1 Samuel 18 - Biblia en Guaraní - ?anderuete ?e’? Por? 2015

Jonatan ha David oñembopy’a peteĩ

1Ojehu ningo David oñe’ẽmbávo Saul ndive, Jonatan ánga oñeñapytĩete David ánga rehe, ha Jonatan ohayhu ichupe ha’e ojehayhu háicha.

2Ha Saul oipota David opyta hendive pe ára guive, ha ndohejavéi oho jevy hag̃ua itúva rógape.

3Jonatan ha David oñoñe’ẽme’ẽ, Jonatan ohayhúgui Davídpe, ha’e ojehayhu háicha.

4Ha Jonatan oipe’a ipóncho omondéva ha ome’ẽ Davídpe, ome’ẽ avei iñorãirõ rete mo’ãha ha ikyse puku, iguyrapa, ha iku’a jopyha.

5Ha opaite tembiapo Saul he’íva guive Davídpe, ha’e ojapo porãite, ha ha’e oiko avei akãguapypópe. Upévare Saul omoĩ ichupe peteĩ isoldádo aty ruvicha ramo, ha mayma tetãygua resápe David ho’a porã, ha Saul rembiguaikuéra resápe avei.

Saul oñeko’õi David rehe

6Ojehu ningo umi ñorãirõhára ou jevývo, David ojuka rire ñorãirõme pe Filisteayguápe; kuñakuéra osẽ Israel tavapýgui purahéi ha jerokypópe, ojejohu hag̃ua tetã ruvicha Saul ndive, imba’e pararã, iplatíllo púpe ha isapukái rorýpe.

7Ha kuñakuéra ojerokýva, opurahéi péicha: Saul ojuka 1000-pe, David katu 10.000-pe.

8Ha pévarehe Saul ipochyeterei, omoñeko’õi ichupe ha he’i: Davídpe ome’ẽ hikuái 10.000 ha chéve katu 1000-nte, Davídgui oikova’erã tetã ruvicharãntema aipóramo.

9Ha pe ára péva guive Saul ipy’arasy (envidióso) David ndive.

10Ojehu ambue ko’ẽme peteĩ pytu ñaña, Ñanderuete omboúva, oñemomba’e Saul rehe ha oiko oñe’ẽmba rei pe ogapy rehe. David ombopu ipópe hi’árpa ambue ára peguáicha; ha Saul oguereko ipópe peteĩ yvyra puku akua.

11Ha Saul opoi ijyvyra puku akua, he’ívo: Ajakutúta Davídpe tápia rehe. Ha David katu ojehekýi ichugui mokõi jevy.

12Saul okyhyje Davídgui ohóvo; Ñanderuete katu oĩ David ndive, Saúlgui katu Ñanderuete ojei.

13Upévare Saul omomombyry David hógagui, ha omoĩ ichupe 1.000 soldádo ruvicha ramo; oñorãirõ hag̃ua ambue tetãyguakuéra ndive.

14Ha David oiko akãguapypópe, ha opaite mba’e ojapóva guive osẽ porãmba ichupe Ñanderuete oĩgui hendive.

15Ha Saul ohechávo David oikoha akãguapypópe okyhyjeve ichugui.

16Ha mayma Israel ha Judaygua ohayhuve ohóvo Davídpe ha’e voi omotenondégui isoldadokuéra osẽnguévo ha oikekuévo.

17Upémaramo Saul he’i Davídpe: Péina ápe che ame’ẽta ndéve Merab, che rajy tuichavéva ne rembirekorã, aipotánte reiko chéve soldádo ipy’aguasúva ramo, ha eñorãirõ Ñanderuete rehehápe, Saul katu he’i ipy’apýpe: Che po rupi ndojehumo’ãi mba’eve ichupe, Filisteayguakuéra po rupi katuete ha’e omanóta.

18David katu he’i Saúlpe: Máva piko che, térã mba’éiko che rekove, ha che ru pehẽnguekuéra Israel retãme aiko hag̃ua tetã ruvicha rajy ména ramo.

19Ha og̃uahẽvo pe ára Merab, Saul rajy, oñeme’ẽ hag̃ua Davídpe, oñeme’ẽ Adriel, Meholguápe.

20Mical, ambue Saul rajy katu ohayhu Davídpe; ha oje’e Saúlpe, ha péva ho’a porã hesa renondépe.

21Ha Saul he’i: Péva ame’ẽta ichupe iñuhãrã ramo, ikatu hag̃uáicha ho’a Filisteayguakuéra pópe. Ha Saul he’i Davídpe mokõi jevyháma: Ko árape ndéta che rajy ména.

22Saul he’i hembiguaikuérape: Peñe’ẽ ñemi Davídpe ha peje ichupe: Eikuaa porãke tetã ruvicha nderayhu ha opaite hembiguaikuéra nderayhu avei, eiko katu tetã ruvicha rajy ména ramo.

23Saul rembiguaikuéra péicha oñe’ẽ David apysápe, ha David he’i: Hi’ãpa peẽme výro rei aiko hag̃ua tetã ruvicha rajy ména ramo, chemboriahu ha che ndaha’éi mba’evete.

24Ha Saul rembiguaikuéra omombe’upa Saúlpe, David he’iva’ekue.

25Ha Saul he’i: Péicha peje Davídpe: Tetã ruvicha ndoipotái mba’erepy, oipotánte 100 Filisteaygua pire’ikue, tetã ruvicha ikatu hag̃uáicha oñevenga hese ija’e’ỹva rehe. Saul ningo oitysénte Davídpe Filisteayguakuéra po rupi.

26Upéi hembiguaikuéra he’i Davídpe tetã ruvicha ñe’ẽ, ha David omoneĩ oiko hag̃ua tetã ruvicha rajy ména ramo. Ha og̃uahẽ mboyve pe ára omenda hag̃ua,

27David opu’ã iñirũnguéra ndive ha oho ojuka 200 Filisteayguápe; ha David ogueru ipire’ikue tetã ruvichápe, ha’e oiko hag̃ua tetã ruvicha rajy ména ramo. Ha Saul ome’ẽ ichupe itajýra Micálpe, hembirekorã ramo.

28Saul katu ohechávo Ñanderuete oĩha hendive, ha itajýra Mical ohayhuha avei ichupe,

29ko’yteve okyhyje Davídgui. Péicha Saul ndaija’evéi David rehe opaite árape.

30Ha Filisteaygua ruvichakuéra osẽ vove ñorãirõme; David ombopoguyve hese ija’e’ỹvape ambue Israel soldádo ruvichágui, péicha rupi herakuã porãve ohóvo.