Ezequiel 35 - Biblia en Guaraní - ?anderuete ?e’? Por? 2015

Edom oñehundíta

1Ou chéve Ñanderuete ñe’ẽ ha he’i:

2Kuimba’e ra’y, emoĩ nde rova Seir cérro gotýo, ha emomarandu ichupe,

3ha ere ichupe: Péicha he’i Yvága Atykuéra Jára, peikuaa porãke Che apu’ãta nderehe, Seir cérro rehe, aipysóta che po nderehe ha ajapóta ndehegui yvy perõ ha tapere.

4Nde tavakuéra ambotaperéta ha amoperõta nde yvy; ha reikuaáta Che ha’eha Jahve, pende Ruete.

5Tapiaite nde, Edom, reñemoĩ cherehe ha reity kyse pukúpe Israel ñemoñarenguérape, upévare og̃uahẽta nde jepy’apy ára rehasa asyete hag̃ua avei.

6Upévare, che rekove rehe, he’i pe Oikovéva tapia g̃uarã, Jahve: Che aguenohẽta nde ruguy, ha tuguy oikóta nde rapykuéri opaite árape; revy’a haguére reguenohẽvo tuguy, upévare tuguy oikóta avei nde rapykuéri.

7Amoperõ ha ambotaperéta Seir cerrokuéra, ha ahundipáta umi oikóva ha ohasáva upérupi.

8Amyenyhẽta opaite nde cérro, nde cérro yke, nde cerrokuéra pa’ũ ha mayma nde yakãnguéra te’õnguégui, ho’átava kyse pukúpe.

9Che rombotaperéta opaite árape, ha nde tavakuéra araka’eve noñemopu’ãmo’ãvéima; ha peikuaáta Che ha’eha Jahve, pende Ruete.

10Peẽ peje haguére: Umi mokõi tetã ha umi mokõi tetã yvy tuichakue che mba’erã, ha añemomba’éta hesekuéra; Jahve oiko ramojepe upépe.

11Upévare che rekove rehe, he’i pende Ruete, Che amyengoviáta hekoitépe ne rembiapo vaikue ha nde py’aro Israel ndive, ha nde chekuaáta, Che rombojovake jave.

12Ha reikuaáta Che, pende Ruete, ahendupa hague umi ñe’ẽvaieta ereva’ekue Israel cerrokuéra rehe, erévo: Oñehundíma hikuái, oñeme’ẽma oréve romokõ hag̃ua.

13Pende jurúpe peñembotuicha ha pepu’ã cherehe, ha heta mba’evai peje cherehe, Che ningo oje’éva guive ahendupa voi.

14Upévare pende Ruete he’i: Pe yvy tuichakue ovy’aitéta Che rombotaperéva.

15Ndepy’arory asy haguéicha Israel itaperégui, peichaite Che ajapóta nderehe; itaperéta Seir cerrokuéra, ha Edom yvy tuichakue; ha peikuaáta Che ha’eha Jahve, pende Ruete.