1Añetehápe pe pláta ojejohukuaa oĩháme ha pe óro oñemopotĩ ojejapokuaahápe.
2Pe hiérro oñenohẽ yvýgui ha itágui oñembohyku cóbre.
3Yvyariguakuéra omyesakã iñypytũháme, ha oñeha’ãmba oheka hag̃ua umi ita ipypukuvehápe oĩva yvy guýpe, oguenohẽ hag̃ua itakuéragui imetalrã.
4Ojo’o hikuái yvykua pypukuete mombyry ojeiko hágui, yvyarigua py ohasa’ỹha rupi ha mombyry tapeguasúgui. Upépe, mombyry ambue yvyariguakuéragui, oñemosãingo ha oñembovava omba’apo jave.
5Yvýgui heñói ñane rembi’u, yvy guýpe katu oñehendu tata opirirírõ guáicha.
6Kuimba’ekuéra oheka ita vera hovýva ha óro itakuéra pa’ũme.
7Yryvu ndoikuaái hape, ha taguato resa ndojohúi ha’ekuéra omba’apohápe.
8Umi mymba ñarõ araka’eve ndoguatái upérupi, ni leõ jepe ndohasái upérupi.
9Yvyarigua omoĩ ipo itaty rehe ha ombojere jepe cerrokuéra hapoite peve.
10Itaguasukuéra rupi ojapo haperã ha hesakuéra ohechapa umi mba’erepyeta.
11Ojoko pe y ani hag̃ua ombyai hembiapo, ha oguenohẽ hesakãháme umi mba’e oñemíva.
12Ha moõ piko ikatu ojejohu pe arandu. Moõ piko oiméne akãguapy.
13Yvyariguakuéra ningo ndoikuaái hape ha oikovéva apytépe ndojejohumo’ãi arandu.
14Pe itakua hugua’ỹva he’i: Ndaipóri chepype; ha yguasu he’i: Chendive ndaipóri avei.
15Pe arandu noñeme’ẽkuaái óro rehe ha ndojejoguamo’ãi pláta rehe.
16Noñembohepykuaamo’ãi óro Ofir peguarépe, térã ita vera sa’yju hepyetépe térã ita vera hovy porãitévape.
17Arandu ndojejoguái diamánte térã órore, ha noñeme’ẽmo’ãi hekovia ijeguaka óro potĩete rehe,
18ni noñeme’ẽmo’ãi ita vera térã vídrio hepyetéva rehe, pe arandu iporãiteve umi ita vera hepyetevévagui.
19Noñembojojakuaái hese ita vera sa’yju Etiopía peguare, ndojejoguamo’ãi óro potĩetépe.
20Ha moõguipa upéramo oúta pe arandu. Ha mamo piko oĩ tekombo’e ome’ẽkuaáva arandu.
21Kañyháme oiko opaite yvyarigua reságui, ha oñomi mayma guyra ára peguágui.
22Abadon, pe omanóva retã, ha pe mano he’i hikuái: Herakuã porã rohendu ore apysa rupi.
23Ñanderuete voi oikuaa porã hape ha oikuaa avei moõpa ojejohu.
24Ha’e ningo oma’ẽ yvy apýra paha rehe, ha ohechapa oĩva guive yvága guýpe.
25Ha’e ningo ome’ẽ pe yvytúpe ipu’aka, ha ykuérape ohechauka ijapýra.
26Ha’e ome’ẽ hembiapoukapy amáme g̃uarã, ha ombohape arasunu ha aratiri,
27upérõ Ñanderuete ohecha pe arandu ha oiporu oipyguarapa hag̃ua.
28Ha he’i yvyariguakuérape: Pema’ẽ porãke, upe okyhyjéva Ñanderuetégui iñarandu ha upe oñemomombyrýva mba’evaígui iñakã porã.
Who We AreWhat We EelieveWhat We Do
2025 by iamachristian.org,Inc All rights reserved.
