Salmokuéra 34 - Biblia en Guaraní - ?anderuete ?e’? Por? 2015

Ñanderuete oipytyvõ ita’ýra ha itajyrakuérape - David purahéi

1Opaite ára amomba’eguasúta Ñanderuetépe, che juru tomboete ichupe tapiaite.

2Ñanderuete ndive che ánga ovy’aite, umi ohasa asýva tohendu ha tahory hikuái.

3Pemomba’eguasúke chendive Ñanderuetépe, ha jaropurahéi oñondivepa héra porãite.

4Ahekágui Ñanderuetépe, Ha’e cherendu, ha opaite mba’e chemongyhyjéva oipe’a chehegui.

5Umi hese oma’ẽva’ekue ojehesape’a, ha hovakuéra noñemotĩmo’ãi.

6Upe omba’ejerure asýva Ñanderuetépe, katuete Ha’e ohendúta ichupe ha Ha’e oguenohẽta ichupe opaite ijepy’apy vaígui.

7Ñanderuete rembiguái (ángel) oñangareko umi ojeroviáva rehe, Ha’e oguenohẽta ichupekuéra mba’evaígui.

8Peñeha’ã ha pehecháta Ñanderuete ipy’a porãha, ovy’aite upe kuimba’e ojeroviáva hese.

9Pekyhyjéke Ñanderuetégui, peẽ heko potĩva, Ha’e ome’ẽmbáta heko potĩvape hemikotevẽteéva.

10Umi leõ ra’y ohasa asy ha iñembyahýi hikuái, umi ohekáva Ñanderuetépe katu ndofaltái ichupekuéra mba’eveichagua mba’eporã.

11Pejúke peẽ ita’ýra cherendu hag̃ua, che pombo’éta pekyhyje hag̃ua Ñanderuetégui.

12Mávapa upe kuimba’e oikove pukuséva, ha oikoséva heta ára ohecha hag̃ua mba’eporãva,

13upéicharõ ojokova’erã ijuru, ani hag̃ua osẽ mba’evai térã japu ijurúgui.

14Ejei tembiapo vaígui ha ejapo tembiapo porã, eheka pe py’aguapy, upéi eñeha’ãmbaite rejoko hag̃ua ha eiko ipoguýpe.

15Ñanderuete resa oma’ẽ hekopotĩva rehe, Ha’e ojapysaka porã imba’ejerure asy rehe.

16Ñanderuete pochy oĩ umi tekove ñaña ári, oipe’a hag̃ua yvy ape árigui mandu’a heseguáva.

17Umi hekopotĩva ojerure asy ramo Ñanderuetépe, katuete Ha’e ohendúta ichupekuéra ha oguenohẽta ijehasa asýgui.

18Ñanderuete hi’ag̃ui umi ohasa asývagui, ha oipytyvõ umi oñembyasývape ojapo vai haguére.

19Pe heko potĩva heta jepy’apy asy ohasa, opaite ijehasa vaígui katu Ñanderuete oguenohẽ ichupe.

20Ha’e oñangareko opaite ikanguekuéra rehe, ani hag̃ua peteĩnte jepe opẽ.

21Pe iñañáva rembiapo ojukáta ichupe, ha umi omboykéva heko potĩvape oñeñandu vaiva’erã.

22Ñanderuete omosãso umi hese ojeroviávape ani hag̃ua oho aña retãme.