Márcos 3 - Biblia en Guaraní - ?anderuete ?e’? Por? 2015

Hesu omonguera peteĩ ipo ypívape

1Ha Hesu oike jevy Ñanderuete rogaguasúpe; ha oĩ upépe peteĩ kuimba’e ipo ypíva.

2Ha ojesareko hese hikuái ohecha hag̃ua omonguerápa pytu’uha árape, oñemoĩkuaa hag̃ua hese hikuái.

3Ha Hesu he’i pe kuimba’e ipo ypívape: Eñembo’y ore mbytépe.

4Ha oporandu ambuekuérape: Iporã piko pytu’uha árape ojejapo mba’eporãva, térãpa ojejapo mba’evaíva. Ojesalva tekove térã oñehundi, ha ha’ekuéra okirirĩmba.

5Upérõ Hesu oma’ẽ pochyhápe hesekuéra, ñeko’õi reheve oñembopy’a hatã haguére ha he’i pe kuimba’épe: Eipyso nde po. Ha ha’e oipysóvo ipo okueraite opytávo.

6Ha fariseokuéra osẽvo upégui oñomongeta hese umi Heródes reheguakuéra ndive, ojuka hag̃ua Hesúpe.

Hesu ombo’e hetãyguakuérape

7Ha Hesu hemimbo’ekuéra ndive oje’ói yguasu gotýo, ha hapykuéri oho hetaiterei Galileaygua, Judaygua,

8Jerusalengua, Idumeaygua, Jordan mboypyrigua, Tiroygua ha Sidongua, hetaiterei ohechase umi mba’eguasuete Ha’e ojapóva, upévare ou hikuái hendápe.

9Ha Hesu he’i hemimbo’ekuérape ombosako’i hag̃ua ichupe peteĩ bárco, umi genteita rehe, ani hag̃ua ojopyete hikuái ichupe.

10Hetápe ningo omonguera, upévarehe opaite hasýva oimeraẽva mba’asýgui ojeity joa hi’ári opoko hag̃ua hese.

11Ha umi mba’epochy ohechávo avei ichupe ojeity ovapývo henondépe ha osapukái he’ívo: Nde ningo Yvága Jára Ra’y.

12Ha Ha’e oja’o pohýi ichupekuéra ani hag̃ua oikuaauka hikuái péva.

Hesu oiporavo 12 hemimbo’ekuérape

13Ha Hesu ojupi cérro ári ha ohenói hendápe umi ha’e oipotávape, ha ou hikuái hendápe.

14Ha oiporavo 12 kuimba’e omoirũ hag̃ua ichupe, ha omondo ichupekuéra omyasãi hag̃ua Ñanderuete ñe’ẽ porãite.

15Ha ome’ẽ ichupekuéra pu’aka omosẽ hag̃ua mba’epochykuérape.

16Ha umi 12 kuimba’e Ha’e oiporavomava’ekue ningo héra: Simon, héra jo’áva Pédro,

17Zebedéo ra’ykuéra Jacóbo ha Juan, ohero ichupekuéra Boanerges, he’iséva arasunu ra’ykuéra;

18upéi Andres, Felípe, Bartolome, Matéo, Tomas, Jacóbo, Alféo ra’y, Tadéo, Simon, pe Canaangua,

19ha Júdas Iscarióte, pe otraicionátava Hesu Crístope.

20Ha og̃uahẽ peteĩ ógape ha oñembyaty jevýgui heta kuimba’e ha kuñakuéra, ndaikatúi okaru hikuái.

Hesu rogayguakuéra ojokose Hesu Crísto rembiapo

21Ha Hesu rogayguakuéra ohendúma ramo umi mba’e, ou hikuái ogueraha hag̃ua ichupe, he’ívo ojupe: Ha’e itarovaha.

Umi kuatia haihára oñemoĩ Hesu rehe

22Ha umi kuatia haihára oumava’ekue Jerusaléngui he’i: Ipype oĩ Beelzebu, kóva ningo aña ruvicha ha ha’e rupínte omosẽ mba’epochykuérape.

23Ha oñembyatypa vove, Hesu oñepyrũ omyesakã ichupekuéra ñe’ẽ ñembojoja rupi: Mba’éicha piko ikatu Satana omosẽ Satanáme.

24Ha peteĩ tetãguasu opu’ãrõ ijehe, upe tetãguasu ndoiko aremo’ãi.

25Ha umi ogaygua oikóva peteĩ ógape oñemoĩ ramo ojuehe, katuete ndahi’are ha ndoikopukumo’ãi.

26Ha Satana opu’ãrõ ijehe ha oñemboja’o rire, ndaikatúi oikove, opava’erã uvei.

27Avave ndaikatúi oike ipy’aguasúva rógape omonda hag̃ua imba’erepy, noñapytĩ ra’ẽ ỹrõ pe óga járape ha upéi ae ikatu omonda imba’erepy.

28Añetéko ha’e peẽme opaite mba’e oñeperdonataha, opaite tembiapo vaikuéra ha ñe’ẽvaikuéra.

29Upe oñe’ẽvaíva Pytu Porãmbáva rehe katu noñeperdonamo’ãi araka’eve, ára atyguasukuéra rupi, hembiapo vai tapia ojava’erã hese.

30Péicha Hesu he’i umi kuatia haihárape he’i haguére hese: Oguerekoha mba’epochy ipype.

Mávapa Hesu Crísto hermáno

31Ha og̃uahẽvo isy ha ityvyrakuéra hendápe, opyta okápe hikuái ha ohenoiuka ichupe.

32Ha heta Israelgua oguapyvahína ijerekuévo he’i ichupe: Péinako nde sy, nde ryvykuéra ha ne reindykuéra oĩmba okápe nderekávo.

33Ha Hesu he’i ichupekuéra: Máva piko che sy, che ryvykuéra ha che reindykuéra.

34Ha oma’ẽ umi ijerekuévo oguapývare ha he’i: Péina ápe che sy, che ryvykuéra ha che reindykuéra.

35Oimeraẽva ojapóva guive Ñanderuete rembipota, upéva ningo che ryvy, che reindy ha che sy.