Salmokuéra 58 - Biblia en Guaraní - ?anderuete ?e’? Por? 2015

Ñembo’e ojeruréva jehavira iñañávape g̃uarã - David purahéi

1Peẽ mburuvichakuéra, aje piko pembojovake porã. Pembojovake piko hekoitépe yvyariguakuérape.

2Ndaupéichai, pende py’apýpe pemoheñói ñaña reko, ha pende po mbarete rupi pejopy rei pene retãyguakuérape.

3Umi iñañáva onace guive oñemboyke Ñanderuete rapégui ha umi ijapúva oiko rei osẽ guive isy ryégui.

4Ipy’apýpe oĩ pohã vai, ku mbói pohãicha, ha’ete hikuái ku mbói ohendu’ỹvaicha, omboty hikuái ijapysa ani hag̃ua ohendu.

5Ha pe mbói ndojapysakái pe paje apohára ñe’ẽ rehe, jepevémo ha’e ikatupyry ipaje apópe.

6Nde, che Ruete, ejoka hãinguéra ijuru ryepýpe, emopẽmbamína, Nde, che Jára, umi leõ ra’y rãinguéra.

7Toguepa rei hikuái umi y osyrývaicha, ha opoi vove hikuái ihu’ykuéra, tove toñepehẽ’ãmba.

8Tohasa hikuái ku jatyta ryjúi hyku reívaicha ha ku kuña imembykuávaicha, ohecha’ỹva pe kuarahy.

9Pende japepokuéra (ólla) oñandu mboyve umi ñuatĩ rata rakukue, péicha ipochykue ogueraháta ichupekuéra mbaretepópe hekove reheve.

10Ovy’aite pe heko potĩva ohechávo mba’éichapa Ñanderuete omyengovia iñañáva rembiapokue ha Ha’e voi ojepyhéita iñañáva ruguykuépe.

11Upevove oimeraẽva he’iva’erã: Añetehápe oĩ jopói oñeme’ẽtava hekojojávape g̃uarã, añetehápe oĩ Ñanderuete ombojovakevahína ko yvy apére.