Daniel 5 - Biblia en Guaraní - ?anderuete ?e’? Por? 2015

Pe ñe’ẽ ojehaíva tápia rehe

1Tetã ruvicha Belsasar ojapo peteĩ karu guasu 1.000 mburuvichápe g̃uarã, ha umi 1.000 rovake ombo’u víno.

2Belsasar oka’u rire, ogueruka umi váso pláta ha oroguiguáva itúva Nabucodonosor ogueruva’ekue, Ñanderuete rogaguasu Jerusalen peguágui, ombo’u hag̃ua víno ipype tetã ruvicha, umi mburuvicha ipoguýpe oĩva, hembireko ha ikuñakuéra ndive.

3Upéramo ojegueru umi váso oroguiguáva ojegueruva’ekue Ñanderuete róga guasu Jerusalen peguágui, ha pe tetã ruvicha, mburuvichakuéra, hembirekokuéra ha ikuñakuéra ombo’u ipype víno.

4Ha ho’u jave víno, omomba’eguasu hikuái umi jára gua’úpe ojejapova’ekue óro, pláta, brónce, hiérro, yvyra ha itaguiguáva.

5Upejave ojehecha peteĩ kuimba’e po ohaíva ikuãme pe tápia morotĩháme, pe tataindy ohesape porãvehápe ha pe tetã ruvicha ohecha pe po ohaivahína.

6Ha upévo pe tetã ruvicha rova oñemoambue, ipy’a kangypa, ipy’a tarova ha henypy’ã oñembota mbota ojuehe.

7Ha pe tetã ruvicha hatã osapukái ojegueru hag̃ua umi karai iñarandúva, umi imba’ekuaáva ha umi paje apohárape. Ha ou rire hikuái tetã ruvicha rendápe, ha’e he’i ichupekuéra: Oimeraẽ omoñe’ẽkuaáva ko ñe’ẽ ojehaíva ha omombe’úva chéve mba’épa he’ise, hese oñemondéta ao pytã, ha oñemoĩta peteĩ ajurigua oroguiguáva ijajúra rehe, ha oikóta tetã ruvicha mbohapyha ramo ko tetãguasúpe.

8Upéramo oñemoingepa umi karai arandu ikotyguasúpe, ijapytépe katu ndaipóri avave ikatúva omoñe’ẽ umi ñe’ẽ ojehaiva’ekue tápia rehe, ni omombe’ukuaáva tetã ruvichápe mba’épa he’ise.

9Upévo tetã ruvicha Belsasar iñangekõietereive, hesa’yjupaite ha imburuvichakuéra ipy’andyipa hendive.

10Isy katu, ohendúvo tetã ruvicha ha mburuvichakuéra, sapukaipópe oike ikotyguasúpe ha he’i: Tetã ruvicha, tereikove tapia g̃uarã, anítei rejepy’apyeterei, ha anítei nde rova oñembosa’yjupa.

11Ne retãguasúpe oiko peteĩ kuimba’e ipype oĩva Yvága Jarakuéra Pytu Porãitéva, ha nde ru oikoha árape ojejohuva’ekue ipype tesape añeteguáva, akãporã ha arandu yvága jarakuéraicha; ha nde ru, Nabucodonosor, omoĩ ipoguýpe umi karai iñarandúva, umi oma’ẽva mbyja rapekuéra rehe, umi imba’ekuaáva ha paje apoharakuéra.

12Ha’e iñarandu, iñakã porã ha ikatupyry omoñe’ẽ hag̃ua ke peguare ha ñe’ẽnguéra ñemimby, ha omyesakãkuaa umi mba’e ojekuaa porã’ỹva, kóva ningo Daniel, pe tetã ruvicha omboherava’ekue Beltsasar. Ehenoiuka ichupe, ha ha’e he’íta ndéve mba’épa he’ise ko ñe’ẽ kóva.

13Upémaramo ojegueru Daniélpe tetã ruvicha rendápe. Ha tetã ruvicha he’i Daniélpe: Nde piko Daniel, umi jepokuapyha pegua ra’yre, che ru ogueruva’ekue Judágui.

14Che ahendu umi Yvága Jára Pytu Porãitéva oĩha ndepype, ha ndepype oĩha tesape añeteguáva, akãporã ha arandu ndetuichaitevéva.

15Ojegueru ningo che renondépe umi karai iñarandúva ha umi oma’ẽva mbyja rapekuéra rehe omoñe’ẽ hag̃ua chéve ko ñe’ẽ jehaipyréva ha he’i hag̃ua chéve avei mba’épa he’ise, ág̃a katu avavete ndaikatúi ohechauka chéve mba’épa he’ise ko’ã ñe’ẽ ko’ãva.

16Ha che ahendu, nde ikatuha ere mba’épa he’ise ha ikatuha remyesakã avei mba’e ñemimby. Ko’ág̃a nde remoñe’ẽ ramo ko ñe’ẽ jehaipyre ha remombe’u ramo chéve mba’épa he’ise, reñemondéta ao pytãme, ha ame’ẽta peteĩ ajurigua oroguiguáva regueraha hag̃ua nde ajúra rehe ha reikóta tetã ruvicha mbohapyha ramo ko tetãguasúpe.

17Upérõ Daniel he’i tetã ruvichápe: Umi jopói topytapánte ndéve, ha umi mba’erepy reme’ẽséva chéve eme’ẽ ambuépe. Amoñe’ẽta katu pe ñe’ẽ jehaipyréva tetã ruvichápe g̃uarã, ha ha’éta avei mba’épa he’ise.

18Ñanderuete, pe Jára Ijyvatetéva, ome’ẽ nde ru Nabucodonosórpe peteĩ tetãguasu, pu’akaguasu, terakuã porã ha pe tetã ruvicha guapyha.

19Ñanderuete ome’ẽva’ekue ichupe pu’akaguasu, oryrýi ha okyhyje hag̃ua nde ru renondépe opaite tetãnguéra ha opaichagua tetã ambueyguáva. Nde ru ojukauka ojukasévape ha oheja oikove ha’e oipotáva guivépe, ha’e ombotuichaukase ramo peteĩme ombotuicha ichupe, omomirĩukase ramo ambuépe omomirĩ ichupe.

20Ha nde ru oñembotuichágui, ha hi’ánga oñemohatãgui, Ñanderuete oipe’a hetã guapyhaguasu ichugui, oipe’a avei pe terakuã porã oguerekóva.

21Ha oñemosẽ ichupe hetãyguakuéra apytégui, ha mymba saitéicha oiko iñapytu’ũ kuápe, ha búrro saitekuéra ndive oiko. Ho’u kapi’i ku guéi ho’u háicha, ha hete hykuepa ysapýpe ohechakuaa peve Ñanderuete, pe Ijyvateitéva, oikoha tetã ruvichaguasutee ramo ha opaite tetãyguakuéra oikoha ipoguýpe, ha Ha’émante omoĩ pe tetã ruvicha guapyhápe Ha’e oiporavóvape.

22Ha nde, Belsasar, ita’yra, nereñemomirĩri nde py’apýpe, reikuaapa ramo jepe opaite ko’ã mba’e.

23Reñembotuicha uvei Yvága Jára renondépe, ha regueruka ne renondépe umi váso Ñanderuete rogaguasu peguáva, nde ha mburuvichakuéra, ne rembirekokuéra ha ne kuñakuéra pe’u víno ipype, ha pemomba’eguasu umi jára ojejapova’ekue pláta ha órogui, brónce ha hiérrogui, yvyra ha itágui, umía ndohechái, nohendúi ha mba’eve ndoikuaái, Yvága Jára pópe katu oĩ nde rekove ha opaite nde rapekuéra, nde katu araka’eve neremomba’eguasúi ichupe.

24Upévare Ha’e ombou ko po ha ohaiuka avei ko’ã ñe’ẽ.

25Ko’ã ñe’ẽ ko’ãva Ha’e ohaiuka: MENE, MENE, TEKEL PARSIN.

26Kóa ningo he’ise: MENE: Ñanderuete oipapáma ne retãguasu ára ha ome’ẽma ambuépe.

27TEKEL: Oñeha’ãma (ojehecháma) nde pohyikue (péso) balánzape, ha ojejohu nde pohyikue ivevuietereiha.

28PARSIN: Ha ne retã guasu oñemboja’o ha oñeme’ẽma Média ha Persiayguakuéra pópe.

29Ha Belsasar omondeuka Daniélpe ao pytãme, ha omoĩuka ijajúrare peteĩ ajurigua oroguiguáva, ha oikuaauka ha’eha pe tetã ruvicha mbohapyha hetãguasúpe.

30Ha pe pyhare pévape ojejuka Belsasar, Caldeaygua retã ruvichápe.

31Ha Darío, peteĩ Mediaygua, oñepyrũ oisãmbyhy pe tetãguasúpe, oguerekóvo 62 áño.