Juéces 15 - Biblia en Guaraní - ?anderuete ?e’? Por? 2015

1Ha ojehu, ndahi’areiete umi mba’e rire, pe trígo oñemono’õha árape, Sanson oho oñandu hag̃ua hembirekópe, peteĩ kavara ra’y reheve, he’ívo: Aikéta che rembireko rendápe ikotykehápe. Pe kuña ru katu ndohejái ichupe oike.

2Ha pe kuña ru he’i Sansónpe: Ahechakuaa nande’a’eiha hese, upévare ame’ẽ ichupe ne irũme. Ikypy’y iporãve ichugui, erahána péva, pe ambue rendaguépe.

3Upémaramo Sanson he’i ichupe: Ko’ág̃a Filisteayguakuéra ndikatúi oñe’ẽvai cherehe, ajapo ramo mba’e ivaíva hesekuéra.

4Upéi Sanson oho ojapyhy 300 aguara, ha ombojoaju ojuehe huguaikuéragui, ha omoĩ peteĩ tata’y hendýva mokõive huguái pa’ũme.

5Ha omyendy rire umi tata’y, opoi umi aguarágui Filisteayguakuéra kokuére, ha ohapy itrígo oñembyatyvahína, ha upéi pe tata ohupity avei iparralty ha ijolivotykuéra.

6Ha umi Filisteaygua he’i: Mávapa ojapo ko’ã mba’e. Ha he’i joa hikuái: Sanson, pe Timnat pegua rajy ména, ojepe’águi ichugui hembireko ha oñeme’ẽgui iñirũme. Upévare umi Filisteaygua ou ha ohapy pe kuñáme ha itúvape avei.

7Upémaramo Sanson he’i ichupekuéra: Péicha pejapógui cherehe, añevengase raẽ, ha uperire ae pohejáta.

8Hetápe oinupã vaiete, omopẽvo ijyva ha hetymakuéra; ha oguejy ha oiko Etam itakuaguasúpe.

Sanson sarambi ojapo Filisteayguakuéragui Lehípe

9Upémaramo umi Filisteaygua ou ha oñembyaty Judápe, ha oñemyasãi hikuái Lehi rupi.

10Ha umi Judaygua kuimba’e he’i ichupekuéra: Mba’érehepa peju oréve. Ha he’i hikuái ichupekuéra: Roju roapresa hag̃ua Sansónpe, ha rojapo hag̃ua hese pe ha’e ojapo haguéicha orerehe.

11Ha oñembyaty 3.000 kuimba’e Judaygua oho hag̃ua Etam itakuaguasúpe, Sanson rendápe, ha he’i hikuái ichupe: Ndépa ndereikuaái umi Filisteaygua orembopoguy hague. Mba’érehe piko rejapo orerehe ko’ã mba’e. Ha Sanson he’i ichupekuéra: Che ajapo hesekuéra ha’ekuéra ojapo haguéicha cherehe.

12Upéramo he’i hikuái ichupe: Ore rojúkuri roapresa ha rome’ẽ hag̃ua umi Filisteaygua pópe. Ha Sanson he’i ichupekuéra: Peme’ẽ ramo chéve pene ñe’ẽ ndachejukamo’ãiha, añeme’ẽta pende pópe.

13Ha he’i ichupe hikuái: Roapresasénte rome’ẽ hag̃ua ipopekuéra; ore ndorojukamo’ãi. Upémaramo ojokua ichupe mokõi sã pyahúpe, ha ogueraha ichupe hikuái.

14Lehi peve, ha Filisteayguakuéra osẽ sapukaipópe ojohúvo ichupe; ha Ñanderuete Pytu Porãitéva ou hi’ári, ha umi sã oĩva’ekue ijyva rehe ojogua ku ka’avoguigua inimbo kaiguépe ha iñapytĩha ho’apa ipógui.

15Ha Sanson ojohúvo peteĩ búrro rañykãngue, ojapyhy ha ipype ojuka 1.000 kuimba’épe.

16Upéramo Sanson he’i: Peteĩ búrro rañykãnguépe aity Filisteaygua atýrape, ko búrro rañykãnguépe ajuka 1.000 kuimba’épe.

17Ha oñe’ẽmbávo omombo pe búrro rañykangue, ha ombohéra pe yvy péva Ramatlehi (he’iséva cérro tañykã).

18Ha ijy’uheietereígui omba’ejerure asy Ñanderuetépe, ha he’i: Nde reme’ẽ ko pytyvõ tuichaitéva ne rembiguái po rupi; ha ág̃a amanótapa chey’uhéigui, ha ha’átapa ko’ã kuimba’e ipire’i oñekytĩ’ỹva (noñecircuncidáiva) pópe.

19Upémaramo Ñanderuete ojoka pe yvykua oĩva Lehípe; ha osẽ y ha ha’e hoy’u, ha ipytu imbarete jevy. Upévagui ombohéra pe yvy: Enhacore, he’ise ñembo’e yvu, ha upéva oĩ gueteri Lehípe ko ára peve.

20Sanson oisãmbyhy Israélpe, umi Filisteaygua árape, 20 áño pukukue.