Levítico 13 - Biblia en Guaraní - ?anderuete ?e’? Por? 2015

Tembiapoukapy ai pochy (lépra

) reheguáva

1Ñanderuete oñe’ẽ Moises ha Aarónpe, ha he’i:

2Pe kuimba’e térã kuña oguereko ramo hete pire rehe ruru térã kuru’i, térã ky’aichagua mba’e morotĩ, ha oĩ ramo hete rehe ku lepraichagua ai, ojegueruva’erã ichupe pa’i Aarónpe térã ita’ýra pa’i rendápe.

3Ha pe pa’i oma’ẽva’erã hete pire rehegua ai rehe; ha hague ramo pe ai oĩháme, oñemomorotĩma ramo, ha pe ai ipypukuve ramo ambue ipire ro’ógui, péva ai pochy (lépra) ha pe pa’i oma’ẽva hese he’iva’erã hese naipotĩriha.

4Ha hete pire rehe oĩ ramo mba’e ky’aichagua morotĩva, ha ndaipypukuvéi ramo ambue ipirégui, ha haguekuéra noñemomorotĩri ramo, upéicharamo pe pa’i ombotýta upe ijaívape peteĩ kotýpe 7 ára pukukue.

5Ha pe ára 7-hápe pe pa’i oma’ẽ jevýta hese; ha pe ai oĩ ramo gueteri, ha’e ohecha haguéicha, naiñasãirigui ipire rehe, upéicharamo pe pa’i omboty jevyva’erã ichupe ambue 7 ára peve.

6Ha pe ára 7-hápe ohecha jevýta ichupe; ha pe ai ha’ete ramo oñemopotĩmiveha ohóvo, ha naiñasãiri ramo ipire rehe, upéicharamo pe pa’i he’íta ipotĩha: Péva kuru reínte; ha ojoheiva’erã ijaokuéra ha ipotĩ jevýta.

7Ha pe kuru’i iñasãi ramo ipire rehe, ha’e ojehechauka jevyva’erã pa’ípe.

8Ha pe pa’i ohecha ramo umi kuru’i iñasãive hague ipire rehe, he’íta naipotĩriha; péva ai pochy voi (lépra).

9Kuimba’e térã kuña osẽva guive hese ai pochyichagua, ojegueruva’erã pa’i rendápe.

10Ha ha’e oma’ẽ jevýta hese, ha ojekuaa ramo ipire rehe kuru’i morotĩha, ha hague oñemomorotĩ ramo avei, ha ojekuaa ho’o nandi,

11péva ai pochy okuera’ỹva ipire rehe; ha pe pa’i he’iva’erã ichupe naipotĩriha ha nombotyvéima ichupe kotýpe, ojekuaámagui ha’e naipotĩri.

12Ha osẽ ramo ai pochy ha iñasãi ramo ipire rehe, ha oñu’ãmbaite ramo ipire iñakã guive ipy peve, pe pa’i ohechakuaaha peve.

13Upéicharamo pe pa’i oma’ẽ porãva’erã hese; ha pe ai oñu’ãmba ramo hete, he’íta hese ipotĩha; oñemomorotĩmbáguinte, ha’e ipotĩma.

14Ojekuaa ramo hese ho’o nandi (ojeígui ipire) naipotĩri.

15Ha pe pa’i oma’ẽva’erã ho’o nandi rehe, ha he’íta ichupe naipotĩriha, péva ai pochy (lépra).

16Ha pe ho’o nandi oñemomorotĩ ramo, upéicharõ ouva’erã pa’i rendápe,

17ha pe pa’i oma’ẽva’erã hese; ha pe ai oñemomorotĩ ramo pe pa’i he’íta ipotĩha, pe ai oguerekova’ekuégui.

18Ha ipire rehe osẽ ramo susu’a ha’e okuera rire,

19ha opyta ramo peteĩ ruru pe susu’a oĩ haguépe térã peteĩ mba’e ky’aichagua morotĩ pytãngýva, ha’e ojehechauka jevyva’erã pa’ípe.

20Ha pe pa’i oma’ẽva’erã hese ha ha’ete ramo ipypukuveha ipire apégui, ha haguekuéra oñemomorotĩ ramo, pe pa’i he’iva’erã ha’e naipotĩriha; péva lépra voi, heñoiva’ekue pe susu’águi.

21Ha pe pa’i oma’ẽ porã rire hese ha pe ai ndaipypukuvéi ramo ambue ipire ro’ógui, ha ndojekuaái hese ha hague morotĩha, upéicharamo pe pa’i ombotyva’erã ichupe peteĩ kotýpe 7 ára pukukue;

22ha ou ramo iñasãive ipire rehe, upéicharamo pe pa’i he’iva’erã naipotĩriha; péva ai pochy vai (lépra).

23Ha pe mba’e ky’aichagua morotĩva opyta ramo oĩ haguéichante, ha naiñasãiri, péva susu’a rapykuerénte, ha pe pa’i he’íta ha’e ipotĩha.

24Upéicha avei oĩ ramo ipire rehe tata peguare kaigue, ha opyta okuera haguépe mba’e ky’aichagua morotĩ vaíva, pytãngy térã morotĩva,

25pe pa’i oma’ẽva’erã hese; ha hague ou ramo oñemomorotĩ, ha ha’ete ku ipypukuvéva ipirégui, péva ai pochy osẽva’ekue pe kaigue rendaguégui; ha pe pa’i he’íta naipotĩriha, péva lépra rehegua ai.

26Ha pe pa’i oma’ẽ ramo hese, ha pe mba’e ky’aichagua rehe ndahaguéi morotĩ, ha ndaipypukuvéi ramo ambue ipirégui, ha hũngy vai ramo, pe pa’i ombotyva’erã ichupe 7 ára pukukue.

27Ha pe ára 7-hápe pe pa’i oma’ẽ porãva’erã hese; ha oime ramo iñasãive ipire rehe, pe pa’i he’iva’erã naipotĩriha; péva lépra rehegua ai.

28Ha pe mba’e ky’aichagua opytánte ramo oĩ haguéicha ha naiñaisãiri ramo, ha iñypytũvévaichante, pe kaigue reheguare perénte; upéramo pe pa’i he’iva’erã ipotĩha, péva kaigue rapykuerenteha.

29Ha pe kuimba’e térã kuña rehe osẽ ramo ai iñakã rehe, térã hendyva rehe,

30pe pa’i oma’ẽva’erã pe ai rehe, ha ohecha ramo ipypukuve ambue ipirégui ha hague sa’yjungy ha ipererĩ ramo, upéicharamo pe pa’i he’iva’erã naipotĩriha péva ha’égui uñe akã térã tendyva reheguáva.

31Ha pe pa’i oma’ẽ ramo pe uñe ai rehe, ha ndaipypukuvéivaicha ipirégui, ha ndahague hũi, pe pa’i ombotyva’erã ichupe 7 ára pukukue.

32Ha pe ára 7-hápe pe pa’i oma’ẽ jevyva’erã pe ai rehe; ha pe uñe naiñasãiri ramo, ha ndahaguéi sa’yjungýva, ha pe uñe ndaipypukuvéi ramo ambue ipirégui,

33upéicharamo omoperõukáta, ha pe hasyha rupi katu nomoperõiva’erã; ha pa’i omboty jevyva’erã ichupe ambue 7 ára.

34Ha pe ára 7-hápe pe pa’i oma’ẽ jevyva’erã pe uñe rehe; ha pe uñe naiñasãiri ramo ipire rehe, ha ndaipypukuvéi ramo ambue ipirégui, pe pa’i he’iva’erã ipotĩha; ha’e ojoheiva’erã ijao ha ipotĩma.

35Ha pe uñe iñasãive ramo ipire rehe, pe pa’i he’i riréma hasývape ipotĩmaha,

36upéicharamo pe pa’i oma’ẽ jevyva’erã hese; ha pe uñe añetehápe iñasãive ramo ipire rehe, pe pa’i ndohekaveinteva’erã pe tague sa’yjungýva, ha’e naipotĩvéima.

37Ha ohechakuaa ramo pe uñe ndokakuaaveiha, ha osẽha hese tague hũva, pe uñe okueráma; ha’e ipotĩma, ha pe pa’i he’iva’erã ichupe ipotĩha.

38Ha osẽ ramo kuimba’e térã kuña rete rehe mba’e ky’aichagua morotĩva,

39pe pa’i oma’ẽva’erã hese; ha hete rehe osẽ ramo mba’e ky’aichagua morotĩ hũngýva, péva kurúnte osẽva’ekue ipire rehe, ha pe tapicha ipotĩ.

40Ha pe kuimba’e akã rague okúi ramo, péva ningo akã perõnte, upéva ipotĩ.

41Ha isyva gotýo okuipa ramo iñakã rague, péva isyva perõnte, ha’e ipotĩ.

42Ha iñakã perõháme térã isyva perõháme gueteri osẽ ramo ai morotĩ pytãngýva, péva ai pochy, heñóiva iñakã perõháme térã isyva perõháme.

43Upéicharamo pe pa’i oma’ẽva’erã hese, ha ojekuaa ramo iruruha pe ai morotĩ pytãngýva pe iñakã perõháme térã isyva perõháme gueteri, ha ojogua ramo pe tete rehegua ai pochýpe,

44péva ilépra, naipotĩri ha’e, ha pe pa’i he’iva’erã ichupe naipotĩriha; iñakã rehe oĩ imba’asy.

45Ha pe iléprava oñemóndeva’erã ao sorópe, oikova’erã akã nandi, oñu’ava’erã hova itĩguy guive ha osapukái ha he’iva’erã: Nachepotĩri, nachepotĩri.

46Opaite ára oĩ aja hese pe ai, oikova’erã naipotĩriva ramo, ha oikova’erã ha’eño, jeikoha okárape.

47Peteĩ ao rehe oja ramo ai pochy rehegua ai vai, taha’e ao ovecha ragueguiguáva, térã líno inimboguiguáva,

48térã pyaha inimbo rehe, térã pyaha líno inimbo rehe térã ovecha rague inimbo rehe, térã vakapi rehe, térã oimeraẽ mba’e vakapiguiguáva rehe;

49ha pe ai vai hovyũ térã pytãngy oja ramo ao rehe térã vakapi rehe, térã pyaha inimbo rehe, térã ojepyahapyréva rehe, térã oimeraẽ mba’e vakapiguiguáva rehe; péva ai pochy reheguáva, ha ojehechaukava’erã pa’ípe.

50Ha pe pa’i oma’ẽva’erã pe ai vai rehe; ha ombotyva’erã pe ijai vaívape 7 ára pukukue.

51Ha pe ára 7-hápe oma’ẽva’erã pe ai vai rehe; ha iñasãive ramo pe ai vai umi ao rehe, térã pe pyahapyre rehe, térã vakapi rehe, térã oimeraẽ mba’e vakapígui ojejapova’ekue rehe, pe ai vai ilépra, ha upéva naipotĩri.

52Ojehapyva’erã umi ao, pe ojepyahapyréva, pe pyaha ovecha ragueguigua térã líno inimboguiguáva, térã oimeraẽ mba’e vakapiguigua oguerekóva guive pe ai vai, péva ilépra, ha tatápe ojehapyva’erã.

53Ha pe pa’i ohecha ramo pe plága naiñasãiriha pe ao rehe, pe pyaha inimbo rehe ni oimeraẽ mba’e vakapiguiguáva rehe,

54upéicharamo pe pa’i ojoheiukava’erã umi mba’e ky’a (máncha), ha omboty jevyva’erã ichupe 7 ára peve.

55Ha pe pa’i oma’ẽ jevyva’erã umi mba’asy plága rehe ojejohéi rire, ha oime ramo oĩ haguéichante, jepémo pe mba’e ky’a naiñasãiri, péva naipotĩri; tatápe ojehapyva’erã; pe mba’e ky’a okarúgui hese, pe oñeñapi’ũ hague topyta jepe ijapére térã hyepýguio umi mba’e rehe.

56Ha pe pa’i ohechávo pe mba’e ky’a hũve ojejohéi rire, oikytĩva’erã ao pehẽngue oñembyaihápe, térã pe vakapígui, térã pe pyaha inimbógui térã pe ojepyahapyrégui.

57Ha osẽ jevy ramo pe plága ao rehe, térã pe pyaha inimbo rehe, pe ojepyahapyréva rehe, térã oimeraẽ mba’e vakapiguiguáva rehe, ha iñasãi hesekuéra, tatápe ojehapyva’erã umi plága mba’e.

58Pe ao, pe pyaha inimbo, térã ojepyahapapyréva, térã oimeraẽ mba’e vakapiguigua ojejoheiva’ekue, ha ojei ichugui pe mba’e ky’a, ojejohéi jevyva’erã, ha upéi ipotĩma.

59Kóva hína lépra rembiapoukapy osẽva ao ovecha ragueguiguáva rehe, térã líno inimboguiguáva rehe, térã pyaha inimbo rehe, térã ojepyahapyréva rehe, térã oimeraẽ mba’e vakapiguiguáva rehe, ojekuaa porã hag̃ua ipotĩpa térã naipotĩri.