Deuteronómio 11 - Biblia en Guaraní - ?anderuete ?e’? Por? 2015

Ñanderuete pu’aka

1Pehayhu Ñanderuete, Ñandejaraitépe, ha tapiaite pejapo hembipota, iñe’ẽ, imbo’epy ha hembiapoukapykuéra.

2Ha peikuaáke ko árape nañe’ẽiha pende ra’ykuéra ndive, oikuaa’ỹva ha ndohechaiva’ekue Ñanderuetépe, ni Ñandejára jehavira mba’eguasuete, ipo mbarete térã ijyva ojepysóva,

3umi mba’e techaukapyrã ha hembiapo tuicháva Ha’e ojapova’ekue Egípto retãme, faraon, Egípto retã ruvicha rehe ha mayma hetã tuichakue rehe;

4Ha’e ohundi Egípto soldádo atyguasu, ikavajukuéra icarroita reheve; mba’eichaitépa omboguarara (ojeity) hi’arikuéra pe Yguasu Pytã megua y, oho ramoguare hikuái pende rapykuéri;

5ha umi mba’e ndetuicháva ojapova’ekue penderehe pe desiértope, peg̃uahẽ meve ko tenda kóvape.

6Penemomandu’a Datan ha Abiram rehe, Eliab ra’ykuéra, Ruben ra’yre rehe; mba’eichaitépa pe yvy ojejurupe’ákuri omokõ hag̃ua ichupekuéra, hogayguakuéra, hogakuéra ha mayma hymbakuéra reheve, Israelguakuéra renondépe.

7Pende resa ohechava’ekue opaite ko’ã mba’e techapyrã (milágro) Ñanderuete ojapova’ekue.

Jehovasarã ha ñemomarandu

8Pejapókena mayma tembiapoukapy che ha’éva guive peẽme ko árape, peñemombarete peñemomba’e hag̃ua Canaan yvýre;

9peikove puku hag̃ua pe yvy Ñanderuete ome’ẽmava’ekuépe pende rukuéra ha iñemoñarenguérape, peteĩ yvy osyryhápe kamby ha eíra.

10Pe yvy peiketahápe ndaha’éi Egípto yvýicha pesẽ haguégui, upépe peñotỹva’ekue pene mba’e ra’ỹi ha perrega pende pópe, ku ka’avo ñemitymbýicha (huértaicha).

11Pe yvy pehasatahápe peñemomba’e hag̃ua oguereko cérro ha ñu porã oky porãháme.

12Ñanderuete voi oñangareko porã pe yvy rehe, pe áño oñepyrũha guive ohasapa peve, Ñanderuete resa oma’ẽ tapia hese.

13Peñangareko ha pejapo porã ramo Ñanderuete rembiapoukapykuéra che ha’éva guive peẽme ko árape, pehayhu ha peservi Jahve, Ñandejárape, pende py’aite ha pene ánga mbytete guive,

14Ñanderuete katuete ome’ẽta ama hi’araitépe pende kokuépe, pe ama tenondegua ha pe hapykueguáva; ha pemono’õta pene mba’e ra’ỹi, pene víno ha pende aceiterã.

15Amoheñóita kapi’i porã pene ñúme ha ambue tembi’u pende kokuépe pene rymbakuérape g̃uarã, upéicha peẽ pekaru porãta peneryg̃uatã meve.

16Peñangarekóke pendejehe, ani pene ñe’ã ou oñembotarova, ha ani peñemboykétei Ñandejáragui pemomba’eguasu hag̃ua ambue járape ha ani peñesũ henondepekuéra;

17ani hag̃ua Ñanderuete pochy hendy jevy pendeári, ha ani hag̃ua omboty pe ára ha ndokyvéigui, ha pe yvy nome’ẽvéi peẽme hi’a ha pya’ete pemanomba pe yvy iporãitévape ramojepe, Ha’e ome’ẽva’ekué peẽme.

18Upévagui pemoĩta ko’ã che ñe’ẽ pende py’a ha pene angapýpe, ha peñapytĩta techaukaha ramo pende po rehe, ha oĩta pende syva rehe pende resa pa’ũme (Deuteronómio 6,7).

19Pembo’e pende ra’ykuérape Ñanderuete ñe’ẽ rehe, peguapy jave pende rógape, peikóvo tape rehe, peñenóvo térã pepu’ãnguévo,

20ha pehaiva’erã iñe’ẽ pende róga rokẽ ha pende táva rokẽguasu rehe;

21ikatu hag̃uáicha peẽ Israel peikove pukuete Canaan yvýpe yvagakuéra opyta peve ko yvy ári, Ñanderuete oprometeva’ekue pende rukuérape iñe’ẽ rupi.

22Peñangareko porã ramo mayma ko’ã tembiapoukapy Che ha’éva rehe peẽme, ha pejapo ha pehayhu ramo Jahve, pende Járape, ha peguatapeína hapykuéri umi tape rupi Ha’e ohechaukátava peẽme,

23upéicharamo Ñanderuete avei omosẽmbáta pene renonderãgui mayma ko’ã tetãyguakuérape, ituichave ha imbareteve ramojepe pendehegui.

24Opaite yvy opyrũtaháme pende pykuéra, umía pene mba’erã, pe desiérto guive Líbano peve, Éufrates ysyry guive pe yguasu kuarahyreikeha gotýo peve, opytapáta peẽme pene retãrã ramo.

25Avave noñemoĩmo’ãi penderehe; Ñanderuete omongyhyjétagui opaite tetãme oñemoĩséva pene renonderãme, Ha’e he’i haguéicha peẽme.

26Pema’ẽ porãke, ko ára kóvape che aipota peẽ peiporavo jehovasarã térã maldicionrã.

27Jehovasa oĩta peẽme g̃uarã pehendu ha pejapo ramo Jahve, pende Ruete rembiapoukapykuéra, che ha’éva peẽme ko árape,

28ha maldicion oĩta peẽme g̃uarã napeneñe’ẽrendúi ramo pende Ruete rembiapoukapykuéra ha peñemboyke ramo hapégui che ha’éva peẽme ko árape, ha pemomba’eguasu ramo avei ambue jára peikuaa’ỹvape.

29Ág̃a Jahve, Ñandejára penemoinge vove pe yvy pehohápe peñemomba’e hag̃ua ijyvýre, pejeva’erã cérro Gerizim ru’ãme jehovasa, ha maldicion Ebal cérro ru’ãme.

30Umíva oĩhína Jordan yke akatúape, pe tape kuarahy oikeha gotyogua kupépe, umi Canaangua yvýpe oikóva Arabápe, Gilgal rovái, More encína ka’aguy ypýpe.

31Peẽ pehasava’erã pe Jordan peñemomba’e hag̃ua pe yvýre, Jahve, pende Ruete ome’ẽtava peẽme peiko hag̃ua ipype.

32Peñangarekóke pejapo hag̃ua hekoitépe hembipota ha hembiapoukapykuéra che amoĩva ko ára kóvape pene renondépe.