Job 42 - Biblia en Guaraní - ?anderuete ?e’? Por? 2015

Job oñembyasy oñe’ẽvai haguére Ñanderuete rehe

1Job ombohovái Ñanderuetépe, ha he’i:

2Che aikuaa ndéve g̃uarã opaite mba’e ikatuha, ha umi mba’e rejaposéva guive katuete rejapóta avei.

3Máva piko pe omoypytũva ore Ruete rekombo’e arandu’ỹre, Che voi añe’ẽ arandu’ỹre heta mba’ére ha milágro rehe che aikuaa porã’ỹre.

4Ejapysakamína, ajerure ndéve, añe’ẽ hag̃ua, amba’eporandu hag̃ua ndéve, ha Nde chembo’éta.

5Che apysa rupínte roikuaava’ekue, ko’ág̃a katu che resakuéra nderecháma.

6Upévare añembyasy añe’ẽvai haguére ha atĩ apytávo, aguapy yvyku’i ha tanimbúpe.

7Ha Ñanderuete oñe’ẽmba rire Job ndive, oñe’ẽ avei Elifaz, pe Teman peguápe ha he’i: Che chepochyete nendive ha ne irũ mokõivéva ndive napeñe’ẽ porãigui cherehe ojapo haguéicha che rembiguái Job.

8Upévare pejapyhy ko’ág̃a 7 tóro ra’yrusu ha 7 ovecha mácho ha tapeho che rembiguái Job rendápe peikuave’ẽ hag̃ua pendejehe kuave’ẽmby ojehapypáva ha che rembiguái Job toñembo’e penderehe, añetehápe ahendúta ichupe ani hag̃ua ajapo ivaíva penderehe, napeñe’ẽi haguére cherehe pe añetegua, ojapo haguéicha che rembiguái Job.

9Ha oho Elifaz, pe Teman pegua; Bildad, pe Suah pegua; ha Zofar, pe Naamat pegua, ha ojapopa hikuái Ñanderuete he’i haguéicha ichupekuéra, ha Ñanderuete ohendu Job ñembo’e.

Ñanderuete ohovasa jevy Jóbpe

10Ko’ã mba’e rire Ñanderuete omonguera Jóbpe, ha’e oñembo’e jave iñirũnguéra rehehápe, Ha’e ombojo’a opaite mba’e Job oguerekova’ekue guive.

11Ha opaite ityvýra, heindykuéra ha mayma ikuaaha ou hendápe ho’u hag̃ua hendive pan, ha ojepy’ambyasy hendive, ha omoangapyhy ichupe opaite mba’evai Ñanderuete ohejáva ojehu hekovépe ha peteĩteĩ ome’ẽ ichupe peteĩ akytã óro morotĩ megua ha peteĩ kuãirũ oroguiguáva.

12Upérõ Ñanderuete ohovasave Job rekove kueheveguarégui, ha ome’ẽ ichupe 14.000 ovecha ha kavara, 6.000 caméllo, 2.000 guéi ha 1.000 búrro kuña,

13ha ome’ẽ jevy Jóbpe 7 ta’ýra ha mbohapy tajýra.

14Itajýra ypykuévape Job ombohéra Jemima; pe mokõiháme, Cesia; ha mbohapyhápe, Kerenhapuc.

15Kuñakuéra apytépe ko yvy apére ndojejohúi kuñataĩ iporãvéva Job rajykuéragui ha Job omboja’o opaite mba’e oguerekóva guive ita’ýra ha itajyrakuérape.

16Ko’ã mba’e rire Job oikove 140 áño, ha’e ohecha ita’ýra remineno ra’ykuérape gueteri (4 generaciónes).

17Job omano itujaite riréma ha henyhẽ porã rire hekove áragui.