Salmokuéra 139 - Biblia en Guaraní - ?anderuete ?e’? Por? 2015

Ñanderuete opa rupiete oĩhína ha opaite mba’e Ha’e oikuaa avei

1Ore Ruete, Nde ningo reha’ãma ha reipyguara che rekove ha chekuaa porã voi.

2Nde reikuaapa aguapy térã apu’ã ramo, mombyry guive reikuaa porã che ajepy’amongeta jave rehe.

3Reikuaa che aguata térã che apytu’u ramo, ha reikuaapa che rapekuéra.

4Osẽ mboyve peteĩ ñe’ẽ che jurúgui Nde, che Ruete, reikuaapáma voi.

5Nde chemongora che kupépe ha che renondéguio, ha nde po remoĩ cheári (reñangareko hag̃ua cherehe).

6Ko’ã mb’e ijyvateiterei aikuaa ha oike hag̃ua che akãme.

7Moõ piko añemomombyrykuaa nde Pytu Porãgui. Ha mamo piko ikatu akañy ndehegui.

8Ajupi ramo umi yvágape, upépe Nde reĩ, ha aguejy ramo umi omanómava retãme, péina upépe Nde reĩ avei.

9Ajapyhy ramo pe ko’ẽju pepo ha aha ramo aiko pe yguasu rembe’ýpe,

10upépe nde po chesãmbyhýta avei, ha nde po akatúa chejokóta.

11Ha ha’e ramo: Pe pytũ tachemo’ã, ha pe pyhare jepeve opyta che jerekuévo,

12pytũ jepeve nomoypytũmo’ãi mba’eve ndehegui, ha pe pyhare ojajái ramo ku arakuéicha, ndéve g̃uarã pytũ ha tesakã peteĩchaite.

13Nde voi che rekove apohare, Nde cheapova’ekue che sy ryépe.

14Che romomba’eguasu Nde cheapo porãitégui, ne rembiapokuéra mba’e techapyrãva, ha che ánga oikuaa porã voi ko’ã mba’e.

15Ndehegui che reko noñemíri, Nde rejapo jave ñemiháme che rekove pe yvy ruguaitépe (nde tallérpe).

16Nde resakuéra ohecháma che rekove oñepyrũ porã mboyve, ha ne kuatiañe’ẽme ojehaipáma opaite che rekove ararã oñepyrũ mboyve che ára peteĩha.

17Nde, ore Ruete, ne pensamientokuéra ningo tuichaiterei mba’e chéve g̃uarã. Ndaikatúi ñambyatypa jaipota ramojepe.

18Aipapa ramo oñemboheta hetave yvyku’i ra’ỹigui, ha apáy ramo añepyrũkuaa jevy hemby hetavégui.

19Nde, ore Ruete, terejuka pe iñañávape; ha peẽ tekove tuguy ñohẽha, peñemboyke chehegui.

20Ha’ekuéra oñembohoryhápe oñemoĩ nderehe, ha oiporu mba’e výro rei ramo nde réra.

21Ndacha’éipa, che chepochy, ore Ruete, umi nderehe ija’e’ỹva rehe, ha umi oñemoĩva nderehe ndoikuaaséi mba’eve ndehegui.

22Amboykéma ichupekuéra, che a’e’ỹha ramo aguereko ichupekuéra.

23Eipyguara, Nde, ore Ruete, che rekove ha eikuaauka chéve che py’apýpe oĩva, chembojovake ha ehechauka che jepy’amongeta (pensamientokuéra).

24Ema’ẽmína oĩpa chepype ñaña reko, ha chemboguata pe tape añeteguáva rehe.