Joel 2 - Biblia en Guaraní - ?anderuete ?e’? Por? 2015

1Pembopu turu Siónpe, oñehendu porã hag̃ua che cérro porãite rupi, toryryipa opaite yvy apére oikóva guive, og̃uahẽmbotágui Ñanderuete ára.

2Upe ára upévape iñypytũ ha hi’araipa, ikuarahy’ã ha hatatĩna iñasãi háicha pe ko’ẽjúvo cerrokuéra rehe, péicha oñemyasãita peteĩ tetã imbarete itereíva. Peichagua mba’e araka’eve ndaiporiva’ekue, ha ndaiporimo’ãvéima avei.

3Henonderãme tata ombokusuguepáta ha hapykuerépe tata rendyguasu oñu’ãmbáta gueteri, henonderãme pe yvy oiko Eden peguáicha, ha hapykuerépe itaperéta yvy perõicha, ha ndaiporimo’ãvéi avave okañýtava ichugui.

4Hete ojogua kavajukuérape ha oñanikuaa kavaju carréra peguáicha.

5Ku cárro ñorãirõ meguáicha ohasa hikuái umi cérro ru’ã rehe, ojogua pe tata rendýpe ohapýva ñana rogue ipirúva ha ku soldádo atyguasu mbaretéicha oñembosako’íva ñorãirõrãme g̃uarã.

6Henondépe oryryipa tetãnguéra, ha opaite tetãyguakuéra hesa’yjupava’erã.

7Oñani joava’erã hikuái ipy’aguasuetévaicha, umi kuimba’e ñorãirõ megua ikatupyrývaicha ojupi joava’erã pe táva tápia yvate rehe, oho joava’erã hapekuéra rehe ha ndojeimo’ãi haperãgui.

8Avave ndojopymo’ãi hapichápe, peteĩteĩva ohóta haperã rehe, ohóta hikuái henonderãme ojepoi ramojepe hesekuéra hu’yeta.

9Ojeity hikuái pe táva ári, oñani joáta ojupi hag̃ua táva tápia rehe umi óga ári, mondaháicha oikéta hikuái umi óga rovetã rupi,

10henondépe oryryipáta pe yvy, iñangekõita umi yvága, kuarahy ha jasy iñypytũmbáta, ha mbyjakuéra nahendymo’ãvéi.

11Pende Ruete katu osunúta iñorãirõhára atyguasuete renondépe, hetaiterei ningo umi ojapóva hembipota; mba’eguasuete pende Ruete ára, ha oñemondyiete hikuái, mávapa ikatu ipu’aka hese.

Ñanderuete poriahuvereko

12Upévare pende Ruete he’i: Pejevy Che aĩha gotýo pende py’aite guive, karu’ỹ, tasẽ ha jahe’o asy reheve.

13Pemondoro pende py’apy, ha ani pende aokuéra, pejevy katu pende Ruete, pende Jára rendápe; Ha’e iporiahuvereko ha ipy’a porã, hasy ipochy hag̃ua ha iporiahuvereko tuichaiterei ha imbegue oporohavira hag̃ua.

14Ha mávapa oikuaáne, ikatu Ha’e ombyasy ha ome’ẽ jevy ijehovasa, peikuave’ẽ hag̃ua trígo ha víno pende Ruete, pende Járape g̃uarã.

15Pembopu turu Siónpe, peikuaauka karu’ỹ, peñembyaty peñembo’e hag̃ua.

16Pembyaty tetãyguakuérape, pemboheko potĩ pende aty, pembyaty umi karai anciánope, pembyaty umi mitã ha umi okambúvape, tosẽ ikotýgui karia’y ha kuñataĩ omenda ramóva.

17Pa’ikuéra, pende Ruete rembiguái, tojahe’o Ñanderuete rogaguasúpe ha kuave’ẽmby renda pa’ũme. Tojahe’o joa ha toñembo’e, ha te’i hikuái: Nde, ore Ruete, oreporiahuverekomína ha ani reheja ambue tetã ombopoguy ne retã Israélpe. Mba’upépa ambue tetãnguéra he’íta: Mamo piko oime Israel Jára.

18Uperirémante pende Ruete oipytyvõ ha oiporiahuvereko jevýta hetã Israélpe.

19Upéicha pende Ruete ombohováita hetãme he’ívo: Péina ápe, Che amondo peẽme pan, parral rykuere ha acéite, peñemohyg̃uatã jevy hag̃ua ha araka’evéma ndahejamo’ãvéi ambue tetã oñembohory hag̃ua penderehe.

20Ha amomombyrýta pendehegui umi yvatéguio oñemoĩva penderehe, ha amondopáta ichupekuéra desiertoha rupi, yvy oñembotaperévape; umi tenonde pegua aitýta Yguasu kuarahyresẽ gotyoguápe, ha umi hapykue pegua aitýta pe Yguasu kuarahyreikeha gotyoguápe; ha oñehetũta inengue ha itujupáta, oñembotuicha haguére hikuái.

21Yvy, ani rekyhyjétei, evy’a ha nderory katu, pende Ruete tuicha mba’e ojapótagui penderehe.

22Mymbakuéra ñu rupigua ani pekyhyjétei, umi kapi’i ñu rupigua hovyũmba jevýta, hi’apa jevýta avei umi yvyra, pe hígo ha parral ome’ẽta ipu’aka.

23Peẽ, Jerusalengua, pevy’aite ha penderory joaitéke pende Jára, pende Ruete ndive, Ha’e ome’ẽta peẽme pe ama hi’araitépe, ha omboukáta pendeári pe ama tenondegua ha hapykue pegua.

24Umi kokue henyhẽta trígogui, ha umi parral’a ha olivo’a ojehykue’oha henyhẽ rasapáta víno ha acéitegui.

25Che amyengoviapa jevýta peẽme umi tuku atyguasu peteĩ, mokõi, mbohapy ha irundyha ho’upava’ekue, Che voi ambouva’ekue umía pendeári.

26Pekarúta peneryg̃uatã porã hag̃ua, ha pemomba’eguasuetéta pende Ruetépe, pende Jára réra, mba’e techapyrãva (milagrokuéra) ojapova’ekue penderehehápe; ha araka’evéma che retã noñemotĩmo’ãvéima.

27Ha peikuaáta Che aĩha Israelguakuéra apytépe, Che voi ningo pende Ruete, pende Jára, ha ndaipóri ambue, ha che retã araka’evéma noñemotĩmo’ãvéi.

Ñanderuete oñohẽta pe Pytu Porãmbáva

28Ha ã mba’e rire añohẽta che Pytu Porãmbáva mayma kuimba’e ha kunñakuéra ári ha pende ra’y ha pende rajykuéra oprofetizáta; pende karai ancianokuéra ohecháta ike pegua, ha pene mitãrusukuéra ohecháta techapaykuéra (vision).

29Umi ára umívape añohẽta avei che Pytu Porãmbáva pene rembiguái kuimba’e ha kuñakuéra ári.

30Che ahechaukáta milagrokuéra yvagakuéra ha yvýpe: Tuguy, tata ha tatatĩ.

31Pe kuarahy iñypytũta ha jasýgui oikóta tuguy, og̃uahẽ mboyve Ñanderuete araguasuete ha oporomongyhyjeitéva.

32Ha mayma umi ohenóiva guive pende Ruete réra ojesalvava’erã; Sion cérrope ha Jerusalénpe oikóta umi osẽmava’ekue jejopy vaietégui, he’i haguéicha pende Ruete, ha umi hembymítava oĩmbáta Ha’e ohenoiva’ekuépe.