2 Crónicas 1 - Biblia en Guaraní - ?anderuete ?e’? Por? 2015

Salomon ojerure arandu

1Salomon, David ra’y, oñemoĩ hatã Israel retã ruvicha ramo Ñanderuete, Ijára oĩgui hendive ha ombotuicha ichupe.

2Ha Salomon ohenoiuka opaite Israelguakuérape, umi soldádo ruvicha 1.000 ha 100 ariguápe, mburuvichakuérape, mbojovakeharakuérape, opaite Israel tríbu ruvichakuérape ha umi Israel rogaguasu ruvichakuérape.

3Ha Salomon ha opaite hendive oñembyatyva’ekue oho Gabaónpe, pe yvy yvatépe; upépe oñemopu’ãva’ekue Ñanderuete róga jojohuha, Moises, Ñanderuete rembiguái ojapoukava’ekue desiértope.

4Ha David oguerúma Ñanderuete karameg̃ua Quiriat-jearímgui ha’e ombosako’i haguépe Jerusalénpe.

5Upéicha avei pe kuave’ẽmby renda bronceguiguáva Bezaleel, Uri ra’y, Hur ra’yre ojapova’ekue, oĩ Ñanderuete róga jojohuha rovái, upépe Salomon oho omba’eporandu hag̃ua Ñanderuetépe pe atyguasu ndive.

6Ha Salomon ojupi upépe Ñanderuete renondépe, pe kuave’ẽmby renda bronceguiguáva oĩháme pe óga jojohuha, ha oikuave’ẽ hi’ári 1.000 kuave’ẽmby ojehapypáva.

7Ha pe pyharépe Ñanderuete ojehechauka Salomónpe ha he’i ichupe: Ejerure chéve reipotáva guive ha Che ame’ẽta ndéve.

8Ha Salomon he’i Ñanderuetépe: Nde reiporiahuverekóma che ru Davídpe, ha chéve chemoĩ tetã ruvicha ramo hendaguépe.

9Toikókena ko’ág̃a, ore Ruete, ore Jára, pe ñe’ẽ reme’ẽva’ekue che ru Davídpe; Nde chemoĩgui tetã ruvicha ramo peteĩ tetã ndetuicháva ári ku yvytimbóicha.

10Eme’ẽ chéve ko’ág̃a arandu ha akãguapy aisãmbyhy porã hag̃ua ko tetã kóvape, nderehe’ỹ avave ndikatumo’ãi oisãmbyhy porã ko tetã kóvape.

11Ha Ñanderuete he’i Salomónpe: Oĩgui ko’ã mba’e nde py’apýpe ha nderejeruréigui pirapireita, mba’e porãita, ni terakuãguasu, ni nderayhu’ỹva rekovére, ha nderejeruréi reikove puku hag̃ua, rejerure uvei arandu ha akãguapy reisãmbyhy hag̃ua che retãme, Che romoĩ haguépe,

12upévare oñeme’ẽta ndéve arandu ha akãguapy, ha hi’ári ame’ẽta ndéve avei pirapireita, mba’e porãita ha terakuãguasu, avave ndohupityiva’ekue nde mboyve ni nderire.

13Ha Salomon ojevy pe yvy yvatégui ha pe óga jojohuhágui, ha upeha ára guive oisãmbyhy Israel retãme.

Salomon ojogua kavaju ha carrokuéra

14Ha Salomon ojogua cárro ha kavajukuéra oguereko peve 1.400 cárro ha 12.000 kavaju árigua, ha omoĩ umi távape ha’e ombosako’iva’ekue umívape g̃uarã, ha umívagui ogueru avei hendive Jerusalénpe.

15Ha tetã ruvicha ombyaty Jerusalénpe pláta ha óro itáicha; ha cédro ku hígo rakã ñu rupiguáicha.

16Umi tetã ruvicha ñemuhára oheka ojogua hag̃ua kavajukuéra ha aorã hepýva Salomónpe g̃uarã Egíptogui.

17Ha oho ojogua hag̃ua hikuái Egíptogui peteĩ cárro 6,7 kílo pláta (óro morotí) rehe, ha peteĩ kavaju 1,67 kílo pláta rehe; ha ojogua avei, iñemuhára rupi, umi Het retã ruvichápe g̃uarã ha Síria retã ruvichápe g̃uarã avei.