ruvicha reko Ñanderuete he’i haguéicha ichupe.